රුහුණු කතරගම මහා දේවාලයේ බස්නායක නිලමේ ඩිෂාන් ගුණසේකර මහතා මාර්තු 10 වැනිදා ප්රකාශයක් ලබාදීම සඳහා අපරාධ පරීක්ෂණ දෙපාර්තමේන්තුව වෙත පැමිණියේය. මෙය සී.අයි.ඩී.ය විසින් ඔහුට මෑතකදී නිකුත් කරන ලද කැඳවීමකට අනුව සිදුකළ පැමිණීමකි.
මාධ්යවේදීන් කරන ලද විමසීමකදී බස්නායක නිලමේවරයා සඳහන් කර ඇත්තේ, අපරාධ පරීක්ෂණ දෙපාර්තමේන්තුව ඉදිරියේ පෙනී සිටින ලෙසට තමන්ට දැනුම් දීමක් ලැබී ඇති නමුත්, එම කැඳවීමේ කිසිදු විශේෂිත හේතුවක් සඳහන් කර නොමැති බවයි.
විවිධ මාධ්ය වාර්තා පෙන්වාදී ඇත්තේ, මෙම ප්රශ්න කිරීම් සමාජ ක්රියාකාරිකයකු වන කාමන්ත ජයමුණි මහතා විසින් කරන ලද පැමිණිල්ලක් මත පදනම්ව සිදුකෙරුණු බවයි. කෙසේ වෙතත්, පැමිණිල්ලේ නිශ්චිත ස්වභාවය හෝ එහි විෂය පථය පිළිබඳ නිල වශයෙන් තහවුරු කර නොමැත.
පසුගිය දිනවල, මහරගම අපේක්ෂා රෝහලේ ළමා වාට්ටු සංකීර්ණය කතරගම දේවාලයේ අරමුදලින් ඉදිකිරීමේ සිද්ධිය සම්බන්ධයෙන් විවිධ මාධ්ය වාර්තා පළවී තිබිණි. මෙම සිද්ධිය සහ වත්මන් විමර්ශනය අතර කිසියම් සම්බන්ධතාවයක් තිබේද යන්න මේ මොහොතේ පැහැදිලි නොවේ.
මෙම සිද්ධියට සම්බන්ධ වැඩිදුර පරීක්ෂණ ලෙස, අපරාධ පරීක්ෂණ දෙපාර්තමේන්තුවේ නිලධාරීන් මාර්තු 09 වැනිදා රාත්රියේ බස්නායක නිලමේවරයාගේ මාතර පිහිටි මහගෙදර පරීක්ෂාවට ලක්කර ඇති අතර, එම අවස්ථාවේදී අදාළ නිවසේ සිට ඇත්තේ නිලමේවරයාගේ 84 හැවිරිදි මව පමණක් බව වාර්තා වී ඇත.
එම පරීක්ෂාව සිදුකළ හේතුව හෝ එහිදී සොයාගත් කරුණු පිළිබඳ මේ වන තෙක් නිල වශයෙන් කිසිදු තොරතුරක් හෙළිකර නොමැත. කෙසේ වෙතත්, මෙම පරීක්ෂාව සහ 10 වැනි දින බස්නායක නිලමේවරයා සී.අයි.ඩී.ය වෙත පැමිණීම අතර යම් සම්බන්ධතාවයක් ඇති බව පෙනී යයි.
පහත පළවන්නේ අපරාධ පරීක්ෂණ දෙපාර්තමේන්තුවට පැමිණි අවස්ථාවේ මාධ්යවේදීන් විමසූ කරුණුවලට පිළිතුරු දෙමින් ඩිෂාන් ගුණසේකර මහතා දැක්වූ අදහස්ය.
මාධ්යවේදියා
ඔබතුමාව කැඳවලා තියෙන්නේ ඇයි?
ඩිෂාන් ගුණසේකර
කිරිවෙහෙරේ සෝරත හාමුදුරුවෝ, මහින්ද රාජපක්ෂ මහත්තයා ජනාධිපති කාලේ එතුමා වෙනුවෙන් හදපු ගෙයක් තියෙනවා කතරගම. ඒ ගෙදර පිළිබඳ විස්තර දැනගන්න තමයි මට එන්න කියලා තිබුණේ.
