හොල්මන්, භූත, අවතාර ගැන කලින් කලට ලෝකයේ විවිධ තැන්වලින් විවිධ කතාන්දර ඇසෙයි. ශ්රී ලංකාවේ ජනරටාව කණපිට පෙරළා ලේ විලක් කළ කුරිරු කොටි නායක ප්රභාකරන් ඝාතනය කර වසර 10ක් ඉක්මවා ඇතත්, ඔහු ගැනද විවිධ කතා අසන්නට ලැබුණේ, ඔහු තවද ජීවතුන් අතර සිටින බැව් පවසමිනි. එසේම ඔහුගේ මහා සිහිනය වූ ‘දෙමළ ඊළම’ නමැති දේශය ගැනද, ලොව තැන් තැන්වලින් කතාන්දර තවමත් ඇසෙයි. ‘දෙමළ ඊළම’ ද ප්රභාකරන් සමඟම සදහටම වළ දැමූ බැව් සමහරුන්ට අමතකය. එහෙත් එම සත්යය විශ්වාස නොකරන අන්තවාදී මිනිසුන් රැළක් තවද ලොව වෙසෙති. ඒ බොහෝ මිනිසුන් ඇත්තේ මෙරටට වඩා පිටරටය.
මෙම අපූරු කතාවද පිටරටකින් ගලා එන්නේ එවන් පසුබිමකදීය. ‘ටැමිල් ඊළාම්’ නමැති පාපන්දු කණ්ඩායමක කතාන්දරය එය වෙයි. කැනඩාවේ පිහිටුවාගෙන තිබෙන ශ්රී ලාංකික දමිළ ක්රීඩකයන් පිරිසක් සිටින මෙම පාපන්දු කණ්ඩායමේ නම ‘ටැමිල් ඊළාම්’ය. එනම් දමිළ දේශයක් යන අරුතය. ජාතිවාදී සහ අන්තවාදී පරිසරයකදී මෙවැනි නමක් තබා තිබීම දෙනෙත් විවරකරවන, දෙවරක් සිතා බැලිය යුතුකාරියක්ය. දමිළ ශ්රී ලාංකිකයන් එහි සාමාජිකයන් ලෙස සිටියත් එම කණ්ඩායම ‘ශ්රී ලංකා’ යන නම නොතබා මෙසේ ආන්දෝලනාත්මක නමත් තැබීම මහත් ආන්දෝලනයකට ලක්වී ඇත.
සාමාජිකයන් 15 දෙනකු සිටින මෙම ‘ටැමිල් ඊළාම්’ පාපන්දු කණ්ඩායම පිහිටුවාගෙන ඇත්තේ කැනඩාවේ එංගලන්තයේ සහ ස්විස්ටර්ලන්තයේ වෙසෙන දමිළ ඩයස්පෝරාවේ සහභාගිත්වයෙනි. වෙනම දේශයක් ඉල්ලා උද්ඝෝෂණය කර පරාජයට පත්ව පසුබසින ලද එල්.ටී.ටී.ඊ. කොටි හිතවාදී පිරිස් රැසක් මෙම ඩයස්පෝරාවට අයත්ය. එහි සිටින දක්ෂ, තරුණ පාපන්දු ක්රීඩකයන් තෝරාගෙන මෙම නව පාපන්දු කණ්ඩායම පිහිටුවාගෙන ඇත්තේ කැනඩාව තුළය. ජාතිවාදී තත්ත්වය කෙසේ වුවද මෙම තරුණ පාපන්දු කණ්ඩායම මේ වන විට විවිධ තරගාවලිවලදී සුවිශේෂී දස්කම් පෙන්වා ඇතැයි වාර්තා වෙයි. එසේම මෙම තත්ත්වය දැනට බොහෝ කතාබහටද ලක්වී ඇත.
මෙම ‘ටැමිල් ඊළාම්’ නමැති පාපන්දු කණ්ඩායම මේ වන විට ප්රකට ජාත්යන්තර පාපන්දු සංවිධානයක් වන ‘කොනිෆා’ සංවිධානයේ සාමාජිකත්වය ලබාගෙන ඇත. මෙම සංවිධානය ලෝකයේ රටවල් 59ක සාමාජිකත්වය දරන පාපන්දු කණ්ඩායම්වලින් සමන්විත වෙයි. ශ්රී ලංකාව වෙනුවට එහි ඇත්තේ ‘ටැමිල් ඊළාම්’ කණ්ඩායම වන අතර, ශ්රී ලංකාවෙන් වෙනත් නිල කණ්ඩායමක් එය නියෝජනය නොකරයි. ශ්රී ලංකාව වෙනුවෙන් එහි ‘ටැමිල් ඊළාම්’ කණ්ඩායම ඇතත්, ඔවුන් එහිදී ප්රකාශිත වන්නේ ශ්රී ලාංකික නියෝජනයක් නොවේ. එනම් ‘ටැමිල් ඊළාම්’ නොහොත් ‘දමිළ දේශය’ ලෙස නියෝජනය වීමකි. මෙය සැබැවින්ම අත්තනෝමතික නීති විරෝධීකාරියක්ද වෙයි.
