සිනමාවෙත් පුංචි තිරයෙත් කැපීපෙනෙන තවත් සුන්දර මිනිසෙක් ගැනයි මේ කතාබහ. ඔහු දිනෙත් ද සිල්වා. ඔහු ගැන අමුතුවෙන් කියන්න අවශ්ය නැති තරම්. හැබැයි දිනෙත් ගනයට අමතරව මේ දවස්වල මහපොළොවට ආදරය කරන සුන්දර මිනිසෙක් බවටත් පත්වෙලා. අපි ඔහුගෙන්ම ඒ ගැන අහමු.Sri Lanka Latest News
දිනෙත් මේ දවස්වල කොහොමද ඔබේ කලා කටයුතු?
පොඩි පොඩි වැඩ කටයුතු ටිකක් කරගෙන යනවා.
ඒ වැඩකටයුතු ගැන දැන්ම කියන්න කැමැති නැද්ද?
අපෝ එහෙම දෙයක් නැහැ. ‘වන්ස් උපොන් අ ටයිම් ගල්කිස්ස ටෙලිනාට්යයට සම්බන්ධ වෙලා ඉන්නවා. ඒකෙ විලන් චරිතයක් තමයි රඟපාන්නේ. එයට අමතරව තව අලුත් චිත්රපටයකට සම්බන්ධ වෙන්න ආරාධනාවක් ලැබුණා. ඔය වැඩකටයුතු සමග තමයි කාලය ගතකරන්නේ.
පොඩි වැඩ වුණාට හැබැයි ඉතින් ගහන ගේම ලොකුයි කියලා අපි දන්නවා?
ඔව් ඉතින් සියලු වැඩකටයුතු ඉවර කරලා තිරයේ දකින්නේ කරපු සුපිරි වැඩේ තමයි. ‘දේවි කුසුමාසන’ චිත්රපටය
ගැන කතා කළොත්?
දින සියය පසුකරමින් සාර්ථකව ‘දේවි කුසුමාසන’ චිත්රපටය තිරගත වෙනවා මේ දවස්වල. දොන් පිලිප් ලෙස තමයි මම එහි රඟපාන්නේ. මගේ නංගි ලෙස උදාරි වර්ණකුලසූරිය රඟපානවා. වර්තමානයේ සිනමාව තුළ නැවුම් පිබිදීමක් පේන්න තියෙනවා. සිනමා රංගන ශිල්පියෙක් ලෙස මම එය දකින්නේ සුබවාදී විදියට.
ඒ ගැන තව ටිකක් පැහැදිලි කළොත්?
පසුගිය කාලේ රටේ ආර්ථික පසුබෑම් මත සියල්ලම කඩාවැටීමක්
අපි කාටත් දැකගන්න ලැබුණා. අපිත් එයට මුහුණ දුන්නා කොවිඩ් වසංගතය, පාස්කු ප්රහාරය වගේ දේවල් එක්ක. ඒ කාලයේ නිෂ්පාදකවරුන් පවා නිර්මාණ කිරීමට මැළි වුණා. හැබැයි ඒ සියල්ලම ගිලිහී ගිහින් සිනමාව තුළ දැන් හොඳ ප්රේක්ෂකාගාරයක් නිර්මාණය වෙලා තියෙනවා. ඒ ගැන රංගන ශිල්පියෙක් වශයෙන් සතුටු වෙනවා. අපිටත් දැන් අලුත් කාලයක් උදාවෙලා තියෙනවා.
අතීතයේ විජය-මාලනී යුගය වගේ සිනමාවට ඉතා යහපත් යුගයක් වර්තමානයෙත් ඇතිවෙන බව පේන්න තියෙනවා නේද?
ඔව්. මම කලින් කියපු ප්රශ්න සිනමාවට තදින්ම බලපෑවා. දැන් සිනමාවේ දැවැන්ත වීරයෝ බිහිවෙලා ඉන්නවා. මම හිතනවා නුදුරේදීම අපේ සිනමාවට ලස්සන යුගයක් බිහිවේවි කියලා.
දිනෙත් – උදාරි යුගයක් වගේ එකක්ද?
සිනමාවේ නව පරපුරේ දක්ෂ ශිල්පීන් රැසක් සමග මම රඟපෑවා. විටෙක සහෝදරයා, තවත් විටෙක පෙම්වතා, එහෙමත් නැත්නම් මැරයෙක් වුණා. ඔය සියල්ලටම මම ජීවය දුන්නා. උදාරි සමග මම ශ්රී සිද්ධා, දේවි කුසුමාසන චිත්රපටවල රඟපෑවා. ඒ විතරක් නෙවෙයි ඇය සමග සංසාරාරණ්ය අසබඩ ටෙලිනාට්යයෙත් ප්රධාන චරිතය රඟපෑවා. සිනමාවට ඇය ආලෝකයක්. සමහර විට හේමාල්-උදාරි යුගයක් දකින්නත් පුළුවන්. හේමාල් මගේ හොඳම සහෝදරයෙක් වගේ. පසුගියදා ඔහුව ඇගයීමට ලක්වුණා. ඒ ගැන මට තියෙන්නේ නිහතමානී සතුටක්.
දිනෙත් සිනමාවට, පුංචි තිරයට ආදරය කරනවා වගේම මහපොළොවත් එක්කත් මේ දවස්වල ගැටෙනවා නේද?
ඔව්, මහපොළොව අපි හැමෝගෙම හදවත. අපි මුලින්ම එයට ආදරය කළ යුතුයි. මගෙ ඉඩමක් තියෙනවා දඹුල්ලේ. මේ දවස්වල ඉතින් මම ගොවිතැන් කටයුතු කරගෙන යනවා. මහපොළොව සමග ඔට්ටු වෙලා ඒ ලබන ආත්ම තෘප්තිය වෙනයි. ගතට සිටත සුවයි.
වසන්ත විතාරණගේ