මාධ්යවේදියා
ඔබතුමාට තිබුණු චෝදනාව මොකක්ද?
ඩිෂාන් ගුණසේකර
මම දන්න තරමින් චෝදනාවක් නෑ. ඒ ගෙදර පිළිබඳ හරි විස්තරය දන්නේ මම. මොකද ඒ ගේ හදපු කෙනා දැන් අසනීපෙන්. සෝරත හාමුදුරුවොත් මේ වෙද්දී අපවත් වෙලා. අපරාධ පරීක්ෂණ දෙපාර්තමේන්තුව හිතන්න ඇති මම තමයි මේ ගැන විස්තර දන්නේ කියලා. ඒ නිසා තමයි මට එන්න කියලා තියෙන්නේ.
මාධ්යවේදියා
තවත් දවසක ඔබතුමාට එන්න කිව්වද?
ඩිෂාන් ගුණසේකර
නෑ. මෙතැනින් ඉවරයි.
මාධ්යවේදියා
ඒ ගේ අයිති මහින්ද රාජපක්ෂ මහත්තයටද?
ඩිෂාන් ගුණසේකර
නැහැ. සෝරත හාමුදුරුවෝ තමයි හැදුවේ. උන්වහන්සේ තමයි වියදම් කළේ. ඕක හැදෙව්වේ විමලරත්න කියලා මහත්තයෙක්. මහින්ද රාජපක්ෂ මහත්තයා ආවාම ඉන්න කියලා. යුද්ධෙ දිනපු කාලේ මහින්ද මහත්තයට හැම පන්සලකම වගේ ඔය වගේ ගෙයක්, ඉන්න තැනක් හදලා තිබුණා.
මාධ්යවේදියා
ඒ ස්ථානය බලාගන්න හමුදාවෙන් යොදවලා තිබුණද?
ඩිෂාන් ගුණසේකර
ඒක දන්නේ නෑ. ඒ වගේ දෙයක් මගෙන් ඇහුවේ නෑ.
මාධ්යවේදියා
සෝරත හාමුදුරුවෝ තවම ඉන්නවද?
ඩිෂාන් ගුණසේකර
නෑ, අපවත් වෙලා.
මාධ්යවේදියා
සී.අයි.ඩී. එකෙන් ඔබතුමාගේ ගෙදරට ඇවිල්ලා තිබුණා. ඒ ගැන කතා කළේ නැද්ද?
ඩිෂාන් ගුණසේකර
ඒක මේ රටේ නොවිය යුතු දෙයක්. නමුත් ඒක සිද්ධ වුණා. ඉතින් මම මොනවා කරන්නද? ආයෙමත් ඊළඟ පරම්පරාවට අපි ඒ ප්රශ්න ගෙනියන්න හොඳ නෑ.
මාධ්යවේදියා
ඒ සිදුවීම සම්බන්ධයෙන් ඔබතුමා කාට හරි පැමිණිලි කරන්න බලාපොරොත්තු වෙනවද?
ඩිෂාන් ගුණසේකර
ඔය වගේම ප්රදේශයේ පොලිසියට කියන්නේ නැතුව ගිහිල්ලා වැලිගම එක්කෙනෙක් මැරුණා. ඊයේ අපේ ගෙදරට ආපු අයත් සිවිල් පිට ඇවිල්ලා තිබුණේ සර්ච් වොරන් එකක්වත් නැතුව. ගමේ පොලිසියෙන් අපේ ගෙදරට ඒ වෙලාවේ ඇවිල්ලා තමයි හොයාගත්තේ ඒ අය සී.අයි.ඩී. කියලා. ඒ වෙලාවේ මාතර පොලිසියේ අය ඒ නිලධාරීන්ට වෙඩිතිබ්බා නම්, ඒ අහිංසක නිලධාරීන් තමයි මැරෙන්නේ. කාගේ හරි අණකට ගිහිල්ලා. මේ ක්රමය අපි වෙනස් කරගමු.
මාධ්යවේදියා
වෙනස් කරගමු කියන්නේ මොකක්ද?
