ඇගේ සුන්දර රූපය මෙන්ම රංගන හැකියාවත් නිසාම, ඔබට ඇයව පුංචි තිරයේ කොහේ හෝ අවස්ථාවක දැක ඇති බවට සැකයක් නැහැ. නිරූපිකාවක් ලෙස කලා ලොවට පාතබා, අද වනවිට රංගන ශිල්පිනියක් ලෙස තම හැකියාවන් විහිදුවමින් ඉදිරියට යන ඇය නමින් ඉෂාරි කුමාරසිංහ. දුර ගමනක් යන්න බලාපොරොත්තු වෙන ඇයගෙ ඒ බලාපොරොත්තු වගේම අලුත් කලා තොරතුරු දැනගන්න ඉෂාරිව අපගේ කතාබහට එකතු කරගන්න අපි හිතුවා.Sri Lanka Latest News
මුලින්ම ඔබට සුබ උපන්දිනයක් කියලා අපි සුබ පැතුම් එක් කරනවා. ඉතින් ඉෂාරි මොනවද මේ දවස්වල වැඩකටයුතු?
බොහොම ස්තුතියි. මේ දිනවල අලුතින් එන්න තියෙන ටෙලිනාට්යයක රූගත කිරීම්වලට සහභාගි වන ගමන් සුපුරුදු පරිදි මගේ පොටෝ ෂූට්වල කටයුතු කරගෙන ඉන්නවා.
‘නිකිණි කුසුම්’ ඔබේ පළමු රංගනයද?
මගේ පළමු නාට්ය නෙමෙයි. නමුත් ‘නිකිණි කුසුම්’ නවෝදාගේ චරිතය ඔස්සේ මම ප්රේක්ෂකයන් අතරට යනවා. එය මගේ රංගන දිවියේ හැරවුම් ලක්ෂ්යයක්. ඉතින් ‘නිකිණි කුසුම්’ නවෝදා කිව්වම තමයි මාව ගොඩක් අය හඳුනාගන්නේ.
‘නිකිණි කුසුම්’ සඳහා අවස්ථාව ලැබෙන්නේ කොහොමද?
මම තුෂාර තෙන්නකෝන් සර්ගේ ‘රාවණා’ නාට්යයේ ඔඩිෂන්වලට යනවා. එතැනින් මට සර්ව හඳුනාගන්න ලැබෙනවා සර්ගේ රාවණා නාට්යයට සම්බන්ධ වීමෙන්. රාවණා නාට්යයේ රූගත කිරීම් අවසන් වෙනවාත් සමගම නරේන්ද්ර අයියා සහ එරංග අයියා තමයි කිව්වේ සර්ගේ අලුත් වැඩක් පටන් ගන්න යනවා. පොඩ්ඩක් අහලා බලන්න කියලා. එතැනින් තමයි තුෂාර සර් මට ‘නිකිණි කුසුම්’ නවෝදාගේ චරිතයට අවස්ථාව ලබාදෙන්නේ.
ඉෂාරි මේ ෆීල්ඩ් එකට එන්නේ කොහොමද?
නිරූපණය ගැන හදාරමින් නිරූපණය ක්ෂේත්රයට පිවිසෙනවා. ඉන් පසුව තමයි රංගනය ගැනත් හදාරන්න පටන් ගන්නේ.
සැබෑ ජීවිතේ ඉෂාරි, නවෝදා වගේද?
බොහෝ දෙනා මගෙන් අහලා තියෙනවා නවෝදා වගේද කියලා. ඒ කාලේ පෙනුමින් මගේ ශරීරයේ කෙට්ටු ගතිය සහ තිබුණු නපුරු පෙනුම නිසා නවෝදා වගේ කියලා හිතුණට මගේ ජීවිතේ නවෝදා වගේ නෙමෙයි.
ෆීල්ඩ් එකට ඇවිත් වැඩි කාලයක් නැහැ නේද?
