නිවාඩු ලබාගෙන ගමට යන ඇතැම් හමුදා සාමාජිකයන් සංවිධානාත්මක අපරාධකරුවන්ගේ ග්රහණයට නතුව ඇද්ද යන්න ගැන රහසිගත තොරතුරු ඔස්සේ හමුදා බුද්ධි අංශ විශේෂ විමර්ශනයක් පවත්වාගෙන යයි.
සංවිධානාත්මක අපරාධකරුවන් ගැවසෙන පළාත්වල සිටින ඇතැම් හමුදා සාමාජිකයන් තම ගම් ප්රදේශවල සාදවලට සහභගි වීමට යෑමේදී ඔවුන් නොදැනුවත්ම මෙවැනි වැරැදිවලට හසුවන බවට ලැබී ඇති තොරතුරු අනුව මෙම පරීක්ෂණ ආරම්භ කොට තිබේ.
මේ සම්බන්ධයෙන් යුද හමුදා මාධ්ය ප්රකාශක මේජර් ජෙනරල් රසික කුමාර මහතාගෙන් විමසූ විට ඔහු සඳහන් කළේ එවැනි පසු විපරම් පරීක්ෂණයක් සිදුකරන බව සත්යයක් වුවත්, සමස්ත හමුදා නිලධාරීන් ගැනම එවැනි පරීක්ෂණ සිදුකිරීම අපහසු බවයි.
එහෙත් ඇතැම් හමුදා සාමාජිකයන්ගේ ගම් ප්රදේශවලින් ලැබෙන රහසිගත තොරතුරු මත අදාළ හමුදා සාමාජිකයන් ගැන බුද්ධි අංශ මගින් පරීක්ෂණ සිදුකරන බවයි ඔහු සඳහන් කළේ.
මේ අතර දැනට නිවාඩු ගොස් යළි සේවයට වාර්තා කොට නොමැති හමුදා සාමාජිකයන්ට සිය කැමැත්තෙන් භාරවීමට හැකි වන පරිදි පොදු සමා කාලයක් ප්රකාශයට පත්කරන ලෙස ආරක්ෂක බලධාරීන්ගෙන් ඉල්ලීමක් කොට ඇති බවද හමුදා මාධ්ය ප්රකාශකවරයා පැවැසීය.
ප්රේමලාල් විජේරත්න
