පසුගිය මහමැතිවරණයට තරග නොකළ විමල් වීරවංශ මහතාගේ නායකත්වයෙන් යුත් ජාතික නිදහස් පෙරමුණ ඉදිරි පළාත් පාලන මැතිවරණය සම්බන්ධයෙන් තීන්දුවක් ගෙන ඇති බව වාර්තා වේ. Sri Lanka Latest News
ඒ, කිසිදු පක්ෂයක් සමග සන්ධානගත නොවී තනි පක්ෂයක් ලෙස එළඹෙණ පළාත් පාලන මැතිවරණයට තරග වැදීමටය.
පසුගිය ජනාධිපතිවරණයේදී විමල් ඇතුළු පාර්ශ්ව කිහිපයක් සර්වජන බලය යටතේ තරග වැදුණු දිලිත් ජයවීරට සහාය දැක්වීමට කටයුතු කළද ජනාධිපතිවරණ පරාජයෙන් පසු විමල් මහ මැතිවරණයට ඉදිරිපත් වූයේ නැත. එහිදී ඔහු විශේෂ ප්රකාශයක් කරමින් කියා සිටියේ තමන් මින් ඉදිරියට කිසිදු පක්ෂයක් සමග සන්ධානගත වීමට කටයුතු කරන්නේ නැතැයි කියාය.
ඒ අනුව විමල් මෙවර සූදානමින් සිටින්නේ ජාතික නිදහස් පෙරමුණ පක්ෂයක් ලෙස තනිවම පළාත් පාලන මැතිවරණයට ඉදිරිපත් කොට මන්ත්රීවරුන් සියයක් හෝ පළාත් පාලන ආයතනවලට ඇතුල් කරගැනීමටය.
ඒ හරහා විමල්ගේ සැලසුම වී ඇත්තේ පක්ෂයක් ලෙස බිම් මට්ටමේ යාන්ත්රණයක් සකස් කරගෙන දිගු දේශපාලන ගමනක් යෑමටය.
මේ අතර ජාතික නිදහස් පෙරමුණේ නව ප්රධාන කාර්යාලය සහ දේශපාලන,සංස්කෘතික මූලස්ථානය අද (19) බත්තරමුල්ල රොබට් ගුණවර්ධන මාවතේ දී මහා සංඝරත්නයේ ආශිර්වාද මධ්යයේ ජාතික නිදහස් පෙරමුණේ නායක විමල් වීරවංශ මහතා විසින් සුබ මොහොතින් විවෘත කොට ජනගත කරන ලදි.
සුබ මොහොතින් විවෘත කෙරුණු නව මූලස්ථානයට පිවිසීමෙන් පසු ආගමික වතාවත් සිදුකල අතර පැමිණි සිටි මහා සංඝරත්නය සෙත් පිරිත් ආශිර්වාදය සිදුකලේය. සබරගමුව විශ්ව විද්යාලයේ කුලපති මහාචාර්ය කුඹුරුගමුවේ වජිර නාහිමිපානන්, දේශප්රේමී භික්ෂු පෙරමුණේ මහලේකම් බෙංගමුවේ නාලක හිමියන්. කැලණිය විශ්ව විද්යාලයේ සංස්කෘතික අංශ ප්රධානී මහාචාර්ය ඉඳුරාගාරේ ධම්මරතන හිමියන් විසින් මෙහිදී කෙටි අනුශාසන සිදුකරන ලදී.
මහා සංඝරත්නය, දේශපාලන පක්ෂ නායකයින්, දේශපාලනඥයන්, විද්වතුන්, කලාකරුවන් ඇතුළු පක්ෂයට හිතැති සහෘදයෝ රාශියක් මෙම උත්සව අවස්ථාවට සහභාගී විය.
සුබ මොහොතින් විවෘත කරන ලද නව ප්රධාන කාර්යාලය ඉදිරියේදි ජාතික නිදහස් පෙරමුණේ සියලු දේශපාලන සහ සංස්කෘතික කටයුතු සම්බන්ධීකරණය සඳහා යොදා ගැනීමට නියමිතය.
