වසර කීපයක් ප්රමාද වූ පළාත් සභා මැතිවරණය ලබන වසරේ මාර්තු මස අවසානයේදී හෝ අප්රේල් මස මුල් සතියේදී පැවැත්වීමට ආණ්ඩුව සැලසුම් කර තිබේ.
ජනාධිපතිවරණය පැවැත්වීමෙන් පසු හැකි ඉක්මනින් මහ මැතිවරණය, පළාත් පාලන මැතිවරණය සහ පළාත් සභා මැතිවරණය පවත්වා අවසන් කරන බවට ජනාධිපතිවරයා ප්රකාශ කොට තිබුණත්, ඉකුත් පළාත් පාලන මැතිවරණයෙන් ලැබුණු නොසිතූ ප්රතිඵලයත් සමග පළාත් සභා මැතිවරණය පැවැත්වීම කල්දැමීමට ආණ්ඩුව මීට පෙර තීරණය කොට තිබිණි.
කෙසේ වෙතත් මේ වනවිට රට ඇතුළේ මතුවෙමින් පවතින දේශපාලන වාතාවරණය හමුවේත්, විශේෂයෙන්ම ජාත්යන්තර මූල්ය අරමුදල විසින් ආණ්ඩුවට ඉදිරිපත් කොට ඇති කොන්දේසි හමුවේත් ආණ්ඩුවේ තීරණය වී ඇත්තේ හැකි ඉක්මනින් පළාත් සභා මැතිවරණය පවත්වා අවසන් කිරීමටය.
මූල්ය අරමුදලේ කොන්දේසිවලට අනුව ලබන අප්රේල් මාසයෙන් පසු ජනප්රිය නොවන තීන්දු තීරණ රැසක් ගැනීමට ආණ්ඩුවට සිදුව ඇති නිසා ඊට ප්රථම පළාත් සභා මැතිවරණය පවත්වා අවසන් කිරීම ආණ්ඩුවේ සැලසුම වී ඇත.
ඒ අනුව පළාත් සභා මැතිවරණය මාර්තු මස අග හෝ අප්රේල් මස මුල පැවැත්වීම සම්බන්ධයෙන් වන අවසන් තීන්දුව ලබන ජනවාරියේ ජනාධිපති අනුර කුමාර දිසානායක මහතා විසින් ගැනීමට නියමිතව ඇත.
