පසුගිය වසර ගණනාව මුළුල්ලේම දෙහිවල- ගල්කිස්ස යනු එක්සත් ජාතික පක්ෂයේ අණසක පැතිරවූ ආසනයකි. නමුත් දෙහිවල- ගල්කිස්ස ආසනය සඳහා තරුණ නායකත්වයක් නොමැති වීමය. එම ප්රදේශයේ එජාප පාක්ෂිකයන් බොහෝ දෙනකු තුළ වූ ප්රධාන ගැටලුවක් විය. වසර ගණනාවක් පුරා එක්සත් ජාතික පක්ෂය වෙනුවෙන් දෙහිවල- ගල්කිස්සට තරග වැදි සාම්ප්රදායික නායකත්වය පාක්ෂිකයන්ට එපා වී තිබෙන ආකාරයක්ද පසුගිය කාලයේදී දැක ගත හැකි විය. එක්සත් ජාතික පක්ෂයෙන් වෙන්ව ජාතික සමඟි බලවේගය ලෙස නව ගමනක් යෑමට සජිත් ප්රේමදාස මහතා ප්රමුඛ එජාපයේ හිටපු ප්රබලයන් රැසක් තීරණය කිරීමත් සමඟ දෙහිවල- ගල්කිස්ස ආසනය සඳහාද නව නායකත්වයක් පත් වී තිබීම කැපී පෙනෙන කරුණක් වී ඇත. ජාතික සමඟි බලවේගයේ දෙහිවල- ගල්කිස්ස ආසනයේ සංවිධායකවරයා වශයෙන් මෙවර මහ මැතිවරණයට ඉදිරිපත් වී ඇත්තේ චන්න විකුම් මහතාය. මේ මෙවර මැතිවරණය සම්බන්ධයෙන් චන්න විකුම් මහතා දක්වන අදහස්ය.
හැමෝම දන්න විදියට චන්න විකුම් කියන්නේ ප්රබල එක්සත් ජාතික පාක්ෂිකයෙක්. නමුත් මෙවර ඔබ මැතිවරණයට ඉදිරිපත් වෙන්නේ ජාතික සමඟි බලවේගය යටතේයි. මොකක්ද ඒකට හේතුව?
පසුගිය ජනාධිපතිවරණය අවසන් වීමත් එක්ක මෙවර මැතිවරණය සඳහා නව නායකත්වයක් යටතේ ඉදිරිපත් විය යුතුයි කියන මතයේ තමයි අපි වගේම එක්සත් ජාතික පක්ෂයේ පාක්ෂිකයොත් හිටියේ. සජිත් ප්රේමදාස මහතාගේ නායකත්වය යටතේ නව සන්ධානයක් යටතේ මහ මැතිවරණයට ඉදිරිපත් වෙන්න පක්ෂයේ කෘත්යාධිකාරී මණ්ඩලයේ අනුමැතියත් හිමි වෙලා තිබුණු පසුබිමක ලකුණක් මුල් කර ගෙන කිහිප දෙනෙක් ඇති කරපු ප්රශ්නයක් හින්දා මේ විදියට වෙනම තරග කරන්න අපිට සිද්ධ වුණා. ඇත්තටම අපි වගේම එක්සත් ජාතික පාක්ෂිකයොත් මේ වෙනස ඉල්ලුවා. එක්සත් ජාතික පක්ෂය කියන්නේ මේ රට හැදුව පක්ෂය. ඒ වගේ සාඩම්බර ඉතිහාසයක් තිබුණු පක්ෂය පසුගිය අවුරුදු 25 පුරාම එක තැන පල් වෙන බවක් තමයි තිබුණේ. ඒ තත්ත්වය වෙනස් කරන්න නම් තරුණ නායකත්වයක් අවශ්ය බව අපි හැමෝම විශ්වාස කළා. ඒ වෙනුවෙන් තමයි මේ තීරණය අරන් තියෙන්නේ.
නමුත් පසුගිය වසර පහ තුළදී ආණ්ඩුවේ ප්රධාන බලවේගය වෙලා තිබුණේ එක්සත් ජාතික පක්ෂය නේද?
