ලකී ඩයස්ගෙන් සැර කතාවක්

මොහු ප්‍රතිභා පූර්ණ සම්මානනීය ජනප්‍රිය රංගන ශිල්පියෙක්. 1980 දශකයේ ජනප්‍රිය ටෙලිනාට්‍ය තරු අතරට එක්වුණ තරුවක් වූ ඔහු ලකී ඩයස්. ඉතින් කාලෙකට පස්සේ ඔන්න මෙම දැවැන්ත නිර්මාණ ශිල්පීය ‘රෂ්’ චිත්‍රපටය හරහා නැවත අප අතරට ඇවිත්. ඉතින් කාලෙකට පස්සෙ ඔහු අප සමඟ ළෙන්ගතු වූයේ මේ විදියට.
කාලෙකට පස්සේ ලකී සිනමාවට එකතු වුණා. කොහොමද ‘රෂ්’ චිත්‍රපටයේ ඔබේ චරිතය වෙනුවෙන් ලැබෙන ප්‍රතිචාර?
එය ගැන නම් කතා කළ යුතුමයි. ‘රෂ්’ චිත්‍රපටය ඉතාමත් සැලැසුම්සහගතව කරපු හොඳ ඒ නිර්මාණයක් එක පාරක් බැලුවොත් තවත් පාරක් බලන්න හිතෙනවා කියලා තමයි හැමෝම කියන්නෙ. ලංකාවෙ සිනමාවට කාලෙකට පස්සේ බලන්න පුඵවන් හොඳ චිත්‍රපටයක් බිහිවුණා. මමත්, සනත් ගුණතිලකත් තමයි මේ චිත්‍රපටයේ පියවරුන්ගේ චරිත රඟපාන්නේ, ලැබෙන ප්‍රතිචාරත් එක්ක මම සතුටින් ඉන්නවා.
ඔබ සිනමාවේ පෞරාණික වස්තුවක් විධියට තමයි මම දකින්නේ. එහෙත් දැන් තිබෙන සිනමාව ගැන මොකද හිතෙන්නේ?
තියෙන්නේ කලකිරීමක් විතරයි. අසූව දශකයේ අප දැකපු සිනමාව දැන් නැහැ. සිනමාව විතරක් නෙමේ ටෙලි නාට්‍ය කර්මාන්ත පවා කඩා වැටිලා ඉවරයි. අපේ ආත්මෙකටවත් කවුරු කිව්වත් මේ කර්මාන්තය ගොඩ ගන්න බැහැ. අතරින් පතර ‘රෂ් ’වගේ හොඳ කලාත්මක නිර්මාණ හැදුණොත් තරුණ පරපුර එකතු වෙයි.
ඔබ ඔය පවසන විදියට චිත්‍රපට සංස්ථාවවත් මේ ගැන අවධානය යොමුකරන්නේ නැතිද?
මොන පිස්සුද? චිත්‍රපට සංස්ථාවට සභාපතිවරුන් විදියට පත්කර ගන්නෙ සිනමාව ගැනවත්, කලාව ගැනවත් නොදන්න පිරිසක්. පැය අටක් ඇවිත් පුටු රත්කරලා ඉඳලා යනවා. එහෙම හොඳ දැනුමක් ඇති පිරිසක් හිටියා නම් ලංකාවේ සිනමාවට අද මේ ඉරණම උදාවෙන්නෙ නැහැ. දේශපාලන බලපෑම් සහ තල්ලු මත තමයි හැම දේම සිදුවන්නේ.
ඔබ කාලයක් චිත්‍රපට නිෂ්පාදනය කළා. ඒත් කාලෙකින් ඔබ නිර්මාණයකට අත ගැහුවේ නැහැ නේද?
පොඩි මිනිහෙක් වෙලත් මම චිත්‍රපට නිෂ්පාදනය කළා. ගාමිණී ෆොන්සේකා අවසානයට රඟපෑවේ ‘අන්තිම රැය’ චිත්‍රපටය වෙනුවෙන් මම ජනාධිපති සම්මාන පවා ලැබුවා.
ඔබේ ජනප්‍රියත්වය නිසාද නිර්මාණවලට සම්බන්ධ වෙන්නේ නැත්තේ?
මම එදා ඉඳලා හිතාගෙන ඉන්නෙ අවුරුද්දට එක චිත්‍රපටයක් සහ ටෙලි නාට්‍යයක රඟපාන්න. ඒ විදියට තමයි මම මේ ගමන ආවේ. ‘ගින්දරී’ චිත්‍රපටය රඟපෑමට පස්සේ තමයි ‘රෂ්’ චිත්‍රපටයට සහ ‘අහස් මාලිගා’ ටෙලි නාට්‍යයට සම්බන්ධ වුණේ.
අද ජනප්‍රිය ශිල්පීන් රැසක් නිහඬවෙලා මෙයට හේතුව ඇයි?
අද ගොඩක් රූපවාහිනී නාළිකා විදේශීය නිර්මාණවලට අහුවෙලා. ඒවා කොපි කරගෙන පැල්බැඳගෙන නිර්මාණ කරනවා. ඒ විතරක් නොවෙයි කාලෙන් කාලෙට අමුතු රැලි එක්ක තමයි කලාව දැන් බිහිවෙන්නේ. මම විතරක් නොවෙයි මේ ක්ෂේත්‍රයේ දැවැන්තයෝ ගෙදරට වෙලා ඉන්නවා. කිසිම කෙනෙක් ඔවුන්ගෙන් වැඩක් ගන්නේ නැහැ. ඔවුන්ට නිර්මාණ බිහි කරන්න රූපවාහිනී නාළිකා අවස්ථාවක් නොදෙන එකත් එක් කනගාටුවක්.

කලින් වර්තමානයේ ඔබ දැකපු චිත්‍රපට අතරින් ඔබ වඩාත්ම කැමැති චිත්‍රපටය? චිත්‍රපට නම් දවස ගණනේ පෝලිමට එනවා. හැබැයි ඒ එකත්වත් මතක නැහැ. ඒ අතර ‘හුස්ම’ චිත්‍රපටයට මම විශේෂ තැනක් දෙනවා. හොඳ නිර්මාණ අතර බිහිවුණ තවත් නිර්මාණයක් තමයි ‘හුස්ම’චිත්‍රපටය. මේ චිත්‍රපටයට සම්මාන ලැබිය යුතුයි කවුරු හරි කුපාඩිකමක් කළේ නැත්නම්. රටේ හැමදේම විකිණෙන්නේ දේශපාලන මත. මෙය දැන් මුඵ ක්ෂේත්‍රයටම පිළිලයක් වෙලා ඉවරයි. ධනවතුන්ට, ප්‍රබලයන්ට තමයි සම්මාන බෙදී යන්නෙත්.
වසන්ත විතාරණගේ