සිංහල සිනමාවේ රෝයි – සුමනා සලකුණ

සිංහල සිනමාවේ කැපී පෙනුණු නළු නිළි යුගල ගැන කතා කරන කොට මතකයෙන් ගිලිහී නොයන තවත් යුගලක් ලෙස රෝයි – සුමනා නම් කරන්නට පුළුවන්. කැපී පෙනුණු යොවුන් පෙම් යුවළක් ලෙස හැත්තෑව දශකය මුල පමණ සිට හතර වටේ, මේ දෙඇස කුමටද, ශීලා වගේ චිත්‍රපටවල එක්ව රඟපෑ මෙම දෙදෙනා පෙම් යුවළක් ලෙස වඩාත් ප්‍රේක්‍ෂක ආකර්ෂණය දිනා ගන්නේ 1973 වසරේ තිරයට පැමිණි ජෝ දේව් ආනන්ද්ගේ ‘සුනේත්‍රා’ චිත්‍රපටයෙන් යැයි පවසතොත් එය ඉතාමත් නිවැරැදියි. මීට කලින් තමාගේ ‘ගීතා’ චිත්‍රපටය සඳහා ජානකී කුරුකුලසූරියත්, ඉන්පසු ‘සුජීවා’ චිත්‍රපටය සඳහා කාන්ති ලංකාත් රෝයි ද සිල්වා සමඟ ප්‍රධාන චරිත සඳහා තෝරා ගන්නා ජෝ දේව් තම තෙවැනි චිත්‍රපටය වන ‘සුනේත්‍රා’ චිත්‍රපටයේ පටන් රෝයිගේ ප්‍රධාන නිළිය ලෙස සුමනා අමරසිංහ අඛණ්ඩව තම මීළඟ චිත්‍රපට තුන සඳහා යොදා ගන්නට මැළි වන්නේ නැහැ.

රෝයි – සුමනා යුගය දෙස බලන විට අමතක නොවන වසරක් ලෙස අපට හඳුන්වන්නට පුළුවන් 1975 වසර. මෙම වසරේ තිරගත වූ චිත්‍රපට දෙක බලන විට වසරේ වඩාත් ඉදිරියෙන් සිටි පෙම් යුවළ ලෙස මෙම දෙදෙනා හඳුන්වන්නට පුළුවන්. එම වසරේ දැක ගැනීමට ලැබුණු අනෙකුත් නළු නිළි යුගල අතර ගාමිණී – මාලිනී (ආවා සොයා ආදරේ, සූරයා සූරයාමයි). විජය – මාලිනී (සංගීතා), මාලිනී – තිස්ස (කොහොම කියන්නද? සධානා), ගාමිණී – නීටා (රත්රන් අම්මා, රජගෙදර පරවියෝ), ගාමිණී – ශ්‍රියානි (රත්රන් අම්මා), ගාමිණී – ස්වර්ණා (සිරිල් මල්ලි), තිස්ස – ගීතා (ලස්සන කෙල්ල), ගාමිණී – සෝනියා (හිත හොඳ මිනිහෙක්), විජය – ස්වර්ණා (ලස්සන දවසක්) කැපී පෙනුණු නමුත් වසරේ වැඩිම චිත්‍රපට ගණනක පෙම් යුවළක් ලෙස රෝයි – සුමනා කැපී පෙනුණේ ඔබයි මමයි, සූකිරි කෙල්ල, මගේ නංගි ශ්‍යාමා, රන්වන් රේකා යන චිත්‍රපට හතරේම ප්‍රධාන පෙම් යුවළ ලෙස පෙනී සිටිමින්, ඒ වගේම මෙම චිත්‍රපට හතරම එම වසරේ වඩාත් සාර්ථකව ප්‍රදර්ශනය වූවා යැයි කියන්නට පුළුවන්. කලින් සඳහන් කළ අනෙකුත් ශිල්පීන්ගේ චිත්‍රපටත් සමඟ කරට කර සිටිමින්, මෙම දෙදෙනා පෙනී සිටි ගලගෙදර එම්. හක්ගේ තනුවලට අනුව ජෝති – සුජාතා ගයන ‘අනුරාග ඔටුණු පලන්,’ ‘මධාරා මල් කුමාරි’ (ඔබයි මමයි), සීදේවි ගිම්හාන කාලේ ගියා, (සූකිරි කෙල්ල). පී. එල්. ඒ. සෝමපාලගේ සංගීතයට ජෝතිපාල – ඇන්ජලීන් ගයන ‘කොහේදෝ දුවන්නේ කවුදෝ සොයන්නේ (මගේ නංගී ශ්‍යාමා) වගේ ගීත ජවනිකා අදටත් ප්‍රේක්‍ෂක හදවත් තුළින් මැකී ගොස් නැති බව කිව යුතුයි. මෙම චිත්‍රපට හතර අතරින් ඔබයි මමයි හා සූකිරි කෙල්ල ජෝ දේව් ආනන්ද් අධ්‍යක්‍ෂණය කළ අතර, එම්. එස්. ආනන්දන් මගේ නංගී ශ්‍යාමා චිත්‍රපටය අධ්‍යක්‍ෂණය කළේය. මෙහි ශ්‍යාමාගේ චරිතය ශ්‍යාමා ආනන්ද රඟපෑ නමුත් ඇය එහි පෙම්වතියක නොවෙයි. මේ අනුව මෙහි ප්‍රධාන පෙම්වතියගේ චරිතය රඟපෑවේ සුමනා අමරසිංහයි. ඩී. එම්. දාස් තමයි රන්වන් රේඛා චිත්‍රපටය අධ්‍යක්‍ෂණය කළේ.