2015දී ආණ්ඩු බලය ලබා ගන්න අපිට පුළුවන් වුණත් ජනතාව බලාපොරොත්තු වුණු වෙනස සිදු කරන්න අපිට බැරි වුණා. ඒ හින්දා එක්සත් ජාතික පාක්ෂිකයන් වගේම අපිට ඡන්දය ලබා දුන්නු මධ්යස්ථ මතධාරීනුත් දැඩි කලකිරීමකින් තමයි හිටියේ. ලබා ගත්ත ආණ්ඩුවෙන් වගකිව යුතු නායකත්වයක් හරහා ජනතාවට නියම වටිනාකම ලබා දෙන්න බැරි වුණා. ඒ නායකත්වයත් එක්ක මේ ගමන තවත් ඉස්සරහට යන්න බැරි හින්දා තමයි අපි මේ විදියට වෙන් වුණේ.
ඔබ නියෝජනය කරන්නේ දෙහිවල- ගල්කිස්ස ආසනය. පසුගිය කාලය මුළුල්ලේම එහි බලය හිමි වෙලා තිබුණේ එක්සත් ජාතික පක්ෂයට. ඒ ආසනයේ ජනතාවටත් එක්සත් ජාතික පක්ෂයෙන් නිසි සැලකිල්ල ලැබුණේ නැහැ කියලද ඔබ කියන්නේ?
ඇත්තටම ඔව්. පසුගිය කාලය පුරාම දෙහිවල ගල්කිස්ස ප්රදේශයේ එකම නායකත්වයක් තමයි තිබුණේ. පසුගිය වසර 40 පුරාම එකම පිරිසක් තමයි අපේ ප්රදේශයේ එක්සත් ජාතික පක්ෂයේ නායකත්වය හෙබවූවේ. ඒ හින්දා ජනතාව දෙහිවල- ගල්කිස්සටත් අලුත් තරුණ නායකත්වයක් ඉල්ලමින් හිටියා.
දෙහිවල- ගල්කිස්ස ආසනයේ ජාතික සමඟි බලවේගය ආසන සංවිධායකවරයා විදියට තමයි ඔබ මෙවර මහ මැතිවරණයට තරග වදින්නේ. මේ තනතුර දරන්න ඔබට තියෙන සුදුසුකම මොකක්ද?
දෙහිවල- ගල්කිස්ස මහ නගර සභාවේ නාගරික මන්ත්රීවරයකු ලෙස ජනතාවට කරපු සේවය තමයි ඒ සඳහා ප්රධාන සුදුසුකම. මොකද දෙහිවල ගල්කිස්ස මහ නගර සභාව ගැන කතා කරද්දී බොහෝ දෙනෙක්ට මතක් වෙන්නේ වංචාව. බොරුව. ඒ වගේම රාජ්ය දේපොළ අයථා පරිහරණය. ඒ ක්රමය වෙනස් කරලා කිසිම චෝදනාවක් නැතිව පක්ෂ විපක්ෂ හැමදෙනාගේම ආදරය දිනා ගෙන ජනතාවට සේවය කරන්න මට පුළුවන් වුණා. ඒ වෙනුවෙන් ජනතාවගෙනුත් මට විශාල ප්රසාදයක් ලැබුණු හින්දා තමයි ආසනයේ ප්රධාන සංවිධායකවරයා ලෙස මාව පත් කරන්න පක්ෂ නායකත්වය තීරණය කළේ.
ඔබ මේ වෙනතුරු දෙහිවල ගල්කිස්සට කරලා තියෙන සේවය ගැන කතා කළොත්?
මගේ මූලිකත්වයෙන් පිහිටුවලා තියෙන චන්න විකුම් පදනම හරහා ජනතාවට විශාල සේවයක් කරන්න පුළුවන් වෙලා තියෙනවා. ඒ හරහා පාසල් අධ්යාපනය වෙනුවෙන් විශාල වැඩ කොටසක් කරලා තියෙනවා. ඒ වගේම අඩු ආදායම්ලාභී ජනතාව වෙනුවෙන් හැකි උපරිමය කරලා තියෙනවා. ගැබිනි මාතාවන්, කුඩා දරුවන් ඇතුළු හැම දෙනාටම විශාල සේවයක් කරන්න මට හැකියාව ලැබිලා තියෙනවා.
දෙහිවල ගල්කිස්ස ප්රදේශයේ ජනතාව වෙනුවෙන් ඉදිරියේදී ප්රමුඛතාව ලබා දෙන්නේ ඕනෑ මොන වගේ කටයුතුවලට කියලද ඔබ හිතන්නේ?
