සෞඛ්ය අමාත්ය ධූරය බාර ගැනීම අමාත්ය රමේෂ් පතිරණ මහතා විසින් ප්රතික්ෂේප කොට ඇති බව වාර්තා වේ.Sri Lanka Latest News
ජනාධිපතිවරයා කියුබා සහ අමෙරිකානු සංචාරයන්හි නිරත වීමට ප්රථම කෙහෙළිය රඹුක්වැල්ල මහතා කැදවා සෞඛ්ය අමාත්ය තනතුරින් ඉවත් වන ලෙසට දැනුම් දුන් බව සතිඅන්ත ඉංග්රිසි පුවත්පත් වාර්තා කොට තිබුණු අතර වැඩිදුරටත් අනාවරණ කොට තිබුණේ නව සෞඛ්ය අමාත්යවරයා ලෙස රමේෂ් පතිරණ මහතා දිව්රුම් දෙනු ඇති බවකි.
නමුත් රමේෂ් පතිරණ මහතා සෞඛ්ය අමාත්ය ධූරය බාර ගැනීම ප්රතික්ෂේප කොට ඇති බවත්, ඒ අනුව සෞඛ්ය අමාත්ය ධූරය පොහොට්ටුවේ සිට ස්වාධීන වූ මන්ත්රීවරයෙක් වන අනුර යාපා ප්රියදර්ශන මහතා පත් කිරීමට යෝජනා වී ඇති බවත් දේශපාලන ආරංචිමාර්ග සදහන් කරයි.
මීට පෙර ගෝඨාභය රාජපක්ෂ මහතා ජනාධිපති ධූරයේ සිටියදීද රමේෂ් පතිරණ මහතා හට සෞඛ්ය අමාත්ය ධූරය භාරගන්නා ලෙස ආරාධනා කොට තිබූ නමුත් තමන් වෛද්යවරයකු වීම හේතුකොටගෙන එම යෝජනාව ප්රතික්ෂේප කිරීමට පතිරණ මහතා කටයුතු කොට තිබිණ.
එම තත්ත්වය යටතේ පාර්ලිමේන්තුව නියෝජනය නොකරන තුන්වන පාර්ශ්වයක් හරහා මෙම යෝජනාව අනුර ප්රියදර්ශන යාපා මහතා වෙත ඉදිරිපත්ව ඇති බව දැනගන්නට ඇත.
අනුර ප්රියදර්ශන යාපා මහතා පොහොට්ටුවෙන් පාර්ලිමේන්තුවට තේරී පත්වූ අතර පසුව ස්වාධීන වූ මන්ත්රීවරයකු ලෙස කටයුතු කළ අයෙකි.
අනතුරුව නිමල් ලන්සා මහතා විසින් ගොඩනැගීමට සූදානම් නව දේශපාලන සන්ධානයේ නායකත්වය පවා අනුර ප්රියදර්ශන යාපා මහතා හට ලබා දීමට යෝජනා වී තිබිණ.
නමුත් එම සන්ධානය ගොඩනැගීම මේ වනවිට අසාර්ථක වී ඇති අතර පසුගියදා ඒ සම්බන්ධයෙන් යාපා මහතාගේ කුලියාපිටිය නිවසේ පැවැති සාකච්ඡාවකට සහභාගී වී ඇත්තේද නිමල් ලන්සා මහතා සහ නලින් ප්රනාන්දු අමාත්යවරයා පමණි.
ඒ අනුව අදාළ සන්ධානය බිහිකිරීම මේ වනවිට සම්පූර්ණයෙන්ම අසාර්ථක වී ඇති බව පැවසේ.
කෙසේවෙතත් අනුර ප්රිදර්ශන යාපා මහතා හට සෞඛ්ය අමාත්ය ධූරය ලබා දීමට ඉදිරිපත්ව ඇති යෝජනාව පිළිබදව පොහොට්ටුවේ ප්රධානීන්ටද දැනගන්නට ලැබී ඇති අතර එම පාර්ශ්වයද ඊට විරෝධය පළ කොට ඇති බව දැනගන්නට ඇත.
අනුර ප්රියදර්ශන මහතා පොහොට්ටුවේ සිට ස්වාධීන වූ මන්ත්රීවරයකු බව එහිදී පෙන්වා දී ඇති පොහොට්ටු ප්රධානීන් යම් හෙයකින් සෞඛ්ය අමාත්ය ධූරය ඒ මහතාට ලබා දීමට පියවර ගතහොත් ඒ සම්බන්ධයෙන් දැඩි ක්රියාමාර්ගයක් ගැනීමට තීන්දු කොට ඇති බවද දැනගන්නට ඇත.
ඊට හේතුව වී ඇත්තේ ආණ්ඩුවේ ප්රධාන පක්ෂය වන පොදුජන පෙරමුණ විසින් ආරම්භයේදීම ඇමැති ධූර හිමිවිය යුතු පොහොට්ටුවේ නම් ලයිස්තුවක් ජනාධිපතිවරයා වෙත ඉදිරිපත් කොට තිබීමය.
ඒ අනුව එම ලයිස්තුව නොතකා ඊට පිටින් ගොස් අනුර ප්රියදර්ශන මහතා හට ඇමැති තනතුරක් ලබා දීමට කටයුතු කළහොත් ඊට එරෙහිව දැඩි ක්රියාමාර්ගයක් ගැනීමට එම පක්ෂයේ ප්රධානීන් මේ වනවිට තීරණය කොට ඇති බව පැවසේ.
