ශ්රී ලංකාව තුළ අන්තර්වාර පාලනයක් ඇති කිරීමේ කුමන්ත්රණයට ජෙනරාල් සිල්වා සහය දුන් බවට ජාතික නිදහස් පෙරමුණේ නායක පාර්ලිමේන්තු මන්ත්රී විමල් වීරවංශ මහතා ආරක්ෂක මාණ්ඩලික ප්රධානී සහ හිටපු යුද හමුදාපති ශවේන්ද්ර සිල්වා මහතාට එරෙහිව කරන ලද චෝදනා ආරක්ෂක අමාත්යාංශය විසින් ප්රතික්ෂේප කර ඇත.
2022 මැයි 09 වැනිදා උද්ඝෝෂණ පිටුපස සිටි අයගේ පළමු සැලසුම එවකට විධායක ජනාධිපතිවරයා සහ ආරක්ෂක අංශ ප්රධානීන් ජනාධිපති මන්දිරය තුළදී ඝාතනය කිරීම බවත්, ජෙනරාල් ශවේන්ද්ර සිල්වාගේ ඉන්දීය සංචාරය සැකයට තුඩු දුන් බවටත් උත්සවයක් අමතමින් වීරවංශ මන්ත්රීවරයා චෝදනා කළේය.
දකුණු ඉන්දීය සාගර කලාපයේ මිත්ර රටවල් අතර සංවිධානය කරන ලද ආරක්ෂක සමුළුවක් වන Colombo Security Conclave හි නියෝජ්ය ජාතික ආරක්ෂක උපදේශක මට්ටමේ රැස්වීම 2022 ජූලි 07 වන දින ඉන්දියාවේ පැවැත්විණි.
එවකට ශ්රී ලංකා ජනාධිපතිවරයාගේ සහ ආරක්ෂක අමාත්යාංශයේ උපදෙස් සහ අනුමැතිය යටතේ ජෙනරාල් ශවේන්ද්ර සිල්වා මහතා ශ්රී ලංකා රජය නියෝජනය කරමින් රැස්වීමට සහභාගී වූ බව රාජ්ය ආරක්ෂක අමාත්යංශය අවධාරණය කළේය.
ඒ අනුව මන්ත්රීවරයාගේ ඉහත ප්රකාශය පදනම් විරහිත බව පෙන්වා දෙන ආරක්ෂක අමාත්යාංශය වැඩිදුරටත් අවධාරණය කර සිටියේ 2022 ජූලි මාසයේදී එවකට ජනාධිපතිවරයාගේ සහ ආරක්ෂක අමාත්යාංශයේ අනුමැතිය ඇතිව කොළඹ ආරක්ෂක සමුළුවට සහභාගී වීම සඳහා ජෙනරාල් සිල්වා ඉන්දියාවේ නිල සංචාරයක නිරත වූ බවයි. .
