දැන් ඉන්න ගොඩදෙනෙක් මාව අඳුනන්නේ නැහැ

මේ දවස්වල අපට පුංචි තිරයේ වනවාසී ලොකු හාමුදුරු නමක් දකින්න ලැබෙනවා. හැබැයි නුහුරු පෙනුමක් දැනුණාට ඔහු මේ කලා ක්ෂේත්‍රයේ සුවිශේෂී තරුවක්. වසර ගණනාවකට පසු ඔහු නැවැත කලා ක්ෂේත්‍රයට පිවිසිලා ඔහු නමින් වසන්ත කොටුවැල්ලයි.
කාලෙකට පස්සේ ඔබ පුංචි තිරයට නැවැත සම්බන්ධ වෙලා. ඒ ගැන මොකද හිතෙන්නේ?
ඇත්තටම ඔව්. සෑහෙන කාලෙකට පස්සේ තමයි මම ටෙලිනාට්‍යයකට සම්බන්ධ වුණේ. ඒ ඉල්ලීම ප්‍රතික්ෂේප කරන්න බැරිකමට මම සම්බන්ධ වුණා. මෙයට කලින් මම අශෝක අතාවුදහෙට්ටි නිර්මාණය කළ ‘කන්දක් සේමා’ චිත්‍රපටයට සම්බන්ධ වුණා. තවම එය තිරගත වුණේ නැහැ.
මේ තරම් කාලයක් නිහඬව සිටියේ ඔබ කිනම් කරුණු කාරණාවක් මතද කියල පැවැසුවොත්?
2015 වර්ෂයේ ඉඳලා 2018 වර්ෂය කාලය වෙනකම් මම සාර්ක් සංස්කෘතික අධ්‍යක්ෂ ලෙස කටයුතු කළා. ඒ වෙනුවෙන් මම පූර්ණකාලීනව වැඩකටයුතු සොයා බලා කටයුතු කළා. තවත් සමහර අවස්ථාවල මට රාජකාරි කටයුතු වෙනුවෙන් විදේශගත වීමට පවා සිදුවුණා. එයට අමතරව ලංකාවේ සියදිවි හානිකර ගැනීම අවම කිරීම සඳහා ඒ වෙනුවෙන් කටයුතු කළා.
ඒ මානසික පීඩනයෙන් පෙළෙන ජනතාව ගැන සොයා බලා ඔවුන්ව දැනුවත් කිරීමේ කටයුතුත් කළා. ඉතින් ඒ පූර්ණකාලීන වැඩකටයුතු නිසා කලා නිර්මාණ සඳහා දායක වීමට කාලය අඩුවුණා. ඒ තිබුණු රාජකාරි කටයුතුවල බරපතළකම වැඩි නිසා පූර්ණකාලීනව ඒ වෙනුවෙන් කාලය කැප කළා.
එලෙස පූර්ණකාලීනව සමාජ මෙහෙවරක් කළ ඔබ වර්තමානයේ මෙලෙස ‘සංසාරාරණ්‍යය අසබඩ’ නිර්මාණයේ නතරවන්න රහසකුත් ඇති නේද?
සංජය නිර්මාල් මාව හමුවෙලා කතා කරන්න ඕනෑ කිව්වම මම ලොකු කැමැත්තක් දැක්වූයේ නැහැ. ඒත් ඔහු මේ ටෙලි නාට්‍යයට මාව ඕනෑමයි කියලා කිව්වා. ඒ වගේම සයිමන් නවගත්තේගම මගේ සහෝදරයෙක් හා සමානයි. ඒ තරමට අපි අතර ලොකු බැඳීමක් තිබුණා. ඔහු මට හමුවන්නේ ‘තුන්වැනි යාමය’ චිත්‍රපටයට රූපගත කිරීම් කරන කාලය තුළ.
එහිදී ඔහු මාව ගොඩක් දිරිමත් කළා. ඔහුගේ ‘සංසාරාරණ්‍යය අසබඩ’ නවකතාව ඇතුළු නිර්මාණ කිහිපයක් කියවලා තිබුණා. ඒ වගේම සංජය නිර්මාල්ගේ නිර්මාණ කිහිපයක් මම නරඹලා තිබුණා. ඔහු මේ ක්ෂේත්‍රය ගැන හොඳ අවබෝධයකින් වැඩ කරන කෙනෙක් විදියට මම ඔහුගේ නිර්මාණවලින් දැක්කා. ඉතින් ඔය කරුණු කාරණා එක්ක නැවැත මගේ හිතට ආපු සිතුවිල්ලක් නිසා තමයි මේ ටෙලිනාට්‍යයට සම්බන්ධ වෙන්න හිතුවේ.
ඉතින් ලොකු හාමුදුරුවන්ගේ චරිතයට ලැබෙන ප්‍රතිචාර කොහොමද?
දැන් ඉන්න ගොඩක් දෙනෙක් මාව අඳුරන්න බැරිව ඇති කියලා මම හිතනවා. කාලෙකින් රඟපාන නිසා. අනෙක මම කරන දේ සතුටින් හරියට කරනවා. කාලෙකින් රඟපාන්න ආව කියලා මට එහෙම වෙනසක් දැනුණේ නැහැ. ප්‍රතිචාර ලැබෙන්නේ ටෙලිනාට්‍ය අවසානය වුණාට පසුවයි. එවිට විචාරකයන්, මාධ්‍යවේදීන්, රටේ ප්‍රේක්ෂක ජනතාව මගේ චරිතය ගැන වාද, විවාද ප්‍රතිචාර දක්වයි. ඒ මොන ප්‍රතිචාරය දැක්වුවත් මට කරන්න පුළුවන් උපරිම විදියට මම රඟපෑවා. ඒ ගැන මම සතුටු වෙනවා.
ඔබ කලා ක්ෂේත්‍රයේ විතරක් නොව සමාජයේ දැනුම තිබෙන සුවිශේෂී පුද්ගලයෙක්. අද බිහිවෙන නිර්මාණ ගැන විවේචන වැඩියි. මොකද හිතෙන්නේ ඒ ගැන?
අද අවට ලෝකය සහ ජීවිත ගෝලීය සන්නිවේදන ජාලයන් තුළ එකිනෙකට බැඳී පවතින බවක් මම දකින්නේ. නමුත් එය අප අත්විඳිය යුතුයි. ඒ තුළ තමයි නිර්මාණ බිහි වෙන්නේ. ඒ සියල්ල තිබිය යුතුයි. විවිධත්වයට ගරු කළ යුතුයි. උදාහරණයක් විදියට සමහරු වින්දනයට ටෙලිනාට්‍ය නරඹනවා. තවත් සමහරු අධ්‍යයනය කිරීමට නරඹනවා. තවත් සමහරු පෞද්ගලික සංවර්ධනයට නරඹනවා. තවත් සමහරු මනසට ආහාරයක් විදියට රසවිඳිනවා. ඒ අතර විවිධාකාර නිර්මාණ බිහිවෙනවා. ඒ සියල්ල වැලඳගත යුතුයි කියලා මම හිතෙන්නේ. කිසිවක් නරක නැහැ. ප්‍රේක්ෂකයාගේ රසවින්දනය අනුව අවශ්‍ය දේ තෝරාගන්නේ.
වසන්ත විතාරණගේ