රනිල් වික්රමසිංහ ලංකාවේ දේශපාලනයේ නොමැකෙන සලකුණක්. ඇත්තටම ඔහු පුරාවෘත්තයක්. කාලයක් තිස්සේ ලංකාවේ දේශපාලනයේ ඉහළ තනතුරු හොබවපු කෙනෙක්. අවසාන වශයෙන් විශ්රාම යන්නේ ජනාධිපතිවරයා විදියට. ඒ නිසා ඔහුගේ දේශපාලන ගමන කෙළවර වෙන්නේ ජයග්රහණයකින්. නමුත් ඔහු මේ දේශපාලන ගමනෙදී පසුකර ආ සැමරුම් සහ ඔහු ගිය ගමන් මග හරිද, සාර්ථකද කියන එක ගැන ලංකාවේ මිනිස්සුන්ට ප්රශ්නයක් තියෙනවා. රනිල් කියලා කියන්නේ කිසිදු අවස්ථාවක ජනාධිපතිවරණ ජයග්රහණයක් ලබාගන්න පුළුවන් වෙච්ච කෙනෙක් නෙවෙයි. රනිල් හැම වෙලාවෙම ජනාධිපතිවරණ තුනකට ඉදිරිපත් වෙලා පරාජයට පත්වුණා. ඒ වගේම රනිල්ගේ නායකත්වය යටතේ එක්සත් ජාතික පක්ෂයට විශාල දේශපාලන ජයග්රහණ ලැබුණේ නැහැ. නමුත් රනිල් හැකි උපරිමයෙන්ම තමන්ගේ දේශපාලන ගමන තමන්ට වාසි වෙන විදියට පවත්වාගෙන ගිය කෙනෙක් විදියටයි පේන්නේ. හැබැයි ඔහු රටට වාසිදායක සහ සුබදායක යම් යම් තීරණ ගත්තා. ඒවා ආන්දෝලනාත්මක තීරණ බවට පත්වුණා. (Sri Lanka Latest News)
අපිට කිසි ප්රශ්නයක් නැහැ රනිල් වික්රමසිංහත් එක්ක. හැබැයි රනිල් වික්රමසිංහ අන්තිමට ගෙදර යන්නේ එජාපය ඉවරෙටම ඉවර කරලා.
රනිල් පක්ෂ ගානක් කඩමින් විවිධ ව්යාපෘතිවලින් සටකපට දේශපාලනයක් කරපු බවට චෝදනා තියෙනවා. ඒ චෝදනා අතර ඉහළම චෝදනාව බවට පත්වෙන්නේ මේ මොහොතේ අපිට ඇස් පනාපිට පේන එජාපයේ විනාශය. එක්සත් ජාතික පක්ෂය කියන පක්ෂය නන්නත්තාර වෙලා, විනාශ වෙලා, කටඋත්තර නැතිවෙන තැනට පත්කරලා තමයි රනිල් වික්රමසිංහ ගෙදර යන්නේ. මෙවර මහ මැතිවරණයට එක්සත් ජාතික පක්ෂය තරග කරන්නේ යම් යම් ආසනවලට විතරයි. එක්සත් ජාතික පක්ෂය තරග කරපු ආසනවලින් ඔවුන් ආසන දිනාගන්නවා. නමුත් එක්සත් ජාතික පක්ෂයේ සලකුණ නැතිව ඔවුන් තරග කරන්නේ ගෑස් සිලින්ඩරයෙන්. නමුත් අවාසනාවකට මේ ගෑස් සිලින්ඩරයෙන් තරග කරන අය අතර එක්සත් ජාතික පාක්ෂිකයෝ පරාජයට පත්වෙලා ඒ වෙනුවට ජයග්රහණය කරන්නේ වෙනත් අය. අනුරාධ, චාමර සම්පත්, ඉන් පස්සේ කළුතරින් රෝහිත. මේ සියලු දෙනාම දේශපාලනික වශයෙන් ජයග්රහණ ලැබුවට ඔවුන් එක්සත් ජාතික පාක්ෂිකයෝ නෙවෙයි.
සිරිකොතේ අලියා වෙනුවට ගෑස් සිලින්ඩරය එල්ලලා මේගොල්ලෝ කරන්න හදපු දේශපාලන ජයග්රහණය දේශපාලනික පරාජයකින් තමයි කෙළවර වෙන්නේ. එක්සත් ජාතික පක්ෂයට මේ වෙලාවේ තමන්ගේ අලියව පැත්තකට දාලා ගෑස් සිලින්ඩරය සිරිකොතේ අලවගන්න තැනට පත්කරලා තමයි රනිල් වික්රමසිංහ ගෙදර යන්නේ. මේක ජයග්රහණයට වඩා පරාජයක් විදියටයි අපිට පේන්න තියෙන්නේ. මෙවැනි පරාජයන්ගෙන් සැදුම්ලත් දේශපාලන ගමනක් තමයි රනිල්ට තියෙන්නේ. රනිල් 2001දී ජයග්රහණය කරනවා. ඒ ජයග්රහණය කළේත් ජී.එල්., එස්.බී. ඇතුළු 17 දෙනෙක් චන්ද්රිකාගේ ආණ්ඩුවෙන් එළියට බැහැලා විපක්ෂයට ආපු නිසා. නමුත් 2001 ජයග්රහණය කරලා නැවත 2004 පරාජයට පත්වෙනවා. 2005දී මහින්දත් එක්ක තරග කරලා එවරත් ඔහුට ජනාධිපතිවරණය පරාජයට පත්වෙන්න සිදුවෙනවා. ඒ පරාජය නම් එල්.ටී.ටී.ඊ. සංවිධානය නිසා වුණා කියලා කියන්න පුළුවන්. කොහොම වුණත් ඉන් පස්සේ ඔහු බය වෙනවා මේ සටනට එන්න. ඔහු වෙන වෙන අයව දාලා ගේම ගහන බව තමයි අපිට පේන්න තිබුණේ.
