උතුරු කොනට වෙනස් ගමනක්

ගුවන් යානයක එක් වරක් හෝ ගමන් කරන එක ගොඩ දෙනෙක්ගේ හීනයක්. හැබැයි මේ හීනේ හැබෑ කර ගන්න හැමෝටම අවස්ථාව ලැබෙන්නේ නැහැ. මොකද අපි දන්න තරමින් ගුවන් යානයක ගමනක් යන්න නම් පිටරටකටම ගිහින් එන්න ඕනෑ. ඒක ඉතින් ඒ තරම්ම ලේසි දෙයක් නෙවෙයි. ඒත් අපේ රට ඇතුළෙම කොහෙ හරි ගුවන් යානයකින් ගිහින් එන්න පුළුවන් නම් කොච්චර හොඳද? අන්න ඒ හීනය හැබෑ කර ගන්න ඔන්න දැන් හැමෝටම අවස්ථාව ලැබිලා තියෙනවා.

ඔන්න දැන් කොළඹ ඉඳන් යාපනයට ගුවන් යානයකින් ගිහින් එන්න පුළුවන්. වර්තමාන පරපුරට මේ ආරංචිය අලුත් එකක් වුණත්, අපේ වැඩිහිටි පරම්පරාවට නම් මේක අලුත් ආරංචියක් නෙවෙයි. මොකද මීට දශක කිහිපයකට කලින් මේ සේවාව බොහොම සාර්ථකව ක්‍රියාත්මක වෙලා තියෙනවා. දශක ගණනාවක් පැවතුණු යුද්ධය හින්දා අපේ රටේ ගොඩක් දේවල් ආපස්සට ගියා වගේම කොළඹ- යාපනය අතර ගුවන් ගමනත් සම්පූර්ණයෙන්ම නැවතුණා. ඒ විදියට නැවතුණු සේවාව තමයි මේ දැන් ආයෙත් ආරම්භ වෙලා තියෙන්නේ.

පසුගිය පෙබරවාරි 01 වැනිදා ආරම්භ වුණු මේ සේවාවත් එක්ක දැන් දවසට ගුවන් ගමන් වාර කිහිපයක් රත්මලාන ගුවන් තොටුපොළේ ඉඳන් යාපනය පලෙයි ගුවන් තොටුපොළ දක්වා ක්‍රියාත්මක වෙනවා. මේ එක් ගුවන් වාරයක මිල රුපියල් 7500ක් විදියට තමයි සඳහන් වෙන්නේ. ගිහින් එනවා නම් රුපියල් 15000ක්.

අපි දන්න තරමින් කොළඹ ඉඳන් යාපනේ යනවා කියන්නේ ගොඩක් වෙලා යන ගමනක්. ගොඩබිමෙන් මොන විදියට ගියත් ඒකට අඩුම පැය 6ක්වත් ගත වෙනවා. ඒත් ගුවනින් රත්මලානේ ඉඳන් යාපනේට යන්න ගතවෙන්නේ විනාඩි 45ක්, 50ක් විතරයි. මේ වෙද්දි පෞද්ගලික ගුවන් සේවා කිහිපයක්ම මේ සේවාව ආරම්භ කරලා තියෙනවා. ඒ හින්දා තමන්ට කැමැති වෙලාවක් තෝර ගෙන මේ ගමන ගිහින් එන්න පුළුවන්.

ගුවනින් යන්න හීන දැකපු හැමෝටම ඔන්න දැන් පහසුවෙන් ඒ හීනය සැබෑ කර ගැනීමේ අවස්ථාව උදා වෙලා තියෙනවා. ඒත් හඳුන්වා දීමේ සේවාවක් විදියට ක්‍රියාත්මක වෙන මේ මිල ගණන් වෙනස් වෙන්න ඉඩකඩ තියෙනවා. ඒ හින්දා හැම දේකටම වගේ මේකටත් ඉක්මන් වෙන එක තමයි හොඳ.