මුතු අම්ම කෙනෙක් වෙලා

මුතු තරංගා ගායනයට වගේම රඟපෑමට දක්‍ෂ ශිල්පිනියක්. ඇයගේ රංග චාරිකාවට දොර විවර වුණේ සෙනේෂ් බණ්ඩාර අධ්‍යක්‍ෂණය කළ ‘පළිඟු ප්‍රාසාද’ ටෙලිනාට්‍යය හරහායි. ඉන්පසු ඇය විවිධ චරිත රඟපෑවා. ඉතින් දිගු නිහැඬියාවකට පසු මුතු තරංගා යළිත් රැස් ටෙලිනාට්‍ය හරහා පුංචි තිරයට ඇවිත්. ඒ අම්මා කෙනෙක් විදියට.
මුතු සැබෑ ජීවිතයේ අම්මා කෙනෙක් වෙන්න කලින්ම පුංචි තිරයේ අම්මා කෙනෙක් වෙලා නේද?
ඇත්තටම එය වෙනස්ම අත්දැකීමක්. හිතුවාටත් වඩා ප්‍රේක්‍ෂකයන් රැස් ටෙලි නාට්‍ය හරහා මගේ චරිතය වැලැඳගත්තා. ඒ ගැන සතුටුයි. මම මවකගේ චරිතයක් රඟපාන පළමු අවස්ථාවත් මෙය තමයි.
දිගු නිහැඬියාවකට පසු මුතු රැස් හරහා නැවැත හමුවුණත් ගොඩ දෙනෙක් හිතාගෙන හිටියේ ඔබ නැවැත රඟපාන්නෙ නැහැ කියලා?
මම රඟපෑමෙන් ඈත් වෙලා හිටියේ නැහැ. විදේශීය ප්‍රසංග සඳහා පසුගිය අවුරුදුවල කාලය වෙන්කළා. අවුරුදු දෙකකට පසු නැවැත මම රඟපාන්න ආවේ. නැතුව මම රඟපෑමෙන් ඉවත් වෙලා නෙවේ. වෙනස් නිර්මාණයක් හරහා හොඳ චරිතයක් කරන්න මම මඟ බලාගෙන හිටියේ.
මෙපමණ කාලයක් නිහඬව සිටීමෙන් ඔබේ ප්‍රේක්‍ෂකයන්ට ඔබ කළේ අසාධාරණයක් නේද?
එය මම පිළිගන්නවා. දැන් දීර්ඝ ටෙලිනාට්‍ය හැදෙන නිසා මම රඟපෑමට සම්බන්ධ නොවී ඉන්න තමයි හිතාගෙන හිටියේ. ඒත් පසුකාලීනව මට හිතුණා වෘත්තිය වශයෙන් මෙහෙම නිහඬ වී සිටීම නොගැළපෙන බව. එය මට කරගන්න අසාධාරණයක් වගේම ප්‍රේක්‍ෂකයන්ටත් මම කරන්නේ අසාධාරණයක්. ඒ නිසා ඔවුන්ගේ රස වින්දනය උදෙසා මම නැවැත රඟපෑමට එකතු වුණා. ඉතින් ඉදිරියට රඟපෑම වගේම මගේ ගායන කටයුතුත් සිදුවේවි.
ඔබ විවිධ චරිත රඟපෑවා. ඒ හරහා යම් කොටුවීම්වලටත් නතුවුණා. ඉදිරියට මවකගේ චරිතවලටම කොටුවීමක් සිදුවෙයිද?
සමහරවිට එහෙම නොවන්න පුළුවන්. මොකද මම කැමැති නම් විතරනේ රඟපාන්නේ. අම්මා කෙනෙක් වුණාම ඒ චරිතය තුළ විවිධ පැතිකඩ හරහා රඟපාන්න පුළුවන්. මම රඟපාන චරිත විනිවිද භාවයකින් නිරූපණය කිරීමටයි මම උත්සාහ කරන්නේ.