ඊයේ පෙරේදා තිබුණු වැස්සටත් දෙහිවල ගල්කිස්ස යට වුණු විදිය අපි දැක්කා. ඇත්තටම පසුගිය අවුරුදු 25ටම මේ ප්රදේශය නිසියාකාරව සංවර්ධනය වෙලා නැහැ. කොළඹ, කඩුවෙල වගේ ප්රදේශ වේගයෙන් සංවර්ධනය වුණාට ඒ සංවර්ධනය දෙහිවල ගල්කිස්සට ආවේ නැහැ. ඒ හින්දා දෙහිවල ගල්කිස්සටත් ඒ සංවර්ධනය ගේන එක තමයි මගේ එකම බලාපොරොත්තුව. ඉදිරි මැතිවරණයේදී අපි ලබා ගන්න රාජ්ය බලය තුළින් ඒ සංවර්ධනය ඉක්මනටම දෙහිවල ගල්කිස්සට ගෙන එන බවත් මම කියන්න කැමැතියි. ඒ වගේම මත්ද්රව්ය උවදුරට බිලි වෙලා ඉන්න තරුණ පරපුර ඉන් මුදවා ගන්නත්, කැළි කසළ ප්රශ්නයට නිසි විසඳුමක් ලබා දෙන්නත්, රැකියා නැති තරුණ තරුණියන් වෙනුවෙන් රැකියා ලබා දීමටත් ප්රමුඛතාවය දෙන්න මම බලාපොරොත්තු වෙනවා.
සජිත් ප්රේමදාස මහතා සමඟ එකතු වෙලා යන මේ අලුත් ගමනට සහයෝගය ලබා දෙන්න ජනතාව සූදානම් කියලද ඔබ හිතන්නේ?
අනිවාර්යයෙන්ම. දෙහිවල ගල්කිස්ස ආසනය හැමදාම එක්සත් ජාතික පක්ෂය දිනුවා. වර්තමාන නායකත්වය අවුරුදු 40ක් තිස්සේ පාක්ෂිකයන් හිර කරලා තියෙන්නේ. ඒ හින්දා දෙහිවල ගල්කිස්සේ ජනතාව වෙනසක් ඉල්ලමින් හිටියා. දැන් ඒ වෙනස සිද්ධ වෙලා තියෙනවා. ඒ හින්දා මෙවර මැතිවරණයෙන් සමඟි ජන බලවේගයට අති විශිෂ්ට ජයග්රහණයක් හිමි කර දෙන්න දෙහිවල ගල්කිස්සේ ජනතාව සූදානමින් ඉන්න බව මට හොඳටම විශ්වාසයි.
අවසන් වශයෙන් ජනතාවට මොනවද කියන්න තියෙන්නේ?
අපි ජනතාව ඉල්ලුව වෙනස සිද්ධ කරලා තියෙන්නේ. එක්සත් ජාතික පක්ෂය කියන්නේ මේ රටට වැඩිම වැඩක් කෙරුව පක්ෂය. නමුත් වර්තමාන නායකත්වය එජාපය බෝඞ් ලෑල්ලක් කියන තැනට පත් කරලා. ඒ හින්දා අගෝස්තු 05 වැනිදායින් පස්සේ සජිත් ප්රේමදාස මහතාගේ නායකත්වය යටතේ රට ගොඩනඟන අළුත් ගමනට එකතු වෙන්න කියලා මම ජනතාවට ආරාධනා කරනවා. ඒ වගේම දැන් අපි ඉන්නේ 21 වැනි සියවසේ පළමු කාර්තුවේ අවසන් අදියරේ. ඒ හින්දා වර්තමානයට ගැළපෙන විදියට ආගම්වාදයෙන්, ජාතිවාදයෙන් මිදිලා ලෝකය පිළිගන්න අලුත් නායකත්වයක් රටට ලබා දීමේ හැකියාව තියෙන්නේ සජිත් ප්රේමදාස මහතා ප්රමුඛ අපේ කණ්ඩායමට විතරයි කියන එකත් මම මේ වෙලාවේ ජනතාවට මතක් කරනවා.
චන්දන පොන්නම්පෙරුම
