ඉතාලියේ අය මම රඟපානවා කියලා දැනගත්තේ සිඳු නාට්යයෙන්…
වර්තමානයේ කලා ක්ෂේත්රයේ ශිල්පීන් කිහිප දෙනෙකු රට හැර යෑමට සූදානම් වෙන මොහොතක ඉතාලියේ ඉඳලා ලංකාවට ඇවිත් රඟපාන්න සිහින දකින රංගන ශිල්පියෙක් අපට හමුවුණා. ඔහු අශෝක අරඹේගෙදර. මේ වන විටත් ජනප්රිය ටෙලිනාට්ය රැසක රංගනයෙන් දායක වී ඇති ඔහුගේ කලා දිවිය ගැන අපි මෙලෙස සටහන් කළා.
ඉතාලියට යන්නද මේ දවස්වල අශෝකගේ සූදානම..?
ඔව්… මම ලංකාවට ඇවිත් මාසයක් විතර වෙනවා. මේ මාසේ නැවැත ඉතාලියට යනවා රාජකාරි කටයුතු සඳහා.
ලංකාවට පැමිණියාට පසු ඔබට නිර්මාණ සඳහා සම්බන්ධ වීමට අවස්ථාව ලැබුණද?
ඔව්… ‘නීල පබළු’ ටෙලිනාට්යයට සම්බන්ධ වීමට අවස්ථාව ලැබුණා. මේ දවස්වල එහි රූගත කිරීම් සඳහා සම්බන්ධ වෙලා තමයි ඉන්නේ. තව රූපවාහිනී වැඩසටහන් කිහිපයකට සම්බන්ධ වීමට ආරාධනා ලැබුණා. ඒත් මට ඒ වැඩසටහන් සඳහා සම්බන්ධ වීමට ලොකු කාලයක් ඉන්න බැරි ප්රශ්නයක් තියෙන්නේ.
කොච්චර කාලයක් ඉඳන්ද ඉතාලියේ ඉන්නේ..?
මම අවුරුදු විස්සක් විතර වෙනවා විදේශගත වෙලා. ඔය අතර ඉතින් අවුරුද්දට සැරයක් විතර ඇවිත් නිර්මාණ සඳහා සම්බන්ධ වෙනවා.
දේවකාරියට වඩා රාජකාරිය උතුම් කියනවානේ. ඉතින් ඔබ මුලින්ම තෝරාගත්තේ කලාවද, එහෙමත් නැතිනම් රාජකාරියද?
මම පොඩි කාලේ ඉඳලා කලා ක්ෂේත්රයට සම්බන්ධ වීමට ආශාවක් තිබුණා. ඒත් මොනදේ කරන්නත් ආර්ථිකය හදාගන්න ඕනෑ කියලා මම හිතුවා. ඒ නිසාම තමයි මම විදේශගත වෙන්න හිතුවේ. මම දැන් ආර්ථික පැත්තෙන් ශක්තිමත්. දැන් ඉතින් හොඳ නිර්මාණ සඳහා යොමුවෙනවා හෙමිහිට.
අශෝක මුලින්ම සම්බන්ධ වුණු නිර්මාණය ගැන පැවැසුවොත්?
‘ස්වර්ණවාහිනී’ වැඩසටහන් අධ්යක්ෂ ජයන්ත අතපත්තු තමයි මාව ජනක සම්පත් මහතාට හඳුන්වා දුන්නේ. ඒ හරහා මම මුලින්ම රඟපෑවේ 2019 විතර ‘ක්වීන්’ ටෙලිනාට්යයේ ‘ප්රොෆෙසර්’ කෙනෙක්ගේ චරිතයක්. නිර්මාණවලින් ආරාධනා එනවා. ඒත් මම වැඩි කාලයක් ලංකාවේ ඇවිත් ඉන්නේ නැති නිසා සම්බන්ධ වෙන්නේ නැහැ. මොකද නිර්මාණය අතරමග දාලා යන්න මම කැමැති නැහැ.
ඔබව ගොඩදෙනෙක් දැනහඳුනන්නේ ‘සිඳූ’ ටෙලිනාට්ය හරහා නේද?
ඔව්… මම රඟපාපු ‘වාසල’ චරිතයට හොඳ ප්රතිචාර ලැබුණා. ‘සිඳූ’ ටෙලිනාට්යය ගොඩදෙනෙක් නරඹන නිසා ඉතාලියේ ප්රේක්ෂකයන් පවා මම රඟපාන බව දැනගත්තේ ‘සිඳූ’ හරහා.
ඔබ රංගනයට වගේම ගායකයෙකු ලෙසත් ගීත කිහිපයක් කර තිබෙනවා නේද?
‘ඔබේ සුවඳ’ තමයි මගේ පළමු ගීතය. ඉන්පසු තබා ගිහින්, මෙතරම් ආදරේ, මගේ හිත හදන කෙනෙක් ඇතුළු ගීත කිහිපයක් මම ගායනා කළා.
විදේශීය ප්රසංග සඳහා ඔබට ලැබෙන ඉල්ලුම කොයි වගේද?
ඉතාලියේ පේනොවා නගරයේ ප්රසංග කටයුතු සඳහා මම අනිවාර්යයෙන් ගීත ගායනා කරනවා. එයට අමතරව ලංකාවේදී සීදුවේ සකුරා, සනිධප සංගීත ප්රසංගවල මම ගීත ගායනා කරලා තියෙනවා.
ඔබ වඩාත්ම කැමැති රංගනයටද ගායනයටද?
රංගනයට වගේම ගායනය පැත්තටත් මම කැමැතියි. මගේ දක්ෂතාවය පෙන්නන්න පුළුවන් කොතැනද මම ඒ හැම පැත්තෙන්ම ඉදිරියට යන්න කැමැතියි.
ඔබ දැන් ආර්ථිකය අතින් සවිමත් කිව්වනේ. එයින් කලාවට යමක් කරන්න අදහසක් නැද්ද?
මගේ බලාපොරොත්තුවක් තියෙනවා ගුණාත්මක ටෙලිනාට්යයක් නිෂ්පාදනය කිරීමට. මම මේ දවස්වල ඒ සඳහා හොඳ නිර්මාණ පිටපතක් සොයමින් තමයි ඉන්නේ. බොහෝ දුරට ලබන වසරේ මම මේ ක්ෂේත්රයට නිෂ්පාදන පැත්තෙනුත් සම්බන්ධ වෙයි.
එතෙර ඉඳලා මෙරට දක්ෂතාවයන් පෙන්නන්නට ඔබට ශක්තියක් වුණු පිරිසකුත් ඇති..?
සඳුන් රාජකරුණා, ජනක සම්පත්, සුරංග සෙනෙවිරත්න, තිළිණ බොරලැස්ස, ප්රදීප් මානවඩුගේ, සුපුන් රත්නායක, ඒ වගේම ‘මව්රට – හාට්’ ජාතික පුවත්පතටත් විශේෂ ස්තුතියක් පුද කරනවා අපි වගේ අයව මේ විදියටහරි රටට හඳුන්වා දෙන එකට.
-වසන්ත විතාරණගේ