පසුගිය කාලේ ඔබට නිර්මාණවලින් ආරාධනා ලැබුණේ නැතිද?
ආරාධනා නිතරම එනවා. ඒ චරිතවල මට යමක් කරන්නට තිබුණේ නැහැ. ඒ නිසා මම සම්බන්ධ වුණේ නැහැ.
ඔබ වඩාත්ම කැමැති ගායන ක්‍ෂේත්‍රයේ ඉදිරියට යෑමද නැතිනම් රංගනය හරහා යන්නද?
මට පොඩි කාලේ ඉඳලා ආශාවක් තිබුණේ ගායිකාවක් විදියට කටයුතු කරන්නට. නමුත් ප්‍රේක්‍ෂකයන් මාව දැනහඳුන ගත්තේ ටෙලිනාට්‍ය හරහා. ඉතින් රඟපෑමට මගේ ලොකු ආශාවක් තිබෙනවා කියලා පැවසුවොත් හරි.
නළු නිළියන්ට ගායන ක්‍ෂේත්‍රයට ඇවිත් හඬ අවදි කරන්න ආවට ගියාට බැහැ නේද?
එය පහසු කටයුත්තක් නෙවේ. ගායන ක්‍ෂේත්‍රයෙත් කැපිලි කෙටිලි තිබෙනවා. සමහරු කියනවා රඟපාන අය මොකටද ප්‍රසංග වේදිකාවට කියලා. ඔය වගේ විවිධ මත භේද එක්ක තමයි මම ප්‍රසංග වේදිකාවේ ගීත ගායනා කරන්නේ. ඔය කැපිලි කෙටිලි කලා ක්‍ෂේත්‍රයේ විතරක් නෙවේ හැම අංශයකම තිබෙන දෙයක්.
ඔබ හාපුරා කියා ගායනා කළ ළංවුණා, ළංවුණා ගීතයට පසු ගීත නිර්මාණවල අඩුවක් අපි දකිනවා?
ඔව්. මගේ ‘ළං වුණා ළං වුණා’ ගීතය මම අදටත් ප්‍රසංගවල ගායනා කරනවා. අපි නිතර දෙවේලේ නිර්මාණ කළේ නැත්නම් අපිව අමතක වෙනවා. මම ටෙලිනාට්‍යවල රඟපාපු නැති නිසා මම රඟපාන්නේ නැහැ කියලා කිව්වා වගේ තමයි. ගායනා කළේ නැත්නම් අලුත් නිර්මාණ එළිදැක්වූයේ නැත්නම් අපි මේ ක්‍ෂේත්‍රයේ වැඩ කරන්නේ නැහැ කියලා තමයි කතා කරන්නේ. එහෙම වුණාම පසුබෑමක් ඇති වෙනවා.
විදේශීය ප්‍රසංගවල කොහොමද ප්‍රතිචාර?
විදේශීය අයට අපිව දකින්නට ලැබෙන්නේ කලාතුරකින්. ඉතින් හොඳ ප්‍රතිචාර ලැබෙනවා. ඔවුන් හමුවෙලා කතාබහ කරන්න ලැබෙනවා. මූල්‍ය පහසුකම් ප්‍රශ්නයක් නැතිනම් මම විදේශීය ප්‍රසංග සඳහා යනවා.
ගොසිප් කලාව අද පැතිරෙන්නේ ජනප්‍රියත්වයට. එය ගැන ඔබේ අදහස?
ගොසිප් හොඳ වගේම නරකටත් බලපානවා. ගොසිප් කියන දේ මම විශ්වාස කරන්නේ නැහැ. ඒ හරහා හොඳ පැත්තට වඩා නරක පැත්ත ගැන තමයි කතා කරන්නේ. මිනිසුන් ගොසිප් හරහා හොයන්නේ තව කෙනෙක්ගේ අඩුපාඩු. ඉතින් මම මේ ක්‍ෂේත්‍රයේ හරිම පරෙස්සමෙන් තමයි කටයුතු කරන්නේ.
වසන්ත විතාරණගේ