DFCC බැංකුවෙන් විශේෂ තැන්පතු ගිණුමක්

කොවිඞ්-19 වසංගත තත්ත්වය නිසා මේ වන විට ලොවපුරා ආර්ථිකයන් විශාල අර්බුදකාරී තත්ත්වයකට පත් වී තිබේ. මෙම තත්ත්වය හමුවේ ශ්‍රී ලංකා රජයද තම පුරවැසියන්ගේ ආරක්ෂාව හා යහපැවැත්ම තහවුරු කිරීම සඳහා දැඩි උත්සාහයක් ගනිමින් සිටී. එම උත්සාහයේ එක් පියවරක් ලෙස රජය, ශ්‍රී ලංකා මහ බැංකුවේ මුදල් මණ්ඩලයේ මගපෙන්වීම අනුව 2020 අප්‍රේල් මාසයේදී විශේෂ තැන්පතු ගිණුම් ක්‍රමයක් හඳුන්වා දීමට කටයුතු කළේය. පවතින ගෝලීය වසංගත තත්ත්වය මගින් රටට ඇතිවන බලපෑම අවම කරගැනීම මෙහි අරමුණ වේ.

2017 අංක 12 දරන විදේශ මුදල් හුවමාරු පනත පදනම් කරගෙන නව විශේෂ තැන්පතු ගිණුම සඳහා සුදුසුකම් නියම කර ඇත. මේ සඳහා නිකුත් කරන ලද ගැසට් නිවේදනයේ මෙසේ දැක්වේ : “ශ්‍රී ලංකාවේ හෝ විදෙස් රටක ජීවත්වෙන ඕනෑම ශ්‍රී ලාංකික පුද්ගලයෙකු, ද්විත්ව පුරවැසිභාවය ලබාගත් අයෙකු, ශ්‍රී ලාංකීය සම්භවයක් ඇති වෙනත් රටවල පුරවැසියකු හෝ විදේශිකයෙකු, ශ්‍රී ලංකාවෙන් පිටත සංස්ථාපිත/ලියාපදිංචි කළ අරමුදල්, සංස්ථාපිත මණ්ඩල, සංගම් සහ ශ්‍රී ලංකාවේ සුබසිද්ධිය පතන වෙනත් පාර්ශ්ව, මෙම නියෝගයෙහි දිනයේ සිට මාස හයක කාලයක් තුළ තමන් වෙනුවෙන් බැංකු පද්ධතිය හරහා විදේශයන්ගෙන් ලද අභ්‍යන්තර ප්‍රේෂණවලින් (inward remittances), නම් කරන ලද විදේශ ව්‍යවහාර මුදලින් හෝ ශ්‍රී ලංකා රුපියල්වලින් ‘විශේෂ තැන්පතු ගිණුම’ නම් ගිණුමක් ස්ථාවර තැන්පතු වශයෙන් විවෘත කිරීමට සහ පවත්වාගෙනයාමට මෙමගින් අවසර දෙනු ලැබේ.”