පාස්කු ප්රහාරයත් ඒ සම්බන්ධයෙන් සිදු කළ පරික්ෂණත් ඉන් විපතට පත් ප්රජාව වෙනුවෙන් සමගි ජන බලවේගයේ යෝජනාවක් ලෙස මෙම විවාදය ඉදිරිපත් කළේ කිසිදු අවස්ථාවක පුද්ගලයකුට මඩ ගැසීම, අපහාස කිරීම නොවන බවත් මෙහි ප්රධාන අරමුණ හා පරමාර්ථය වන්නේ සත්ය කුමක්ද කියා අවබෝධ කර ගැනීම බවත් විපක්ෂ නායක සජිත් ප්රේමදාස මහතා අද (22) පාර්ලිමේන්තුවේදී පැවසීය.Sri Lanka Latest News
විපක්ෂ නායකවරයා මේ බව කියා සිටියේ අද පාර්ලිමේන්තුවේ පැවැති පාස්කු විවාදයට එක්වෙමින් අදහස් දක්වමිනි.
එහි දී විපක්ෂ නායක සජිත් ප්රේමදාස මහතා තවදුරටත් කියා සිටියේ චැනල් ෆෝ නාලිකාවේ චිත්රපටයක් නිසා මෙය කරලියට ආවා යනුවෙන් ආණ්ඩු පක්ෂයේ සමහර මන්ත්රීවරු පැවසුවත් එසේ පවසා සිටින්නේ මේ සම්බන්ධයෙන් කිසිදු අදහසක් නොමැති නිද්රාශීලී මන්ත්රීවරුන් බව ය. මෙහි සත්ය හා මහමොළකරු සම්බන්ධයෙන් මුළු රටම අවදියෙන් සිටි බවත් සමගි ජන බලවේගය නිරතුරුවම මේ සම්බන්ධයෙන් අවධානයෙන් සිට කතා කල බවත් විපක්ෂ නායකවරයා පැවසීය.
ඇමෙරිකානු එක්සත් ජනපදය 2001 සැප්තැම්බර් 11 වැනි දා සිදු වූ ප්රහාරය සම්බන්ධයෙන් කොමිෂන් වාර්තාවක් සකස් කළත් විපක්ෂ නායකවරයා ලෙස තමා ඇමෙරිකන් පුරවැසියකු නොවූවත් එම වාර්තාව මේ මොහොතේ තමා සන්තකයේ ඇති බවත් ඔවුන් ලංකාවේ මෙන් බොරු ව්යාජ කොන්දේසි ඉදිරිපත් කර එම වාර්තා සැගවීම සිදු නොකළ බවත් ඔවුන් අපක්ෂපාතී පරීක්ෂණයක් සිදු කළ බවත් විපක්ෂ නායකවරයා තවදුරටත් පැවසීය. ඔවුන් කිසිදු පක්ෂ භේදයකින් තොරව කොමිෂන් සභාවේ කටයුතු කළ නිසා සත්ය සොයා ගැනීමට හැකි වූ බවත් ඊට අමතරව දිගුකාලීන ආරක්ෂණ පියවර ගැනීමට හැකි වූ බවත් පැවසූ විපක්ෂ නායකවරයා තවදුරටත් කියා සිටියේ ඇමෙරිකාන 9/11 ප්රහාරයෙන් පාඩම් ඉගෙන ගත්තත් අපේ රටේ නායකයන් තවම ඒ සම්බන්ධයෙන් පාඩම් ඉගෙන ගෙන නොමැති බව යි.
