පසුගිය වසරේ මුල් මාස 9 තුළදී ශ්රී ලාංකිකයන් 2,24,133 දෙනකු විදේශ රැකියා සඳහා පිටත්ව ගොස් ඇති බව මහබැංකු වාර්තාවලින් අනාවරණ වූ බව පේරාදෙණිය විශ්වවිද්යාලයේ ආර්ථික විද්යා සහ සංඛ්යාන අධ්යයන අංශයේ මහාචාර්ය වසන්ත අතුකෝරල මහතා ‘මව්රට’ට පැවැසීය. (Sri Lanka Latest News)
ඒ අනුව සාමාන්යයෙන් මාසයකට පුද්ගලයන් 24,900කට ආසන්න පිරිසක් විදෙස්ගතව ඇති බවද ඔහු සඳහන් කළේය.
ඒ අනුව, අවුරුදු 25-29 වයස් කාණ්ඩයේ 36,789ක්ද, අවුරුදු 30-34 වයස් කාණ්ඩයේ 38,454ක්ද, අවුරුදු 35-39 අතර වයස් කාණ්ඩයේ 36,026ක්ද, අවුරුදු 40-44 වයස් කාණ්ඩයේ 38,186ක්ද විදෙස්ගතව ඇති බව සඳහන්ය.
තරුණයන් විශාල වශයෙන් රට අතහැර ගොස් ඇති අතර, එවැනි අන්දමට ගිය අය අතරින් 28.5%ක් නිපුණතා සහිත අය බවත්, තවත් 28.3% අර්ධ නිපුණතා ඇති අය බවත් සඳහන්ය.
5.1%ක් වෘත්තීය සුදුසුකම් ඇති අය බවත්, 3.9%ක් ලිපිකරු වෘත්තීය පළපුරුද්ද සහිත අය බවත් අදාළ සංඛ්යාලේඛන හෙළිකර තිබේ.
3.4%ක් මාධ්යම ප්රමාණයේ නිපුණතා ඇති අය බවත්, 30.7%ක් පහළ නිපුණතා ඇති අය බවත් එම දත්ත වාර්තා මගින් පෙන්වා දී ඇත.
මෙසේ විදෙස්ගත වූ පුද්ගලයන්ගෙන් 77.4%ක් මැදපෙරදිග රැකියාවලට ගොස් ඇති අතර, 7.4%ක් යුරෝපයටත්, 4.1%ක් දකුණු ආසියාතික රටවලත්, ඉතිරි පිරිස අනෙකුත් රටවලටත් ගොස් ඇත.
පසුගිය වසරේ විදේශගත වූ ශ්රමිකයන් විසින් ඩොලර් බිලියන 5.9ක විදෙස් විනිමය මෙරටට එවා ඇති බවත්, සාමාන්යයෙන් 2023 වසරේ මසකට ලැබුණු විදේශ විනිමය ප්රමාණය ඩොලර් මිලියන 500කට ආසන්න බවද සඳහන්ය.
රටේ තරුණ පරපුර රට අතහැර යෑම මත රටේ ආර්ථිකයට යම් බලපෑමක් අතිවී ඇති බවද පැවැසේ.
මෙම තරුණ පිරිස විදේශ රටවල සේවය කර උපයන මුදල් ලංකාවට එවීමට ක්රියා කළද ඔවුන්ට සහ ඔවුන්ගේ පවුල්වල සුබසාධනයට රජය සාධනීය වැඩපිළිවෙළක් ක්රියාත්මක කරන බවක් පෙනෙන්නට නොමැති බවත් මහාචාර්ය අතුකෝරල මහතා වැඩිදුරටත් සඳහන් කළේය.
ප්රේමලාල් විජේරත්න
