මහරගම, පමුණුව ප්රදේශයේ හා හයිලෙවල් මාර්ගය අද්දර පදික වේදිකාවේ වෙළෙඳාම් කටයුතු සිදුකරන ජංගම වෙළෙඳ ව්යාපාරිකයන් විකිණීම සඳහා රැගෙන එන නිමිඇඳුම් හා රෙදිපිළි කිසියම් පුද්ගලයකු සොරකම් කරන බවට ලැබුණු පැමිණිලි රාශියක් හේතුවෙන් ඒ සම්බන්ධයෙන් සිදුකළ විමර්ශනයේදී සැකකටයුතු පුද්ගලයකු පෙරේදා (18දා) දින අත්අඩංගුවට ගත්බව මහරගම පොලිසිය පැවැසීය.
අත්අඩංගුවට පත්වූ පුද්ගලයා සන්තකයේ තිබී හෙරොයින් ග්රෑම් 2යි මිලිග්රෑම් 150ක් සොයාගත් බවත්, මෙම පුද්ගලයා මහරගම පොලිස් ස්ථානය වෙත රැගෙන විත් සිදුකරන ලද දීර්ඝ ප්රශ්න කිරීම්වලදී පමුණුව ප්රදේශයේ ජංගම වෙළෙඳුන්ගෙන් හා පදික වෙළෙඳුන්ගෙන් සොරකම් කරන ලද රෙදිපිළි තොගය පිළිබඳව සුලමුල සොයා ගැනීමටත් හැකි වූ බව පොලිසිය පැවැසීය.
මෙම පුද්ගලයා සොරකම් කරන ලද රුපියල් ලක්ෂ 15කට වඩා අධික නිමිඇඳුම් සහ රෙදිපිළි පිටකොටුව ප්රදේශයේ වෙළෙඳසල් කිහිපයකට විකුණා තිබියදී සොයාගත් බවත් පොලිසිය පැවැසීය.
වයස අවුරුදු 36ක් වන මෙම සැකකරු පෑලියගොඩ දුටුගැමුණු මාවත ප්රදේශයේ පදිංචිකරුවකු බවත්, රෙදිපිළි සියල්ල විකුණා ලබාගත් මුදලින් හොරොයින් පානය කර ඇති බවත් සිදුකළ මූලික විමර්ශනයේදී අනාවරණය වූ බවද පොලිසිය පවසයි.
සැකකරු තමාගේ වකුගඩුවක් කොළඹ පෞද්ගලික රෝහලක වකුගඩු ආබාධයක් සඳහා රෝහල් ගතකර සිටි පුද්ගලයකුට ලබාදී රුපියල් ලක්ෂ විස්සක් ලබාගෙන එම සම්පූර්ණ මුදලින්ම හෙරොයින් පානය කර ඇති බවත්, එම මුදල් අවසන් වූ පසු නැවැත වකුගඩුව ලබාදුන් පුද්ගලයාගෙන් මුදල් ඉල්ලා ඔහුට තර්ජනය කර ඇති බවත් පොලිසිය විසින් සිදුකළ මූලික විමර්ශනයේදී අනාවරණය වූ බවද පොලිසිය පවසයි.
