විදුලි බිල 33%කින් අඩු කිරීමට හැකියාව තිබියදී එය 21.9%කින් පමණක් අඩුකිරීමෙන් පාරිභෝගිකයන්ගේ ජීවන බර අඩුවීමක් සිදු නොවන බවත්, මෙම අසාධාරණය සිදුකළ විදුලිබල මණ්ඩලයේ නිලධාරීන්ට විරුද්ධව රජය පියවර ගත යුතු බවත් විදුලිය පාවිච්චි කරන්නන්ගේ සංගමයේ ජාතික ලේකම් සංජීව ධම්මික මහතා ‘මව්රට’ට පැවැසීය. (Sri Lanka Latest News)
නැතහොත් තම සංගමය ඊට එරෙහිව අධිකරණ ක්රියාමාර්ගයකට එළැඹෙන බවද ඔහු සඳහන් කළේය.
පසුගිය වසරේ විදුලිබල මණ්ඩලය රුපියල් බිලියන 61.2ක ලාභයක් ලබා ඇතත්, එම ලාභය අමතක කර දමා අදාළ නිලධාරීන් පාරිභෝගික ජනතාවට අසාධාරණයක් සිදුකොට ඇති බවයි ඔහු පවසන්නේ.
මීට පෙර ඔවුන් ජනතාවට ලබාදීමට සූදානම් වූයේ 3.34%ක සහනයක් බව පෙන්වා දෙන එම සංගමය, පසුගිය මස 15 වැනි දින ඒ පිළිබඳ සිදුකළ ජනමත සමීක්ෂණයේදී එල්ලවූ බලපෑම මත මෙවැනි අන්දමේ විදුලි බිල අඩුකිරීමක් සිදුකළද, එය ප්රමාණවත් නොවන බවද සඳහන් කර ඇත.
පසුගිය වසරේ ජනවාරි මාසයේ විදුලි බිල 60%කින් වැඩිකළ බවත්, එය ජූලි 01 වැනිදා 14%කට අඩුකර නැවත ඔක්තෝබර් 19 වැනිදා 18%කින් වැඩිකළ බවත් ධම්මික මහතා පැවැසීය.
එම තත්ත්වය මත විදුලි බිල්පත් ගෙවාදැමීමට මහජනතාව සිය රන් ආභරණ උකසට තැබීමට පවා පෙළඹුණු බවයි ඔහු පවසන්නේ.
දැනට වාර්තා වන අන්දමට විදුලි බිල්පත් නොගෙවීම හේතුවෙන් පාරිභෝගිකයන් ලක්ෂ 10කගේ පමණ විදුලිය විසන්ධි කර ඇති බවද සංජීව ධම්මික මහතා පැවැසීය.
ප්රේමලාල් විජේරත්න
