ලකයි – සිකයි නැවතත් එකතු වෙයි?

ඇත්තටම ලකාටයි සිකාටයි මොකද වුණේ? ඒ ගැන පොඞ්ඩක් හොයලා බලන්නයි මේ හදන්නේ.
ලකා එහෙම නැත්නම් ලක්මාල් වීරසිරි සහ සිකා විදියට රඟපෑ දුමින්ද ශ්‍රී ජනකාන්ත දෙන්නම මීට පෙර ලංකාවේ ප්‍රධාන පෙළේ මාධ්‍ය ආයතන කිහිපයකම සේවය කරලා තියෙනවා. එතැනින් පස්සේ ලක්මාල් විසින් වෙළෙඳ දැන්වීම් ප්‍රවර්ධන ආයතනයක් ආරම්භ කරලා තියෙනවා. එහි සේවය සඳහා පසුව දුමින්දත් එකතු වෙලා තියෙනවා. කොහොම හරි ඒ අතරතුරේදී තමයි මේ දෙන්නත් එක්ක ලකයි සිකයි විදියට වැඩ පටන් අරගෙන තියෙන්නේ. ඒ හරහා තමයි මේ දෙන්නම ලංකාව පුරා වේගයෙන් ජනප්‍රිය වෙන්නේ. ඕනම දෙයක් දියුණු වෙද්දී තමයි නැති ප්‍රශ්නත් ඇති වෙන්නේ. ලකා සිකාටත් වෙලා තියෙන්නේ ඒ වගේ දෙයක් කියලයි මේ ප්‍රශ්නය දිහා පිට ඉඳන් බලන අපිට පේන්නේ.
යූටියුබ් නාළිකාව හරහා දෙන්නත් එක්ක එකට වීඩියෝ රඟපෑවට නාළිකාවේ සම්පූර්ණ අයිතිය හිමි වෙන්නේ ලක්මාල්ට. ඒ කියන්නේ ලකාට. ඒක හින්දා මේ දෙන්නා අතර කාලයක ඉඳන් යම් යම් විරසක කම් ඇති වෙලා තියෙනවා. පිටතට නොපෙනුණත් ඒ ගැන ඔවුන්ගේ ළඟම හිතවතුන් දැන ගෙන ඉඳලත් තියෙනවා.

මෙච්චර කල් එකට ඉඳලා වෙන් වෙන්න සිද්ධ වුණු එක ගැන ලක්මාල් වගේම දුමින්දත් තම අදහස් වෙන වෙනම දක්වලා තිබුණා. හැබැයි ඒ දෙන්නම වෙන් වුණු හේතුව ගැන නම් හරියටම කියන්නේ නැහැ.
ඇති වූ ප්‍රශ්නය සම්බන්ධයෙන් ලකා දැක්වුව අදහස තමයි මේ.

“අපේ නාළිකාවේ ලොකු වෙනසක් ඇති වෙලා තියෙන බව දැන් හැමෝම දන්නවා. ගොඩ දෙනෙක් ඒකට කැමැති නැහැ කියලත් අපි දන්නවා. මොකද හැමදාම දැකපු විදියට දිගටම දකින්න තමයි හැමෝම කැමැති. ඇත්තටම ඒ වෙනස අපිටත් දරා ගන්න අමාරුයි. මොකද මෙච්චර කල් බාධකයක් නැතිව ගලා ගෙන ආව විදියට දිගටම යන්න තිබුණ නම් අපිත් ආසයි. නමුත් ලොකු ප්‍රශ්නයක් ඇති වුණා. මේ චැනල් එක දිගටම කරනවද නැත්නම් මේක නවත්වනද කියන එක තීරණය කරන්න අපිට සිද්ධ වුණා. අවසානයේ අපි මේක නවත්වන්නේ නැතිව අපිට පුළුවන් විදියට කරගෙන යන්න තීරණය කළා. මොකද අපේ වීඩියෝ බලන්න මඟ බලන පිරිසක් ඉන්නවා. මේක නවත්වන එක ඒ අයට කරන අසාධාරණයක් කියලා අපිට හිතුණා. ඒ හින්දා අපිට පුළුවන් විදියට මේක කරගෙන යන යුතුකමක් තියෙනවා කියලා අපිට හිතුණා.

