දින 20ක් තිස්සේ රහස් පොලිසිය සමග හැංගිමුත්තන් කළ, දුටුතැන අල්ලන්න වරෙන්තු ලබා සිටි හිටපු පොලිස්පති දේශබන්දු තෙන්නකෝන් මහතා සුඛෝපභෝගී බෙන්ස් රථයකින් මාතර අධිකරණයට භාරවීමට පැමිණෙන තුරු අතරමගදී පොලිසියට හෝ බුද්ධි අංශවල ඇස් යොමු නොවීම පිළිබඳ ආරක්ෂක ප්රධානීන්ගේ විශේෂ අවධානයට ලක්වී ඇති බව ආරක්ෂක අංශ භාර උසස් නිලධාරියකු ‘මව්රට’ට පැවැසීය.Sri Lanka Latest News
මාතර අධිකරණයට භාරවීමට පෙර අපේක්ෂිත ඇප ඉල්ලා ඉදිරිපත් කර තිබූ ඉල්ලුම්පතද ප්රතික්ෂේප වීමෙන් පසු මාතර අධිකරණයට නීතිඥයන් තිහකට අධික පිරිසක් පිරිවරාගෙන පැමිණි හිටපු පොලිස්පතිවරයා එදින පැවැති නඩු විභාගයෙන් පසු පසුගිය බදාදා දක්වා රක්ෂිත බන්ධනාගාරගත කරන ලදී.
ඒ අනුව, අඟුණකොලපැලැස්ස අධිආරක්ෂිත බන්ධනාගාරය වෙත රැගෙන ගිය හිටපු පොලිස්පතිවරයා එම බන්ධනාගාරයේ විශේෂ ආරක්ෂිත ‘වයි’ මැදිරියේ රඳවා තබන ලද බව එම බන්ධනාගාරයේ උසස් නිලධාරියකු පැවැසීය. ඒ වනවිට එහි විශේෂිත රැකවරණ මත සැකකටයුතු රැඳවියන් 1,300ක් පමණ රඳවා සිටින බවද ඔහු පැවැසීය.
හිටපු පොලිස්පති දේශබන්දු තෙන්නකෝන් මහතාට අයත් හෝකන්දර නිවස රහස් පොලිසිය විසින් හදිසි පරීක්ෂාවට ලක්කර විස්කි බෝතල් ඇතුළු විදේශීය මත්පැන් බෝතල් දහසකට අධික සංඛ්යාවක් සහ රංගම දුරකතන දෙකක් සහ රාජකාරි පිස්තෝලයද, ඇඳුම් අතර සඟවා තිබී සොයාගැනීමෙන් පසු වැදගත් තොරතුරු රැසක් හෙළිවෙමින් තිබෙන බව රහස් පොලිස් ආරංචි මාර්ග පැවැසීය.
අදාළ නිවසේ තිබී හමුවූ ජංගම දුරකතනවලින් හුවමාරු වී ඇති දුරකතන සබඳතාවලින් ඔහුට මෙතෙක් රැකවරණ ලබාදුන් දේශපාලනඥයන් ඇතුළු ප්රබලයන් කවුරුන්ද යන්න හෙළිකර ගැනීමට හැකිවනු ඇතැයි ආරක්ෂක අංශ භාර උසස් නිලධාරියකු පැවැසීය.
නිල නොවන මට්ටමින් ඔහුට අයත්ව තිබූ බව කියන නිවාස අටක් පිළිබඳවද රහස් පොලිසිය තොරතුරු හෙළිකරගෙන තිබේ.
හිටපු පොලිස්පති නිවසේ තිබී සොයාගත් විදේශ මත්පැන් බෝතල් තොගය ඔහුට ත්යාග වශයෙන් ඇතැම් පොලිස් නිලධාරීන් විසින් ගෙන ආ සන්තෝසම්ද, නැතහොත් ඔහු ප්රභූන්ට සැලකීමට ගොඩගසාගෙන තිබූ ඒවාද යන්න ගැනද රහස් පොලිසිය පරීක්ෂණ පවත්වයි.
පසුගිය බදාදා (19) රක්ෂිත බන්ධනාගාරය වෙත රැගෙන ගිය තෙන්නකෝන් මහතා යළි මාතර අධිකරණයට රැනෙ ආවේ 20 වැනිදා උදේ වරුවේය.
එදින, ඔහු යළි අප්රේල් මස 03 වැනිදා දක්වා රක්ෂිත බන්ධනාගාරගත කරනු ලැබීය.
ප්රේමලාල් විජේරත්න
