රංගනය කියන කලාව තුළ රසිකයන්ගේ හිතේ අමතක නොවන චරිතයක් වෙන්න හැම රංගන ශිල්පියකුටම බැහැ. එහෙත්, සැබෑ දක්ෂ රංගන ශිල්පියකුට පුළුවන්, තමන් කරන නිර්මාණ තුළින් රසික හදවත් හරි ලස්සනට ස්පර්ශ කරන්නට. ඉතින්, වේදිකාවද, පුංචි තිරයද, නැතිනම් සිනමාවද මාධ්යය මොකක්ද කියල අදාළ නැහැ. මේ දවස්වල විකාශය වන ‘සිත නිදි නෑ‘ වැනි ටෙලිනාට්ය තුළින් රසික හිත් පිස්සු වට්ටපු අනුරාධ මල්ලවාරච්චි නම් අතිදක්ෂයා, ඔහුගේ ජීවිතය සහ රංගනය ගැන ‘හාට්’ අපි සමග කතා කළා.Sri Lanka Latest News
මේ දවස්වල අනුරාධගේ වැඩ කටයුතු ගැන දැනගන්න කැමැතියි?
මේ දවස්වල මම විවිධ ශානරයන්ට අයත් ටෙලිනාට්ය කිහිපයක වැඩකටයුතු එක්ක සම්බන්ධ වෙලා ඉන්නවා. ඒ එක්කම දැනටමත් විකාශය වෙමින් පවතින නාට්ය වගේම, ඉදිරියේදී විකාශය වීමට නියමිත, රූපගත කිරීම් කරන නාට්ය කීපයකුත් තියෙනවා. ඒවත් එක්ක තමයි මේ දවස්වල කාලය ගෙවෙන්නේ.
ඉතින් රංගන ජීවිතයේ ආරම්භය සහ ඒ ආ ගමන් මඟ ගැනත් කතා නොකර බැහැ?
මගේ රංගන ජීවිතය ආරම්භ වුණේ හරිම අහම්බයකින්. පාසල් කාලයේදී මම ජීවවිද්යා අංශයෙන් තමයි උසස් පෙළ හැදෑරුවේ. ඒ නිසාම කලාවට එන්න කිසිම අදහසක් තිබුණේ නැහැ. ජීවිතයේ සිදුවූ සමහර හැරවුම් ලක්ෂ්යයන් නිසාවෙන් කලාවට පිවිසෙන්න තීරණය කළා. මගේ මිත්රයකුගේ කෙටි නාට්යයකට සම්බන්ධ වෙන්න ලැබීමත් එක්ක ඇති වූ ආසාව නිසාම මම වේදිකා නාට්යවලට සම්බන්ධ වෙන්න කොළඹට ආවා. පසුව මම නැවත කලා විෂය ධාරාවෙන් උසස් පෙළට පෙනීසිට, සෞන්දර්ය කලා විශ්වවිද්යාලයේ උපාධියක් ලබාගත්තා. ඒ අධ්යාපනය නිසා ශාස්ත්රීයව කලාව අධ්යයනය කරන්නත්, පසුකාලීනව ගුරුවරයකු ලෙස කටයුතු කරන්නත් මට අවස්ථාව ලැබුණා. කෙසේ වෙතත්, වර්තමානය වන විට ඉගැන්වීම් කටයුතු සියල්ල නවතා දමා පූර්ණකාලීන ශිල්පියෙක් විදිහට මම කටයුතු කරනවා.
ඔබ වැඩිපුරම කැමති වේදිකාවටද? ටෙලිනාට්යයටද? නැත්නම් සිනමාවටද?
මම වැඩියෙන්ම ප්රිය කරන මාධ්යයක් තෝරා දෙන්න බැහැ. මම මාධ්ය තුනටම කැමැතියි. මම වැඩිපුරම වේදිකාව හා සම්බන්ධ වුණත්, රංගන ශිල්පියෙක් විදියට මාධ්ය තුනේම පවතින විවිධ සීමාවන් තුළ වැඩකරන්න ලැබීම මම මහත් සේ අගය කරනවා. මම යම් නිර්මාණයකට දායක වෙන්න තීරණය කළාට පස්සේ, මට ඒ මාධ්යයේ සීමාවන් වැදගත් වෙන්නේ නැහැ. මගේ උත්සාහය වන්නේ ඒ මාධ්ය තුළ මගේ රංගන දායකත්වය උපරිමයෙන් ලබාදීමටයි.
‘සිත නිදි නෑ’හි ජනප්රියත්වය ගැන මොකද හිතන්නේ?
ඒක දීර්ඝ ගණයේ ටෙලිනාට්යයක්. ‘සිත නිදි නෑ’ සඳහා එකඟ වීම ශිල්පියෙක් ලෙස මා කළ හොඳම තෝරාගැනීමක්. ක්ෂේත්රය තුළ රැඳී සිටීමට, ඇතැම් විට විචාරකයන් අවර ගණයේ යැයි කියන නිර්මාණවලට වුණත් අපට සම්බන්ධ වෙන්න සිද්ධ වෙනවා. කොහොම වුණත් මේ නාට්යයේදී මට ලැබුණු ‘සාගර‘ගේ චරිතය රචකයා හරි ලස්සනට ගොඩනඟලා තිබුණා.