ඩිෂාන් ගුණසේකර
මේ ආණ්ඩුව ලවාම අපි මේ ක්රමය වෙනස් කරගමු. ආණ්ඩුව අපහසුතාවට පත්කරන්න තමයි මේවා කරන්නේ.
මාධ්යවේදියා
බොරු චෝදනාවක්ද මේ දාලා තියෙන්නේ?
ඩිෂාන් ගුණසේකර
මට කරන ඕනෙම චෝදනාවකට උත්තර දෙන්න මට පුළුවන්. මොකද මම සිස්ටම් එකක් ගැන විශ්වාසය තියෙන කෙනෙක්. කතරගම දේවාලයේ ආදායම් වියදම් ගැන මගෙන් ඇහුවොත් මගෙන් පස්සේ එන කිසිම නිලමේ කෙනෙක්ට ඒකෙන් හොරකම් කළා කියලා අහන්න නෑ. මොකද මම ඒකට සිස්ටම් එකක් හදලා තියෙනවා. මගෙන් පස්සේ එන කිසිම නිලමේ කෙනෙක් හොරෙක් කියලා ඔබතුමාලට අහන්න ලැබෙන්නේ නෑ. සිස්ටම් එකකට දුවන්නේ. ඉතින් අපි රටත් මේ ජනාධිපතිතුමා ලවාම මේ විදියට සිස්ටම් එකකට හදාගත්තොත් අපේ දරුවන්ට හොඳ රටක් තියේවි.
මාධ්යවේදියා
කලින් කියපු ගෙදර සම්බන්ධයෙන් වෙච්ච අක්රමිකතාවක් ගැනද මේ පැමිණිල්ලක් දාලා තියෙන්නේ?
ඩිෂාන් ගුණසේකර
නෑ. ඒක හදපු කෙනා දැන් අසනීපෙන් ඉන්නේ. ඔහු මගේ ළඟ අවුරුදු 3ක් සේවය කළා. ඔහුගෙන් කටඋත්තරයක් ගන්න බැරි හින්දා වෙන්න ඇති මාව කැඳවන්න ඇත්තේ.
මාධ්යවේදියා
ඒ ගෙදර දැනට තියෙන්නේ කාගේ නමටද?
ඩිෂාන් ගුණසේකර
කිරිවෙහෙරේ නායක හාමුදුරුවෝ භාරයේ.
මාධ්යවේදියා
ඔබතුමා ඇත්තටම දන්නේ නැද්ද දේශබන්දු මහත්තයා ඉන්න තැන?
ඩිෂාන් ගුණසේකර
මම දන්නේ නෑ දේශබන්දු මහත්තයා ගැන.
මාධ්යවේදියා
දේශබන්දු මහත්තයාව ඔබතුමා හංගගෙන ඉන්නවා කියලා සී.අයි.ඩී. එකට සැක හිතිලා තියෙන්නේ කොහොමද? ඇත්තටම ඔබතුමා එක්ක දේශබන්දු මහත්තයට සම්බන්ධයක් තිබිලා නැද්ද?
ඩිෂාන් ගුණසේකර
දේශබන්දු මහත්තයව මම හොඳට අඳුනනවා.
මාධ්යවේදියා
ඊයේ පෙරේදා කතා කළේ නැද්ද?
ඩිෂාන් ගුණසේකර
නෑ. ඔය ප්රශ්නවලින් පස්සේ කතාකළේ නෑ. කතාකළත් වට්ස්ඇප් එකෙන්නේ කතා කරන්නේ.
මාධ්යවේදියා
දවස් ගානක් තිස්සේ එතුමා නෑ. ඇත්තටම ඒ දවස් ඇතුළේ කතා කළේ නැද්ද?
ඩිෂාන් ගුණසේකර
ඇත්තටම මේවා නෙවෙයි කතාකරන්න ඕනේ. මේ රට හදන්න කතාකරමු අපි. දේශබන්දු මහත්තයා හෙට අනිද්දා උසාවියට ඇවිල්ලා ඔය ප්රශ්න ඉවර කරගනී. අපි මේකට හිනාවුණාට පිටරටවල මිනිස්සු අපේ රටටම හිනාවෙනවා.
