මෙගාද, ආර්ට්ද කියන එක අදාල නැහැ…
කලාව කියන්නෙ මගේ ජීවිතේ කොටසක්…
මට ගමත් එක්ක තියෙන්නෙ හැඟීම්බර වූ අභීතකාමී මතකයක්…
වර්තමානයේ රට තුළ ඇති වාතාවරණයත් එක්ක ටෙලිනාට්ය, සිනමා ක්ෂේත්රයේ නිෂ්පාදකවරුන් නිර්මාණ කරණයට යොමු වෙන්නේ ටිකක් ඇල් මැරුණු ගතියකින්. ඔය අතරේ තිබෙන අභියෝග ජය ගනිමින් ඒ සියල්ලටම මුහුණ දෙමින් අලුත් නිෂ්පාදන ආයතනයක් (Idea World Film Production) අලුත් තාලේ වැඩකට අතගහලා. චාරුක දිල්හාර අරණායක අධ්යක්ෂණය කරන කුළුඳුල් ටෙලි සිතුවම, ‘වෛතාලේ’ සමඟ වෙනස් ආරේ වෙනස් වැඩකට මුල පුරන්න මුදිත දිනේෂ් අපේ කාලේ සහ ප්රින්ස් මල්දෙණිය එක්ව ගත් උත්සාහය ගැන කතා කරන්න මුදිත දිනේෂ්ව මව්රට හාට් පිටු අතරට එකතු කරගත්තා…
මුදිත දැන් රඟපෑම අතහැර වෙනත් මාවතකට පියනඟන බව ආරංචියක් ආවා..?
මම රංගනයෙන් ඉවත් වෙලා නැහැ. Idea World Film Production ආයතනය මමත් ප්රින්ස් මල්දෙණිය මහතාත් ආරම්භ කරන්නෙ මීට වසර කිහිපයකට කලින්. අපි මෙම නිෂ්පාදන ආයතනය හරහා වෙළෙඳ දැන්වීම්, ගීත රූප රචනා ආදී නොයෙක් නිෂ්පාදන කටයුතු සිදුකළා. ඉතින් අප දෙදෙනාගේම අදහස වූයේ උසස් රසවින්දනයක් සඳහා ගුණාත්මක වූ ටෙලිනාට්යයන් නිෂ්පාදනය කිරීමට. ඉතින් අපි මීට පෙර උත්සාහ දැරුවත් රටේ පැවැති තත්ත්වය උඩ ටිකක් ප්රමාද කළා. ඉතින් මේ වෙද්දි රට හොඳ තත්ත්වයට හැරෙමින් තිබෙන නිසා කල් නොදමා අපි එය නිෂ්පාදනය කරන්නට පටන් ගත්තා.
අධ්යක්ෂවරයා ඇතුළු නිෂ්පාදන කණ්ඩායම තෝරා ගන්නෙ කොහොමද?
චාරුක කියන්නෙ මගේ සමීප මිත්රයෙක්. නමුත් අධ්යක්ෂණය සඳහා මා චාරුකව තෝරා ගත්තේ අපි දෙදෙනා අතර ඇති හිතවත්කම නිසා නෙවේ. හොඳ නිර්මාණයක් කිරීම සඳහා ඔහුට උනන්දුව ඇති බව මට පෙනෙන නිසා. ඉතින් මම බලාපොරොත්තු වෙනවා චාරුක ඔහුගෙ වගකීම අකුරටම කරයි කියා. ඒ වගේම මෙහි තිර පිටපත සුනෙත් වර්ණසූරියගේ. ඉතින් අපිත් එක්ක දක්ෂයෝ පිරිසක් ගොඩවෙලා ඉන්නවා. ඉදිරියේදී සුන්දර නිර්මාණයක් බලාගන්න පුළුවන් වෙයි කියලා හිතනවා.
‘වෛතාලේ’ එක්ක එකතුවෙන රංගන ශිල්පීන් ගැන කතා කළොත්?
දිලිනි ලක්මාලි, චානුක ප්රබුද්ධ, ආනන්ද කුමාර උන්නැහේ, මල්කාන්ති ජයසිංහ, නෙතලි නානායක්කාර, සංජය මොරමුදලි, බට්ටි මනෝහරි, රංගි රාජපක්ෂ, ගාමිණී ජයලත්, රූපා පතිරණ, කීර්ති රත්නායක, ගාමිණී ජයරත්න සහ චින්තක වාස් වැනි ජනප්රිය හා ප්රවීණ රංගන ශිල්පීන් රැසක් මෙම නිර්මාණයට දායක වෙනවා.
‘වෛතාලේ’ ටෙලිනාට්ය තුළින් ඔබ සමාජයට ලබා දීමට උත්සාහ කරන්නේ මොකක්ද?
