සබරගමුව විශ්වවිද්‍යාලයේ ආදි විද්‍යාර්ථීන්ගෙන් IDH රෝහලට පරිත්‍යාගයක්

කෝවිඞ් 19 වසංගතයෙන් රට මුදාගැනීම සඳහා වෛද්‍යවරුන් හා සෞඛ්‍ය කාර්ය මණ්ඩල දරන වෑයමට සහයක් වශයෙන්, ශ්‍රී ලංකා සබරගමුව විශ්වවිද්‍යාලයේ ආදි විද්‍යාර්ථීන්ගේ එකමුතුව විසින් රු. 2,00,000කට අධික වටිනාකමින් යුතු වෛද්‍ය උපකරණ හා ද්‍රව්‍ය තොගයක්, පසුගියදා ජාතික බෝවන රෝග විද්‍යායතනය වෙත ලබා දෙන ලදී. වෛද්‍යවරුන් සඳහා අත්‍යවශ්‍ය වෛද්‍ය ආධාර පිරිනැමීම පිණිස, සබරගමුව විශ්ව විද්‍යාලයීය ආදි විද්‍යාර්ථීන්ගේ එකමුතුව මෑතක ආරම්භ කරන ලද වැඩසටහනක එක් පියවරක් වශයෙන් මෙම පරිත්‍යාගය සිදු කෙරිණි.

කෝවිඞ් 19 වසංගත තත්ත්වය නිසා ලොව පුරා වෛද්‍යවරුන් හා සෞඛ්‍ය කාර්ය මණ්ඩල දැඩි අසීරුතාවට පත්ව සිටින අතර, ශ්‍රී ලංකාවේ වෛද්‍යවරුන් හා සෞඛ්‍ය කාර්ය මණ්ඩල ඉතාමත් පරිශ්‍රමයෙන් මෙන්ම දැඩි කැප වීමෙන් එම තත්ත්වය හමුවේ කටයුතු කරනු දක්නට ලැබේ. මෙම වසංගත තත්ත්වයෙන් රට මුදාගැනීම සඳහා දිවා, රෑ නොබලා වෛද්‍ය හා සෞඛ්‍ය කාර්ය මණ්ඩල දරන එම වෑයමට සහයක් වශයෙන් අවශ්‍ය වෛද්‍ය උපකරණ හා අනෙකුත් ද්‍රව්‍ය මෙලෙස පරිත්‍යාග කිරීමට සබරගමුව විශ්වවිද්‍යාලයේ ආදි විද්‍යාර්ථින්ගේ එකමුතුව පියවර ගෙන තිබිණි.