මේ වෙලාවේ අපි දැක්කා ලංකාවේ දේශපාලන ගමනෙදී සරත් ෆොන්සේකා, රනිල් වෙනුවට ඉදිරිපත් වුණා. රනිල් සරත් ෆොන්සේකාට මුවාවෙලා සටනට එනවා. ඊට පස්සේ මෛත්රීපාල සිරිසේනව කොහෙන්දෝ හොයාගන්නවා. මෛත්රීපාල සිරිසේන අනෙක් පැත්තට රනිල්ටම වළ කපනවා. මෛත්රීපාල ව අරගෙන ආපු වැඩේ පැත්තකට දාලා ඔහුගෙන් හොඳ පරිප්පුවක් කන්න සිද්ධ වෙනවා රනිල්ට. දවස් 51 මෝඩ දේශපාලන ව්යාපෘතියට මූණ දෙන්න සිද්ධ වෙනවා. මේ වගේ ප්රශ්න ගොඩකට මූණ දෙමින් දේශපාලන ගමනක් තමයි රනිල් වික්රමසිංහට අන්තිමට උරුම වෙන්නේ. ගෝඨාභය රාජපක්ෂ මේක දාලා පැනලා ගියාට පස්සේ තමයි ඔහුට අවස්ථාව ලැබෙන්නේ ජයග්රහණය කරන්න. මේ ගේම් එක ගහගන්න. ඊට පස්සේ තමයි ඔහු අනුප්රාප්තිකයෙක් විදියට කිසිදා ජනාධිපතිවරණයකින් ජයග්රහණය නොලද පුද්ගලයෙක් විදියට ජනාධිපති ධුරයේ දිවුරුම් දෙන්නේ. ඒක අභිමානනීය ජනාධිපතිවරණ ජයග්රහණයක් නෙවෙයි. ඔහුට ජනාධිපතිවරණයකට ඉදිරිපත් වෙලා ජය ගන්න බැරි බව අවබෝධ කරගෙන දෝ තමයි රනිල් වික්රමසිංහ මේ වෙලාවේ මේ විදියේ මුහුණුවරකින් දේශපාලන සටනට එන්නේ.
කොහොම නමුත් රනිල් වික්රමසිංහ විශ්රාම යන්නේ ජනාධිපතිවරයෙක් විදියට. ඒ නිසා ඔහුගේ දේශපාලන බලාපොරොත්තු ඉෂ්ට වෙන්න ඇති. හැබැයි ඔහු අවසාන වශයෙන් අලියා යටතේ එක ජාතික ලැයිස්තු ආසනයක් විතරක් හිමිකරගන්න තැනට පත්වෙනවා. ඉන් පස්සේ අලියා මේ සටහනෙන් මැකිලා යනවා. ඒ දේශපාලන ගමන නිමාවෙනවා. ලංකාවේ ලොකුම දේශපාලන පක්ෂය, ලංකාවේ ලොකුම ඉතිහාසයක් තියෙන දේශපාලන පක්ෂය, ලංකාවේ වැඩිම දේශපාලන ගමනක් ගිය පක්ෂය අවසන් ගමන් යනවා යැයි අපට පේන්න තියෙනවා. ඉතින් කනගාටුදායකයි මෙවැනි තත්ත්වයක් රට ඇතුළේ නිර්මාණය වීම. රනිල් වික්රමසිංහ තමන්ගේ දේශපාලන ගමන, තමන්ගේ දේශපාලන අභිමතාර්ථය, තමන්ගේ දේශපාලන සිහිනය ඉෂ්ට කරගන්නා අතරේ අලියට සිද්ධ වෙනවා ආයෙත් පරණ කැලෑව ඇතුළටම ගිහිල්ලා හැංගිලා ඉන්න. ඒ වෙනුවට අලුත් දේශපාලන ව්යාපෘති ජයග්රහණය කරනවා. ඉතින් අපිට කියන්න තියෙන්නේ කනගාටුයි කියලා තමයි.
එජාපය විතරක් නෙවෙයි. රනිල් අනෙක් හැමෝගෙම දේශපාලනයත් විනාශ කළා. තමන් එක්ක එකට දේශපාලනය පටන්ගත්ත කිසිම කෙනෙක් අද රනිල් එක්ක නෑ. ඒ හැමෝම රනිල් අතහැරලා වෙනත් පිල්වලට ගිහිල්ලා. ඒ වගේම රනිල් ශ්රී ලංකා නිදහස් පක්ෂයත් විනාශ කළා. තමන්ට ජනාධිපතිකම අරගෙන දීපු පොහොට්ටුවත් දෙකට තුනට කඩලා විනාශ කළා. රාජපක්ෂලාව නන්නත්තාර කළා. අන්තිමේදී සිලින්ඩරෙත් විනාශ කළා. ඒ විදියට බලද්දී රනිල් කියන්නේ මේ දේශපාලනයේ ටර්මිනේටර් කෙනෙක්. එහෙමත් නැත්නම් විනාශකාරයෙක්.
හැබැයි අද මේ ටර්මිනේටර්ගෙන් බේරිලා ඉන්නේ සජිත් හා සජබය විතරයි. මේ සුනාමිය මැද්දේ මන්ත්රීවරු 40ක් අරගෙන බේරිලා ඉන්නේ සජිත් විතරයි.
ජීවන පහන් තිළිණ