ඇත්තටම මේක අපේ පවුලේ ප්‍රශ්නයක්. ගෙදර වෙන දේවල් පිටට කියන්න හොඳ නැහැ. ඒ හින්දා ඒ ගැන මොකුත් අපි කතා කරන්නේ නැහැ. ඒත් මම එක ඉල්ලීමක් කරනවා. මේ සම්බන්ධයෙන් ගොඩ දෙනෙක් අපිට බනිනවා. විශේෂයෙන් මට. ඒකට කිසි ප්‍රශ්නයක් නැහැ. මට ඕනෑ තරම් බනින්න. ඒත් සමහර අය මගේ අහිංසක දරුවන්ටත් ශාප කරනවා. මම වැඳලා කියන්නේ. මේක උන් කවුරුවත් දන්නේ නැහැ. ඒ හින්දා මගේ ළමයින්ව මේකට ගාව ගන්න එපා. මට ඕන තරම් බනින්න.”

ලකා ඒ විදියට මේ ගැන අදහස් දක්වද්දී, සිකා එහෙම නැත්නම් දුමින්ද සිද්ධ වුණු දේ ගැන කියලා තිබුණේ මෙන්න මෙහෙමයි.

“ඇත්තටම මෙහෙම දෙයක් වුණා කියලා මම දැන ගත්තෙත් අප්‍රේල් 14 වැනිදා තමයි. ඒ කියන්නේ ඕගොල්ලෝ දැන ගත්ත දවසෙම තමයි. ඒ වෙලාවේ මොකක්ද වුණේ කියලා මටත් හිතා ගන්න බැරි වුණා. හරියට එක පාරට උඩ ඉඳන් බිමට ඇද වැටුණා වගේ. තාමත් ඇත්තටම මට දැනෙන්නේ ඒ වගේ. මේ හැම දෙයකින්ම ඈත් වෙලා වෙනම ජීවිතයක් පටන් ගන්නවා කියලා මම හිතුවා. ආයේ යූටියුබ් චැනල් එකකට නම් සම්බන්ධ වෙන්නේ නැහැ කියලා හිතුවා. ඒත් අප්‍රේල් 14 වැනිදා ඉඳන් මට කතා කෙරුව බොහෝ දෙනෙක් හින්දා ඒ අදහස වෙනස් වුණා. මේ ලෝකේ මට ආදරය කරන විශාල පිරිසක් ඉන්න බව මට තේරුම් ගියා. ඉතින් ඇයි මම නෑවිත් ඉන්නේ. ඒ හින්දා පරණ විදියටම අලුත් ගමනක් යන්න මම තීරණය කළා. ඒක කවදද කොහොමද කියලා කියන්න තාම මට බැහැ. ඒත් ඉක්මනටම නැවත අපි හම්බ වෙමු.” ඒ තමයි සිකාගේ අදහස.

කොහොම වුණත් මේ දෙන්නගේ විරසකයට හේතුව හරියටම මේකයි කියන්න කාටවත් බැහැ. මොකද දෙන්නගේ හිතවතුන් ඒ ගැන කියන්නේ දෙවිදියකට. මේ දෙන්නම ඒ ගැන කතා කරන්න කැමැති නැති හින්දා අපිට මීට වැඩිය ඒ ගැන හොයන්නත් බැහැ. ඔවුන්ගේ හිතවතුන් කියන දේවල් අපි මෙහි සඳහන් කරන්නෙත් නැහැ.

ඒත් එක දෙයක්. දුමින්ද ඉවත් වෙලා සිකාගේ චරිතයට අලුත් කෙනෙක් ආව දවසේ ඉඳන් ලකාටයි සිකාටයි ආදරය කරපු හැමෝගෙම තිබුණේ එකම ඉල්ලීමක්. ඒ තමයි පරණ සිකා ඕනෙමයි කියන එක. ඒත් ඒ දේ ආයේ වෙන්නේ නැහැ කියන එක නම් ස්ථිරයි. අලුත් සිකා එක්ක ලකා ඉදිරිපත් කෙරුව වීඩියෝ කිහිපයක්ම දැන් අන්තර්ජාලයට එකතු වෙලා. ඒ වීඩියෝත් දැන් ජනප්‍රිය වෙමින් තියෙනවා. ඒ වගේම පැරැණි සිකා අලුත් විදියකට ළඟදීම අපි අතරට එන බව දුමින්ද කියනවා. දෙන්නගේ විරසකයන් කොයි හැටි වුණත්, මේ වෙනස්කම් හරහා ඉස්සරහට මීට වැඩිය හොඳ නිර්මාණ බිහි වෙන්නත් ඉඩ කඩ තියෙනවා.
චන්දන පොන්නම්පෙරුම