ඒ අපූරු රාජධානියෙහි කිරුළු පළඳින්නට කළින් කලට දශකයෙන් දශකයට සොඳුරු ඉන්දීය කෙල්ලන් තොරක් නැතිව පෙළ ගැසිණි. මධුරි ඩික්සිත් යනු එලෙස පෙළ ගැසුණු එක් සුපිරි රැජිනකි. කවියන් සුලලිත ගැහැනු කට වර්ණනා කළ සේම මධුරිගේ රූ සපුව සුකුමාල විය. ‘ගැහැනියක තවත් ගැහැනියකගේ රුව වර්ණනා කිරීමට නිරතුරු පසුබට වෙතැයි පැරැන්නන් පවසා තිබුණද…
ශ්රී දේවි ‘ෆිල්ම්ෆෙයාර්’ සඟරාව හමුවේ කළ කතිකාවකදී කිසිදුම ලෝබ කමක් නැතිව මධුරිගේ රූ සෝබාව වර්ණනා කොට තිබිණ.
‘මධුරිගේ සුන්දර සිනහව කෙල්ලකට පිහිටන්නේ නම්, ශාන්තුවරයකු වුවද ඇය හමුවේ වශීකෘත වනු ඇතැයි කියාය.
මධුරි ඩික්සිත්ගේ සිනහව ඒ තරමට සුන්දරයිද?
ඔව්… මධුරිගේ ලස්සන සිනහව ඒ තරමට සොඳුරු විය. මධුරි රංගනයෙන් දායක වූ චිත්රපට සියල්ලම පාහේ බොක්ස් ඔෆිස් වාර්තා බිඳ හෙළිය. මදුරි සමග රංගනයෙහි යෙදෙන්නට, ජෝඩු විලාසිතාවට රඟපාන්නට සුපිරි පිරිමි තරු පොර බැදුවෝය.
ඒ පිරිමි සුපිරි තරු අතර ඛාන් තුන් කට්ටුව මූලික විය. මධුරිගේ නළු පෙම්වතා වීමට ඔවුන් තුළ වූයේ බොළඳ කැමැත්තකි. සේරටම වඩා හින්දි චිත්රපට නිෂ්පාදකවරු මධුරි සමග චිත්රපට එකකට, දෙකකට වඩා රඟපාන නළුවන්ට ඔවුන් හා සැලෝලයිට් විලාසිතාවට අනුව ජෝඩු ගැස්සවීම සඳහා කට්වුට්වලටත්, පොකට් කැලැන්ඩර වැනි හුරුබුහුටි මෙවලම්වලටත් ඇති පදමට වියදම් කළේ ලාබ පිට ලාබ ලබමිනි.
1990 ‘දිල්’ චිත්රපටය තිරගත වූයේ මධුරි සමග අමීර් ඛාන්ව පට්ටල් කරවමිනි. එවකට මධුරි අසීමිතව ජනප්රිය තරු විලාසිතාවට බඳුන්ව සිටි අතර, ආමීර් ‘ක්්යාමත්සේ ක්්යාමත්’ රඟපා ජනප්රියත්වයට පා තබමින් සිටියේය.
එනමුදු.., ආමීර් හරිම අපූරුවට ‘දිල්’ හී මධුරිගේ පෙම්වත් පාට් එක ඇක්ට් කළේ තරුණ ඉන්දීය කෙල්ලන් සේම කොල්ලන්වද ප්රේමයෙන් මුසපත් කරවමිනි. ඇතැම් විචාරකයන් කීයේ හින්දි සිනමාව තුළ එතරම් අගේට පෙම් කළ පෙම්වත් යුවළක් තවත් නැති බවය.
එලෙසම යොවුන් කෙල්ලන්, කොල්ලන් ආමීර් සහ මධුරි ඇන්ද, පැළැන්ද විදියට සිය ඇඳුම් පැළඳුම්ද සකසා ගන්නට තරම් උමතුව සිටියහ. මේ අපූරු සිනමාමය ප්රේමයෙහි අගනාම කාරණය වූයේ ආමීර්ට තම නළු වෘත්තිය නොකඩවා ඉදිරියට ගෙන යෑමට මධුරි සමග අත්වැල් බැඳගත් ජෝඩු විලාසිතාව ඉවහල් වූ බවය.