ෆීල්ඩ් එකට ඇවිත් අවුරුදු පහ හයක් වෙනවා. ෆීල්ඩ් එකේ මම ගොඩක් හැලහැප්පීම් එක්ක හෙමින් ගමනක් යනවා. තව ඉස්සරහට මට දුර ගමනක් යන්න තියෙනවා. මේ වෙද්දී රාවණා, නිකිණි කුසුම්, එන්කවුන්ටර්, තුන්පනේ, පොහොය නාට්යයන් සඳහා රංගන දායකත්වය ලබාදීලා තියෙනවා.
ප්රථම රංගන අත්දැකීම මතකද?
අපේ පන්තියේ ටෙලිනාට්යයක පොඩි ෂූට් එකක් තිබුණා. එහිදී ලොකු දෙයක් මට කරන්න නොතිබුණත් ඒක තමයි මගේ පළමු අත්දැකීම වුණේ. ඉන් පස්සේ වෙළෙඳ දැන්වීමක ප්රධාන චරිතයක් නිරූපණය කරන්න අවස්ථාව හම්බවුණා. ඒ දවසේ නම් පොඩි බයක් ඇති වුණා.
දිගටම ක්ෂේත්රයේ ඉන්නද අදහස?
කලා වැඩකටයුතු සමග සමබරව කරගෙන යන්න පුළුවන් ජොබ් එකක් ලැබෙනවා නම් මම කැමැතියි.
ඔබ නිරූපණය කරන්න කැමැති චරිත තියෙනවාද?
මම ප්රේක්ෂකයාට දැනෙන වෙනස් චරිත කරන්න කැමැතියි. වෙනස් චරිතයක් හම්බ වුණොත් ඒකේ කතාව, ගුණාත්මක බව සහ මට ඒ චරිතයට සාධාරණයක් කළ හැකිද කියලා බලලා චරිත භාර ගන්නවා.
පවුලේ අයගෙන් ලැබෙන සහයෝගය?
මුල් කාලේ නම් ගෙදර අයගෙන් කැමැත්තක් තිබුණේ නැහැ. පවුලේ කිසි කෙනෙක් කලාවට සම්බන්ධත් නැහැ. නමුත් ටෙලිවිෂනයෙන් මාව දකිද්දි වැරදි පාරක ගිහින් නැහැ කියලා එයාලා දැන් මට උපරිම සහාය දෙනවා.
මේ ක්ෂේත්රයේදි බොහෝ විට කටකතා හැදෙන්න පුළුවන් නේද?
කටකතා හැදෙන එක සාපේක්ෂයි. ඕනෙ කෙනෙක්ට ඕනෙ විදිහට හිතෙන්න දකින්න දේවල් කියන්න පුළුවන්. නමුත් අපේ හැසිරීම්වලින් සහ සමාජයේ ඉන්න විදිහත් එක්ක ඇත්තද බොරුද කියලා ඔප්පු වෙනවා. ජීවත්වන විදිහ එක්ක තමයි ඒවයේ සත්යතාව ඔප්පු වෙන්නේ.
ඔබ ආදරවන්තියක්ද?
ආදරය දිහා හොඳින් දැක්කොත් හොඳයි. නරක විදියට දැක්කොත් නරකයි. අවංකව ආදරය දෙන්න. අපේ ආදරයෙන් කෙනෙක් මගහැරෙනවා නම් ඒ වෙන්නෙත් හොඳට කියලා තමයි මගේ අදහස. ඉතින් මම දැනට ආදරවන්තියක් නෙමෙයි.
ඉදිරි නිර්මාණ කටයුතු?
ඉන්ටර්නැෂනල් කෙටි චිත්රපටයක් හා තව සිනමා නිර්මාණයක් ඉදිරියට එන්න තියෙනවා. අලුත් ටෙලි නාට්ය කිහිපයක් විකාශනය වීමට තියෙනවා.
