හිත් හොරාගත් හැඩකාරී අපර්ණා

දවසින් දවස කලාවට අලුත් තරු බිහිවන කාලවකවානුවක කලා ක්‍ෂේත්‍රයේ විවිධ නිර්මාණ හරහා චරිත මවමින් ජනාදරයට පත් අපර්ණා ඔබට මතක ඇති. අපර්ණා නමින් ජනප්‍රිය වුණු ඇය සංදීපා සෙව්මිණි. කලාවෙන් සමුගෙන වසර ගණනාවක් වුණත් ඇය අප කාටත් අමතක කළ නොහැකිය. ඒ තරමට ඔබ අප අපර්ණාට ආදරය කළ නිසා. ඉතින් ඒ සියලු කරුණු කාරණා සමඟ ඇය ගැන සොයා බලන්න අපි හිතුවා. ඇය මාධ්‍යයට පවා කතා කිරීමට අකමැති වුණු කාලවකවානුවක අපගේ ඉල්ලීම සලකා බලා ඉතා සුහදව ඇයගේ මතකය නැවත අවදි කළේ මේ විදියටයි.
පුංචි තිරයේ, රිදී තිරයේ ඔබ නැතුවම බැරි හැඩකාරියක් වුණා ඔබට මතක ඇති. ඒත් ඒ හැඩකාරි කෝ දැන්?
ටෙලිනාට්‍ය, චිත්‍රපට සෑහෙන ප්‍රමාණයකින් මට ආරාධනා කළා. ඒත් මම ඒ කිසිම නිර්මාණයකට සම්බන්ධ වුණේ නැහැ. කලාවෙන් සමුගෙන අවුරුදු පහළොවක් විතර වෙනවා දැනට. මම කලාවෙන් ඉවත් වුණේ නැවැත සම්බන්ධ වෙන්න නොවේ.
ඉණිමඟ මුදුනට නැඟලා පයින් ගහන එක හරි නැහැ නේද?
මම දායක වුණු හැම නිර්මාණයටම මට කළ හැකි උපරිම සාධාරණයක් වගේ ඉෂ්ට කළා. ඒ හැම සාධාරණයකටම ඇගැයීමට ලක්වුණා. අදටත් ඔයාලා වුණත් මම ගැන හොයා බලන්නේ මම මේ ක්‍ෂේත්‍රයට කළ වටිනාකම නිසා. එය ගැන මම හදවතින්ම සතුටු වෙනවා.
ඔබේ කලා ජීවිතයේ පටන්ගැන්ම ගැන කතා කළොත්?
98 වර්ෂයේ කොළොම්තොට ‘බක්මහ උළෙලේ’ අවුරුදු කුමරිය වුණේ මම. ඉතින් ඒ ජයග්‍රහණයත් එක්ක රූපවාහිනී වෙළෙඳ දැන්වීම් සහ පුවත්පත් මුල් කවරයට පෙනී සිටියා. ඉන්පසුව තමයි නිර්මාණවලින් ආරාධනා ගලාගෙන ආවේ.
ඔබ මුලින්ම සිනමා නිළියක් වුණු හැටි මතකද?
මොකද නැත්තේ. රෝයි ද සිල්වා අධ්‍යක්‍ෂණය කළ ‘රෑ දනියෙල් දවල් මිගෙල්’ චිත්‍රපටයට තමයි මුලින්ම සම්බන්ධ වුණේ. ඉන්පසු නෝනාවරුණි මහත්වරුණි, වරිච්චි බිත්ති, සසර සඳ ටෙලිනාට්‍යයේ රංගනය වෙනුවෙන් 2004 සුමති සම්මාන උළෙලේ කුසලතා සම්මානයද හිමි වුණා. ඒ විතරක් නෙවේ ‘සුදු කළුවර’ චිත්‍රපටයේ රංගනය වෙනුවෙන් සරසවි සම්මාන උළෙලේ කුසලතා සම්මාන ලැබුණා.
හැබැයි ගොඩ දෙනෙක් ඔබව දැන හඳුන ගත්තේ අපර්ණ විදිහට?
මගේ රංගන ජීවිතයේ හැරවුම් ලක්‍ෂ්‍යයක් කිව්වොත් හරි. අපර්ණා මගේ ජීවිතයට වාසනාව ගෙනාවා. දෙස්-විදෙස් ප්‍රේක්‍ෂක ආදරය නිරන්තරයෙන් ලැබුණා. අදටත් මාව දැන හඳුනන්නේ අපර්ණා විදියට තමයි. අපර්ණා කියලා අදටත් කතා කරන පිරිසක් ඉන්නවා.
ඔබේ සමකාලීන මිතුරු මිතුරියන් මොනවගේ ප්‍රතිචාරයක්ද දක්වන්නේ?
කලා ක්‍ෂේත්‍රයේ මගේ හිතවතුන් මගතොට හමුවන මගේ ආදරණීය ප්‍රේක්‍ෂකයන් මට නිතර දෙවෙලේ කියන්නේ නැවැත රඟපාන්න කියලයි. ඒත් මගේ කිසිම කැමැත්තක් නැහැ නැවැත රඟපාන්න.
මේ තරම් මේ ක්‍ෂේත්‍රය එපා වීමට විශේෂ හේතුවක් බලපාන්න ඇති?
එහෙම විශේෂ හේතුවක් නැහැ. මම හැමෝම සමඟ සුහදව ඉතා සතුටින් වැඩකටයුතු කළා. කිසිම කෙනෙක් සමඟ ප්‍රශ්නයක් නැහැ. හැමෝම ආදරෙයි මට. නමුත් මගේ විවාහයෙන් පස්සේ මම හිතුවා කලාවෙන් ඉවත් වුණා නම් හොඳයි කියලා. ඒ තීරණය මත තමයි මම කටයුතු කළේ.
අද කලාව දකින තැන ගැන මොකද හිතෙන්නේ?
එහෙම නිර්මාණ ගැන අදහස් දක්වන්න මම විචාරකයෙක් නෙවේ. නමුත් දැන් දකින සමහර නිර්මාණවල දෙබස්, රංගන දකිද්දී හිනා යනවා. හොඳ දක්‍ෂ රංගන ශිල්පීන් පවා බාල බොළඳ නිර්මාණවලට හසුවෙලා. එය කනගාටුදායක අවස්ථාවක් විදියටයි මට හිතෙන්නේ.
පසුගිය කාලේ අපර්ණා නමින් රූපලාවණ්‍ය ඔබේම කියලා ව්‍යාපාරයක් ආරම්භ කළා. කොහොමද එහි වැඩකටයුතු?
අපර්ණා මගේ ජීවිතයට වාසනාව ගෙනපු නිසා මම ඒ නමින් මගේ ව්‍යාපාරයක් ආරම්භ කළා. ඒත් මේ දවස්වල එහි වැඩකටයුතු අතරමග නතර වෙලා තියෙන්නේ. දරුවන්ගේ අධ්‍යාපන කටයුතු නිසා එය වෙනුවෙන් මගේ උපරිම කාලය යොදවනවා.
ඔබේ පෞද්ගලික විස්තර ගැන කතා කළොත්?
මගේ ගම්පළාත කොටිකාවත්තේ. මට දුවෙකුයි, පුතෙකුයි ඉන්නවා. මගේ සැමියා නියෝජ්‍ය පොලිස් ස්ථානාධිපතිවරයකු ලෙසට දැනට කටයුතු කරනවා. ඉතින් සියලුම දෙනාට උදවුවෙමින් වැඩකටයුතු කරගෙන ගෙදරට වෙලා ඉන්නවා.
වසන්ත විතාරණගේ