‘යශ් රාජ්’ නිෂ්පාදනය කළ ‘දිල් තෝ පාගල් හේ’ චිත්රපටයෙහි බාධුරි සමග ෂාරුක් කළ රංගනය ඊට දෙවැනි නොවීය. එය ඉතාම මනමෝහනීය නර්තනයක් මැදින් ගලා ගිය සැලෝලයිට් පෙමක් විය. මධුරිගේ සිරියාව පිරි සිනහවට ෂාරුක්ගේ කාන්දමක් වැනි නෙත් කැල්ම එක් වී මැවූ ප්රේමනීය ආලිංගනය, දෙපසට වී සිටි විරසක පෙම්වතුන් නැවැත හාද කරවන තරමේ ආකර්ෂණයක් මවාලුවේය.
‘ෂාරුක් සහ මධුරි’ දෙසැම්බර 31දා රහසේ හමුවේ…
යන සිරස්තලයන් මත පැපරාසින් පද හදවන තරමට මදුරි ෂාරුක් සමග ගැයූ ජෝඩු පෙම අති සාර්ථක විය.
සුපිරි නිළියන් සමග නිතර පෙම් හුටපට ඇතිකර ගත් සල්මන්ද මධුරිගේ සිනමා පෙම්වතුන් අතර ප්රධාන පෙම්වතකු විය.
ඒ අසිරිමත් පෙම් ජවනිකාව විහිද ගියේ ‘සාජන්’ චිත්රපටය හරහාය. වයස් බේදයක් නැතුවම ඉන්දියානු කතුන්ගේ දෑසින් කඳුළු කඩා හැලෙන්නට වූයේ, ‘සාජාන්’ අවසාන ජවනිකාවේ සල්මන්, දෙවියන්ගේ අල්තාරය ඉදිරිපිට මධුරිවත් සංජේ දත්වත් එකතු කර දේවස්ථානයෙන් නික්ම යන තැනදීය.
එලෙසම ‘දිල් තෙරා ආශික්’ සහ ‘හම් ආප්කේ හේ කෝන්’ චිත්රපටද මධුරිගේ කදිම සිනමා පෙම්වතා සල්මන් බව කියා පෑවේ එවකට හුළං හාදු දෙන්නට හුරුව සිටි වග ‘සාජන්’ චිත්රපටයෙහි ප්රචාරක අංශයෙහි ප්රධානීන් එදා පවසා තිබිණි.
මත්කුඩු ඇසුර නිසා වියැකී යමින් තිබූ සංජේ දත්ගේ ජනප්රියත්වය නංවාලීමට මධුරි සංජේට පොරොන්දුව සිටියාය. ඒ සඳහා මධුරි සහ සංජය සහභාගි වන රියැලිටි වැඩසටහන්ද ඉන්දීය රූපවාහිනී සේවා හරහා ප්රචලිත විය.
ඒ සඳහා සංජේ වෙනුවෙන් මධුරි ප්රේමනීය වූ මෙහෙවරක් කළාය. එකී මෙහෙවර කෙතරම් සංවේදී ද කියනවා නම් සංජේ හා විවාහ වී සිටි ඒවා ෂර්මා සහ ඇගේ පියා එම රූපවාහිනී දර්ශන නවතා දමන ලෙස පළමුව සංජේගෙන්ද දෙවනුව මධුරිගෙන්ද ඉල්ලා සිටියහ.
මොහොබ්බත් හරහා මනහර පෙම්වතකු වූ අනිල් කපූර්ද මධුරිගේ සිනමා පෙම්වතකු ලෙස ආකර්ෂණය දිනා ගත්තෙකි.
‘ඒක් දෝක් තීන්’ ගීතය සමග රසික ආකර්ෂණයට බඳුන් වූ තේෂාබ් හී අනිල් මුදු සමුදු පෙම්වතකු නොවුණද එහි බොහෝ දර්ශනයන් තුළ ඔවුන්ගේ නෙතඟ බැල්ම සහ සියුම් හාදු ඉන්දියානු ගැටවරයන්ගේ සහ ළමිස්සියන්ගේ සිත් ඔකඳ කොට තිබිණි.
අනිල් සහ මධුරි අතර පෙම් සබඳතාවක් නොවන මිතුදමකට එහා ගිය සමීප බැඳීමක්ද ඇති විය.., එම බැඳීමෙහි සංවේදී බව කෙතරම්දැයි යත්, මධුරිට අමිතාබ් බච්චන් වැනි සුපිරි තරුව සමග රඟපෑමටද තහංචි වැටිණි. එම තහංචියෙහි හේතු පාඨය වූයේ අනිල් සහ අමිතාබ් අතර වූ රහස්යමය කෝන්තරයකි.
–දමයන්ති රේණුකා ප්රනාන්දු