ඊතලය ඉලක්කයටද

බැලූ බැල්මට ඔහු බොලිවුඞ් නළුවකු හා සමානයි. නළුවකු වී චිත්‍රපට කිහිපයකම රඟපෑ ඔහු දැන් ‘ඊතලය’ චිත්‍රපටය හරහා නිෂ්පාදනයට පිවිසී හමාරයි. ඔහු නමින් කැලුම් ආර්ය්‍යන්ය.
පසුගිය වසරේ ඔබ සිනමාවට ‘ගෝරි’ ගෙනාව. මෙවර ඔබ ‘ඊතලය’ විදින්නෙ කාටද?
‘ගෝරි’ චිත්‍රපටය සාර්ථකව තිරගත වුණා. සිනමා ශාලාවෙන් ඈත් වෙලා ගිය බොහෝ පිරිසක් ගෝරියට එකතු වුණා. ‘ඊතලය’ විදින්නෙත් සිනමාවට තමයි. මම රඟපෑ ‘ගෝරි’ චිත්‍රපටයට වඩා හාත්පසින්ම වෙනත් චිත්‍රපටයක් ‘ඊතලය.’
බැලූ බැල්මට ‘ඊතලය’ අනුකරණයක් බවට පෙනී යනවා?
කිසිම කොපියක් නෙවේ. විවිධ චිත්‍රපටවල ආභාසය තිබෙනවා. මෙහි අධ්‍යක්‍ෂ නාලක විතානගේ ඉතාමත් සූක්‍ෂ්ම ලෙස මම හිතුවාටත් වඩා ඔහු චිත්‍රපටය නිර්මාණය කර තිබෙනවා. මම හිතන්නේ ඔහු නිර්මාණය කළ චිත්‍රපට අතරින් ‘ඊතලය’ වෙනුවෙන් ලොකු කැපකිරීමක් කර ඇති බවයි. ඔහු විතරක් නෙවෙයි සියලුම කණ්ඩායම මට දුන්න ශක්තිය වටිනවා.
ඔබ ජනප්‍රිය රංගන ශිල්පියෙක්. ඒත් හිටිහැටියේම චිත්‍රපටයක් නිෂ්පාදනය කරන්න හිතුවේ ඇයි?
මම වගේම මේ ක්‍ෂේත්‍රයට ආදරය කරන මගේ සහෝදර ශිල්පීන් ගොඩ දෙනෙක් ඉන්නවා. චිත්‍රපටයක් නිෂ්පාදනය කරන්න ඕනෑ කියලා මගේ හිතේ ආශාවක් තිබුණා. කාලයත් එක්ක දවසින් දවස මගේ ඒ සිහිනයට දවස උදාවුණා. මොකද ගොඩ දෙනෙක් කරන්නේ රජ කතා, කරන එකයි. දුක බෙදා ගන්න එකයි. සිනමාවේ එතැනින් එහාට දෙයක් හිතන්න බැරි ඇයි. නව පරපුරේ දක්‍ෂ අධ්‍යක්‍ෂවරුන් කිහිපදෙනෙක් ඉන්නවා. ඒ අතර හර්ෂ උඩකන්ද විවිධ මාවත් හොයා නිර්මාණය කරනවා. එයයි අපට අවශ්‍ය. මමත් උත්සාහ කළේ බොලිවුඞ් සිනමාවට ගැළපෙන විදියට චිත්‍රපටයක් කරන්න. තාක්‍ෂණ පහසුකම් නැති වුණත් අපේ රටේ වටිනා සම්පත් සහ නිර්මාණකරුවන් ඉන්නවා. මම නිෂ්පාදනයට පිවිසියේ මුදල් උපයන්න නෙවේ. අපේ සිනමාවට මම ආදරය කරන නිසා.
තවත් පැත්තකින් බැලුවොත් නව පරපුරේ නිර්මාණකරුවන්ට ඔවුන්ගේ හැකියාවන් පෙන්වන්න නිර්මාණ හැදෙනවා අඩුයි නේද?
හොඳ නිර්මාණකරුවන් කිහිප දෙනයි ඉන්නේ. අපිට කරන්න නිර්මාණ නැහැ. ඉතින් අපේ දක්‍ෂතාවන් පෙන්වන්න අවස්ථාවන් අඩු නිසා අලුත් පරපුරත් සම්බන්ධ කරගෙන අලුත් නිර්මාණ කරනවා. නැතිනම් මේ විදියට ගියොත් අවසානයේ මෙගා ටෙලි නාට්‍යවල තමයි නතර වෙන්න වෙන්නේ.
කැලුම්ගේ අදහසක් නැතිද ටෙලිනාට්‍යවල රඟපාන්න?
මගේ ලොකුම ආශාව සිනමාව තමයි. මෙගා ටෙලිනාට්‍යවලට මම කොහොමත් කැමැති නැහැ. හොඳ ටෙලිනාට්‍ය නිර්මාණ පිටපතකින් මට ආරාධනා කළොත් මම සම්බන්ධ වෙනවා. කලාව වෙනුවෙන් මගෙන් ඉටුවිය යුතු දේ මම කරනවා.
‘ඊතලය’ ගමන මුල පුරන කොට කැලුම් තවත් පැත්තක ඉඳලා චිත්‍රපට අධ්‍යක්‍ෂණයට පිවිසීමට සූදානම් නේද?
එය තමයි මගේ ඊළඟ ඉලක්කය. ඒ සිනමාපටයේ රූපගත කිරීම් මාර්තු මාසයේ ආරම්භ කරනවා. එහි තිර රචනයත් මගේ.
රඟපෑම ඔබට පහසු වුණාට නිෂ්පාදනයේදී ඔබට ප්‍රශ්න ගැටලු මතුවන්න ඇති නේද?
එහෙම කිසිම ප්‍රශ්න ගැටලුවක් මතු වුණේ නැහැ. චිත්‍රපටයක් හදන එක ප්‍රශ්නයක් නැහැ. එය තිරගත කිරීමට තමයි ප්‍රශ්න මතු වෙන්නේ. චිත්‍රපට සංස්ථාව තිබුණට කිසිම සිස්ටම් එකක්, ක්‍රමවේදයක් තවම හැදිලා නැහැ.
හිටි ගමන් පැරෂුට් වගේ චිත්‍රපට තිරගත වෙනවා. එහෙමත් නැතිනම් දේශපාලන බලපෑම් මත අපි හැමෝම නිර්මාණ-කරුවන් නිසා සියලුම දෙනා රැකෙන විදියට විධිමත් ක්‍රමවේදයක් අවශ්‍යයි. එක පැත්තකට බර නොවී සමබරව, ඍජුව තීරණ ගන්න සිනමා ක්‍රමවේදයක් උදාවුණොත් මෙයට වඩා හොඳ නිර්මාණ තවත් බිහිවෙයි.
වසන්ත විතාරණගේ