කොළඹ ජාතික රෝහලට සායන සඳහා ප්රතිකාර ලබාගැනීමට දිනපතා පැමිණෙන දහස් ගණන් රෝගීන්ට රෝහල් අභ්යන්තරයේ පවතින පරිපාලන දුර්වලතා දවසින් දවස වැඩිවීම නිසා රෝගීන් දැඩි අපහසුතාවට පත්ව ඇති බව රෝගීන් පවසයි. (Sri Lanka Latest News)
වෛද්ය පරීක්ෂණවලට අදාළව පැය 12ක් නිරාහාරව සිට ලේ සාම්පල ලබාදීමට එහි පැමිණෙන රෝගීන්ගේ ලේ සාම්පල ලබාගැනීමද පැය දෙක තුන ප්රමාද වන බවයි ඔහුන් පවසන්නේ.
ලේ සාම්පල ලබාගැනීමට යොදවා ඇති සෞඛ්ය නිලධාරීන් කලට වේලාවට නොපැමිණීම නිසා ඒවා ලබාගන්නා කාලවේලාවන් ප්රමාදය වෛද්ය වාර්තාවට බලපෑමක් ඇතිවිය හැකි බවයි රෝගීන් පෙන්වා දෙන්නේ.
මේ අතර හෘද රෝගීන්ගේ සායනය සඳහා වෛද්යවරුන් උදේ 7.30 සිට රෝගී පරීක්ෂාවේ යෙදුණද ආපසු දිනයක් ලබාගැනීමේ පමාව මෙන්ම උදේ 8.30 වනවිටත් විවෘතව පවතින්නේ එක් ඖෂධ නිකුත් කිරීමේ කවුළුවක් බවද රෝගීන් පවසනවා.
තවත් කවුළු පහක් පමණ ඇතත් වේලාවට ඖෂධවේදීන් නොපැමිණ කාඩ්බෝඩ්වලින් කවුළු වසා දමා ඒවා විවෘත කිරීමට පමාවන බව හෙළිව තිබේ.
ජාතික රෝහලේ දුරකතන සේවාවන් සඳහාද සේවක හිඟය වසර හයක් තිස්සේ නොවිසඳී ඇති බව එහි සේවකයන් පවසනවා.
දුරකතන දිගුවන් 50ක් සහ අභ්යන්තර සම්බන්ධතා 2,500කට අධික සංඛ්යාවක් ඇතත් එහි සේවාවන් සඳහා 18 දෙනකුගේ අවශ්යතාව ඇතත් යොදවා ඇත්තේ 6 දෙනකු පමණක් බවයි සේවකයන් පවසන්නේ.
වසර හයක් තිස්සේ අදාළ ඇබෑර්තු හිස්ව පැවැතීම ගැන සෞඛ්ය බලධාරීන්ගේ අවධානය මෙතෙක් යොමුවී නැති බවද වාර්තා වේ.
මේ සම්බන්ධයෙන් ‘මව්රට’ ජාතික රෝහලේ උසස් නිලධාරියකුගෙන් විමසූ විට ඔහු සඳහන් කළේ ඒ පිළිබඳ සොයාබලා අමාත්යාංශයට කරුණු වාර්තා කරන බවයි.
ප්රේමලාල් විජේරත්න
