චීනය ඇමෙරිකාවට සම්බාධක පනවන බව පසුගිය අඟහරුවාදා ප්රකාශ කෙළේය. චීනය ඇමෙරිකාවට එකට එක කිරීමක් වශයෙක් මෙ සේ සම්බාධක පනවා තිබේ.
චීනයේ සිංජිඈං ප්රදේශයේ කර්මාන්ත ශාලාවල බලයෙන් යොදවාගනු ලබන බව කියන ශ්රමිකයන් ලවා කෙරෙන නිෂ්පාදන ආනයනය කිරීම පසුගියදා වොෂිංටනය තහනම් කරනු ලැබුවේය.
ඊට එකටෙක කිරීමක් වශයෙන් ඇමෙරිකන් පාලන අධිකාරියේ ජාත්යන්තර ආගමික නිදහස පිළිබඳ කොමසමේ නිලධාරීන් සිවුදෙනකු අරබයා චීනය මෙසේ සම්බාධක පනවා තිබේ.
යථෝක්ත කොමසමේ සභාපතිනි නාදිනී මේන්සා, නියෝජ්ය සභාපතිනි නූරි ටර්කල් සහ සාමාජිකයන් වන අනුරිමා භාරගාවෝ සහ ජේම්ස කාර් යන සිවුදෙනාට චීන දේශයට, හොංකොං සහ මැකෝ යන නගරවලට පා තැබීමද තහනම් කරමින් සම්බාධක පනවා තිබේ.
එපමණක් නොව චීනයේ ඇති ඔවුන් සිවු දෙනාට අයත් දේපොළ පවා තහනමට ලක්කර ඇතැයි චීන විදේශ අමාත්යාංශයේ මාධ්ය ප්රකාශක ශාවෝ ලිජියෑං ප්රකාශ කෙළේය.
චීනයේ සිංජියෑං කර්මාන්ත ශාලාවල බලයෙන් යොදවාගනු ලබන ශ්රමිකයන් ලවා නිෂ්පාදනය කරවා ගන්නා භාණ්ඩ ආනයනය පමණක් නොව ලබන පෙබරවාරියේ බෙයිජිං නගරයේ පැවැත්වීමට නියමිත “වින්ටර් ඔලිම්පික්” ක්රීඩා උළෙල පවා වර්ජනය කරන ලෙසට ඇමෙරිකානු සමාජ ක්රියාකාරීහු ජෝ බයිඩන්ගේ ආණ්ඩුවට බල කරති.
තම කර්මාන්තශාලාවල බලයෙන් ශ්රමිකයන් යොදවා ගන්නා බවට කෙරෙන ඇමෙරිකානු චෝදනාව මීට පෙරද කීපවතාවක්ම ප්රතික්ෂේප කළ චීනය විදේශයේ නිෂ්පාදිත පාවහන් සහ ඇඳුම් පැලැඳුම් ආනයනය කිරීම ප්රසිද්ධියේම තහනම් කෙළේද ඇමෙරිකාවට එකටෙක කිරීමක් වශයෙනි.
සින්ජිඈං ප්රදේශයේ වෙසෙන උයිගර් සහ වෙනත් මුස්ලිම් සුළු ජාතිකයන් පිරිසට නිරන්තරයෙන් චීන පාලනය හිරිහැර කරන බව කියන ඇමෙරිකාව එම පිරිස් බලයෙන් රඳවාගෙන සිටින බවටද, එම පිරිසේ කාන්තාවන් ගැබ්ගත් කල්හි බලහත්කාරයෙන් ගබ්සාවට ලක්කරන බවටද ඇමෙරිකාව චෝදනා කරයි.
සින්ජිඈං ප්රදේශයේ පාලනාධිකාරියේ සභාපති වශයෙන් 2018 ආරම්භයේ සිට 2020 මුල් භාගය දක්වා රාජකාරි කළ ෂෝරත් සාකි සහ එවකට නියෝජ්ය සභාපතිව සිට මේ වන විට සභාපති වශයෙන් රාජකාරි කරන එර්කන් තුනියාස් යන දෙදෙදෙනාට ඇමෙරිකාව පසුගිය 10 වැනිදා එසේ චෝදනා කරමින් සම්බාධක පැනෙව්වේය.
“ඇමෙරිකාව පැනවූ සම්බාධක ඉවත් කරගත යුතුයි, සින්ජිඈං ප්රදේශයේ කෙරෙන කටයුතු ගැන සෙවීමත් නැවැත්විය යුතුයි. චීනයේ අභ්යන්තර කටයුතුවලට කෙරෙන ඇඟිලි ගැසීම්ද ඇමෙරිකාව වහා නැවැත්විය යුතුයි. එසේ නැතහොත් ඒවාට උත්තර දෙන්නත් චීනය ලෑස්තියි” යනුවෙන් චීන විදේශ අමාත්යාංශයේ මාධ්ය ප්රකාශක ශාවෝ ලිජියෑං ප්රකාශ කෙළේය.
චන්ද්රසේන මාරසිංහ