මෙම චිත්‍රපට හතර සඳහා තවත් සුවිශේෂී කලාකරුවන් දෙදෙනකු රෝයි හා සුමනා සමඟ සිටි බව මෙහිදී අමතක කළ නොහැකියි. ඒ එච්. ආර්. ජෝතිපාල හා ෆ්‍රෙඩී සිල්වා වන අතර, මෙයින් ජෝති ගායනයෙන් වගේම රංගනයෙනුත් මෙම චිත්‍රපට හතර ආලෝකවත් කළේ ඔබයි මමයි චිත්‍රපටයේ දුෂ්ටයා වශයෙනුත්, සූකිරි කෙල්ල චිත්‍රපටයේ සුමනාගේ අවංක පෙම්වතා ලෙසත් මගේ නංගි ශ්‍යාමා චිත්‍රපටයේ උසස් පොලිස් නිලධාරියා ලෙසත්, රන්වන් රේඛා චිත්‍රපටයේ ප්‍රේමයෙන් මනස අවුල් කරගත් පෙම්වතකු ලෙසත් විවිධ චරිතවලට පණ පොවමින්ය. මීට අමතරව වර්ණ චිත්‍රපට නොතිබූ එම යුගයේ ඔහු සුමනා සමඟ සූකිරි කෙල්ල චිත්‍රපටයේ ‘මනමෝහන ප්‍රිය සාධන’ නම් වර්ණයෙන් රූගැන්වූ ගීත ජවනිකාවේ පෙනී සිටීමත් අමතක කළ නොහැකියි. ඒ වගේම තමයි ෆ්‍රෙඩී සිල්වාත් ඔහුත් තම විකට රංගනයෙන්, ගායනයෙන් මෙම චිත්‍රපට සඳහා ලබාදුන්නේ හොඳ දායකත්වයකි. සූකිරි කෙල්ල චිත්‍රපටයේ සුමනා අමරසිංහ, ගීතා හා සුජී නමින් ද්විත්ව චරිත නිරූපණය කරන විට ඔහුත් එහි ද්විත්ව චරිතයක් නිරූපණය කිරීම අමතක කළ නෙැහැකියි.

මීට අමතරව ගායනයෙන් එච්. ආර්. ජෝතිපාල, අන්ජලීන් ගුණතිලක, සුජාතා අත්තනායක, ලතා වල්පොළ, ධර්මදාස වල්පොළ, මිල්ටන් පෙරේරා 1975 රෝයි – සුමනා ස්වර්ණමය වසර හැඩකළා යැයි පවසන්න පුළුවන්. එමෙන්ම ගලගෙදර හක්, ටී. එෆ්. ලතීෆ්, පී. එල්. ඒ. සෝමපාල, එම්. කේ. රොක්සාමි සංගීතයෙනුත්, කරුණාරත්න අබේසේකර, ධර්මසිරි ගමගේ, ප්‍රේමකීර්ති ද අල්විස් වැනි අයත් මෙම චිත්‍රපටවල එන මධුර ගීත රචනා කරමින් ලබා දුන්නේ විශාල ශක්තියක්. මෙම චිත්‍රපට අතරින් ඔබයි මමයි හා සූකිරි කෙල්ල බොරැල්ලේ රිට්ස් ඇතුළු සිලෝන් තියටර්ස්, දෙවැනි මණ්ඩලයේත් මගේ නංගි ශ්‍යාමා හා රන්වන් රේඛා, මරදානේ එල්ෆින්ස්ටන් ඇතුළු සිලෝන් තියටර්ස් පළමු මණ්ඩලයේ සිනමාහල්වලත් තිරගත වුණා.
අනිල් වීරසිංහ