සෑම මනුෂ්යයකුම වගේ මමත් ප්රේමය ලබන්නට, ප්රේම කරන්නට, විඳින්නට සහ ප්රේමය ගැන කතාකරන්නට කැමැති කෙනෙක්. ප්රේමය තුළ ඇතිවන බිඳවැටීම්, හිත් රිදීම් වැනි දේවල් මම දකින්නේ ඉතාම සාමාන්ය දේවල් විදියට. දේවල් වෙනස් වන නිසාම තමයි එය පවතින්නේ. ඉතින් මම ප්රේමය දකින්නේ එහෙමයි.
රංගන ජීවිතයේ අනුරාධ, ඔබ මුහුණ දුන් අභියෝග ගැන දැනගන්නත් කැමතියි?
මම හිතන්නේ රංගන ක්ෂේත්රයට පැමිණීම, පැවැත්ම සහ ස්ථාවර වීමම විශාල අභියෝගයක්. විශාලතම අභියෝගය වන්නේ ආර්ථික ස්ථාවරත්වයයි. ජීවිතයේ අනෙක් ආර්ථික අරමුණු එක්ක කෙනෙක් මේ ක්ෂේත්රයට එනවා නම්, එය හොඳ නැහැ. මම පුද්ගලිකව ආර්ථික ස්ථාවරත්වය සම්පූර්ණයෙන්ම අත්හැරලා ‘රංගන ශිල්පියෙක් විය යුතුයි‘ යන හැඟීම මත පමණක් මේ ක්ෂේත්රයට ආපු කෙනෙක්. ඊළඟට, මේ ක්ෂේත්රය සාමාන්ය ක්ෂේත්රයක් වුවත්, වෙනත් ක්ෂේත්රවලට වඩා කුහකකම්, කෙනෙහිලිකම් සහ අභියෝග මෙහි වැඩියි. මේ සියලු දේ සමග උපේක්ෂාවෙන් කටයුතු නොකළහොත් ක්ෂේත්රයේ රැඳී ඉන්න අපිට බැරි වෙනවා. වෘත්තීය රංගන ශිල්පියකු විදියට මට ස්ථිර ආදායමක් නෑනේ, ඉතින් මගේ ගිණුමේ කොපමණ මුදල් තිබුණත් බැංකුවක් මට ණය මුදලක් දෙන්නේ නැහැ. එහෙම අභියෝගාත්මක ජීවිතයක් ගත කරන්න කැමති නම් විතරක් මේ කලාවට එන්න. මේ ක්ෂේත්රය කියන්නේම අභියෝගයක්.
අලුතෙන් රංගන ක්ෂේත්රයට එන්න ආසාවෙන් ඉන්න අලුත් පරම්පරාවට අනුරාධට දෙන්න තියෙන උපදෙස මොන වගේද?
අලුත් පරම්පරාව මේ ක්ෂේත්රයට එනවා නම්, පළමුව මේ ක්ෂේත්රයේ යථාර්ථය සහ හැසිරීම පිළිබඳ ප්රාමාණික අවබෝධයක් ඇති කරගෙන එන්න. ටීවී එකේ දකින දේ විතරක් බලලා පුදුම වෙන්න මෙහාට එන්න එපා.සියලු දේ හරියට දැනගෙන, දැනුවත් වෙලා ඇවිත්, තම ශිල්පීය දක්ෂතාවයෙන් සමාජයට යහපත් දෙයක් කරන්න කියන එක තමයි මගේ අදහස.
කතාබහ අවසන් කරමු අනුරාධ, ඔබේ ඉදිරි වැඩකටයුතු ගැනත් කියලාම?
“ඉදිරි කාලය තුළ වැඩ කටයුතු කිහිපයක් සැලසුම් වෙලා තිබෙනවා. ප්රධාන වශයෙන්, ලබන වසර මැද භාගයේදී වේදිකාගත වීමට නියමිත නව වේදිකා නාට්යයකට ආරාධනා ලැබී තිබෙනවා. ඒ වගේම, මේ වසර තුළදී එක් සිනමා පටයකට සම්බන්ධ වීමට නියමිතයි. ටෙලිනාට්ය කීපයක වැඩ අවසන් කරලා තියෙනවා සහ ඒවා ඉදිරියේදී තිරගත වීමට නියමිතයි. වේදිකාව සම්බන්ධයෙන් කතා කළොත්, මම සම්බන්ධ වන රාජිත දිසානායකගේ නව නාට්යයකට අමතරව, දැනට ධර්මප්රිය ඩයස්ගේ නාට්ය කීපයක් සහ ‘ගුරු ගීතය‘ වැනි නාට්ය කිහිපයක්ම මේ වෙද්දි වේදිකාගත වෙමින් පවතිනවා. ඉදිරි කාලය මෙම නිර්මාණ කටයුතු සමග කාර්යබහුල වෙලා තමයි තියෙන්නේ.
හිරුෂිකා ධනංජලී