කෙසේ හෝ මේ වන විට මෙම කණ්ඩායමේ දක්ෂතාවලට අනුව තරග රැසක්ම ජයග්රහණය කර ඇත. ඔවුන් පසුගියදා ජයග්රහණය කළ නවතම තරගය වන්නේ බටහිර පැපුවා දේශයසමඟ පැවැති තරගයයි. මෙහිදී ගෝල 10-02ක් ලබා ගනිමින් ‘තමිල් ඊළාම්’ කණ්ඩායම ජයග්රහණය කළේය. මෙම තරගය පවත්වනු ලැබුවේ නෙදර්ලන්තයේ, හේග් නුවර වන අතර ලෝක කුසලානය සඳහා සුදුසුකම් ලැබීම සඳහා එය පවත්වන ලදී. මේ ආකාරයේ ‘ටැමිල් ඊළාම්’ කණ්ඩායමට ඉදිරියේදීත් ජාත්යන්තර මට්ටමේ තරග රැසකට සහභාගි වීමට නියමිතය. කොනිෆා සංවිධානය 2013 වසරේදී පිහිටුවනු ලැබූ අතර, එය ජාත්යන්තර ප්රමිතිය සහ සහතිකත්වය ලැබූ ක්රීඩා සංවිධානයක් වෙයි.
ලෝකයේ සුවිශාලතම සහ ප්රධානතම ජාත්යන්තර පාපන්දු සංවිධානය වන්නේ FIFA – The Federation International de Football Association නමැති සංවිධානයයි. ලෝකයේ විවිධ රටවල ජාතික පාපන්දු කණ්ඩායම් 211ක් මෙහි සාමාජිකත්වය දරන අතර, ලෝක කුසලාන තරගාවලිය සංවිධානය කරනු ලබන්නේද මෙම ආයතනය විසිනි. කොනිෆා සංවිධානයට අනුබද්ධිතව සාමාජිකත්වය නොලැබූ විවිධ රටවල පාපන්දු කණ්ඩායම් FIFA සංවිධානයේ සාමාජිකයෝ වෙති. ඒ අනුව ලෝකයේ රටවල් 59ක් එයට අයත් අතර, ආසියාවේ රටවල් 11ක්ද එම ගොන්නට අයත් වෙයි. ‘ටැමිල් ඊළාම්’ කණ්ඩායමද එම ආසියානු රටවල් ගොඩට අයත් වෙයි.
‘ටැමිල් ඊළාම්’ කණ්ඩායමට සාමාජිකයන් 15 දෙනකු අයත් අතර, මෙම පිරිසට වෘත්තීය සහ ආධුනික මට්ටමේ ක්රීඩකයන්ද අයත්ය. යුරෝපීය රටවල් ගණනාවක වෙසෙන දෙමළ ඩයස්පෝරාව මෙම ක්රීඩා කණ්ඩායම තම උපරිම සහයෝගය ලබාදෙන අතර, මූල්යමය සහ අනෙකුත් සම්පත් පහසුකම්ද නොඅඩුව ලබාදෙයි. එසේ වන්නේ තමන්ගේ ‘පුහු සිහිනය’ වන ‘දමිළ දේශය’ යන නාමය ප්රචාරය කරගැනීමට හැකිවන හෙයිනි. කණ්ඩායමේ ක්රීඩකයන්ද ඒ සඳහා තම උපරිම සහයෝගය ලබා දෙන්නේ තරග ජයග්රහණය කිරීම හරහාය. එසේම ක්රීඩා කණ්ඩායමකට මෙම ‘ටැමිල් ඊළාම්’ නාමය තැබූ ප්රථම වතාවද මෙය වෙයි.
මේ වන විට ඣභෂත්් සංවිධානයේ කණ්ඩායම් 59 අතරින් ‘ටැමිල් ඊළාම්’ කණ්ඩායම තම දක්ෂතා අතින් ඉහළින්ම සිටින බැව්ද පැවසෙයි. එසේම මෙම ‘ඊළාම් දේශය’ නාමය භාවිත කිරීම ගැන මෙතෙක් කිසිදු විරුද්ධත්වයක්ද ප්රකාශ වී නොමැත. කෙසේ හෝ ඉදිරියේදීත් එම කණ්ඩායම තරගවලින් සඳහා ඉදිරිපත් වන්නේද ‘ටැමිල් ඊළාම්’ නමිනි. ලෝක කුසලානය සඳහා තරග රැසකට සහභාගි වීමට නියමිතය. තරගයන් ජයග්රහණය කළ විට ‘දෙමළ ඊළම’ දින්නා හා මානසිකත්වයක් ඩයස්පෝරාවට ඇතිවනු ඇතිය.
ප්රියන්ත හෙට්ටිගේ