‘වෛතාලේ’ කියන්නෙ මගෙත්, චාරුකගෙත් කතා සංකල්පයක්. මෙහි කතා වස්තුව ගොඩනැඟීමේදී එයට පාදක කරගත්තේ මහපොළොව සමග ඔට්ටු වෙමින් දහදිය, කඳුළු වගුරුවමින් ජීවත් වන අහිංසක ගැමියාගේ අපි නොදකින ජීවන කතාවයි. මම ගමින් කොළඹට ආපු කෙනෙක් නිසා මට ගමත් එක්ක තියෙන්නෙ හැඟීම්බර වූ අභීතකාමී මතකයන්. ඉතින් මේ නිර්මාණයෙන් මා උත්සාහ කරනවා අපිට මගහැරුණු ගම යළි කරළියට ගේන්නට.
සල්ලි හොයන්න නම් කරන්න ඕනේ මෙගා කියලානේ කතාව තියෙන්නේ. හැබැයි ඔබේ උත්සාහයේ වෙනසක් තියෙනවා?
කලාව කියන්නෙ මගේ ජීවිතේ කොටසක්. අදටත් මේ ක්ෂේත්රය තුළ මා ජීවත් වන්නේම කලාවට ආදරය නිසා. ජනතාව ගොනාට ඇන්දවීම වෙනුවට උසස් රසවින්දනයක් දෙන්න පුළුවන් නම් එය වටිනවා. නාට්යයක් තුළ මෙගාද, ආර්ට්ද කියන එක අදාළ නැහැ. ඇත්තටම අපේ අරමුණ උසස් රස වින්දනයකින් යුත් නිර්මාණයක් බිහිකිරීම.
මුදිත ටෙලිනාට්ය නිෂ්පාදනය කරන අතරතුරම රඟපාන්නත් අදහසක් නැද්ද?
මට ගැළපෙන චරිතයක් තිබුණොත් මම රංගනයෙන් සම්බන්ධ වෙනවා.
ඔබගේ ඉදිරි සැලසුම් මොනවද?
‘වෛතාලේ’ ටෙලිනාට්ය ඉතා ඉක්මනින් වැඩකටයුතු ඉවර කරලා පුළුවන් තරම් ඉක්මනින් එය ප්රේක්ෂකයන් වෙත ගෙන ඒම තමා මේ මොහොතේ ලොකුම බලාපොරොත්තුව. අනාගතයේදී චිත්රපටයක් නිෂ්පාදනය කිරීමටත් බලාපොරොත්තුවෙන් සිටිනවා.
ඔබ සිතනවාද සිනමාවට අත තැබීමට මේ සුදුසු කාලයක් කියලා?
ඒ ප්රශ්නය තුළ තමයි අපි නිෂ්පාදන ආයතනයක් විදියට තාම ඉන්නෙ. මොකද මේ මොහොත වෙද්දිත් ලංකාවේ සිනමා ශාලා අතළොස්සයි බේරිලා තියෙන්නෙ. අපි චිත්රපටයක් නිර්මාණය කරපු දවසට ඒක පෙන්නන්න මේ යන විදියට ගියොත් සිනමා ශාලා ඉතුරු වෙයි කියලා බයක් තියෙනවා. නිර්මාණයක් කරල ඒක ගෙදර තියාගෙන ඉඳලා වැඩක් නෑනේ.
ඔබ හැදෑරීමක් ඇතිවද මේ ගමනට සූදානම් වුණේ?
ඔව්… ඇත්තටම හැදෑරීමක් නොමැතිව එන කිසිම ගමනක් සාර්ථක නැහැ. මම මහේන්ද්ර පෙරේරා මහතා යටතේ රංගනය පිළිබඳව හැදෑරුවා. ඒ වගේම කැලණිය විශ්වවිද්යාලයෙත් ජනමාධ්ය පිළිබඳ උපාධියක් හැදෑරුවා. ඒ වගේම වසර 10ක කාලයක් තුළ ප්රායෝගිකව මේ ක්ෂේත්රයේ වෘත්තීය තුළ නියැළෙමින් බොහෝ ප්රායෝගික හැදෑරීම් ගණනාවක් කළා.
ඔබ ඒ ගත් දැනුම් සම්භාරය මතු පරපුරට බෙදා දීමට සූදානම්ද?
ඇත්තටම ඔව්… එය මම දැනටත් සිදුකරනවා. උසස් පෙළ සන්නිවේදනය සහ මාධ්ය අධ්යාපනය හදාරන සිසුන්ට න්යායාත්මක මෙන්ම ප්රායෝගිකවත් සන්නිවේදන ක්ෂේත්රය ඔවුන්ට ළෙන්ගතු කරමින් උසස් මාධ්ය සාක්ෂරතාවයක් ඇති ශිෂ්ය පරම්පරාවක් බිහිකිරීම වෙනුවෙන් මගේ කාලය හා ශ්රමය කැප කරනවා.
-වසන්ත විතාරණගේ
