ලංකාවේ රාජ්ය නායකයෙක් පත්වුණාම ඉස්සෙල්ලාම යන රාජ්ය නිල සංචාරය ඉන්දියාවය. ඉන්දියාවත් ඒ සම්ප්රදාය දැන් ලංකාවේ රාජ්ය නායකයෙක් පත්වූ විට ඉන්දියාවට එන්න නිල ආරාධනාවක් කරනු ලබයි. ඒත් රනිල් ජනාධිපති ලෙස පත්වූ විට ඉන්දියාව රනිල්ට එලෙස නිල ආරාධනාවක් කළේ නැත. ඒ තියා ඉන්දීය අගමැති මෝදි රනිල්ට සුබ පැතුවේද නැත. සාමාන්යයෙන් ලංකාවේ රාජ්ය නායකයෙක් පත්වූ විට පළමුව සුබ පැතුම් පළ කරන්නේ ඉන්දියාවය. මෝදි, රනිල්ට සුබ පැතුවේ මාස කිහිපයකට පසුවය. රනිල් ඉන්දියාවට යන්නේත් ඔහු ජනාධිපති වී වසරකට පසුවය.Sri Lanka Latest News
ඇයි ඒ…?
එයට හේතුව රනිල් සම්බන්ධයෙන් ඉන්දියාව තුළ තියෙන අපැහැදිලි චිත්රයය.
මහින්ද රාජපක්ෂගේම වචනවලින් කියනවා නම් 2015 මහින්දව පරාජය කරන මෛත්රී-රනිල් සන්ධානය හැදුවේ ඉන්දියාවය. ඒ කතාව ගෝඨාත් කීවේය. ඒ කතාව ඇත්ත නම් 2015 රනිල් අගමැති වූයේ ඉන්දියාවට පින් සිදුවන්නටය. 2015 ජනාධිපතිවරණය දිනා, මෛත්රී මන්ත්රී ආසන 50ක්වත් නැති රනිල්ව අගමැති කළේය. ඒ, ජනාධිපතිවරණයට කලින් රනිල් මාධ්ය සාකච්ඡාවක් පවත්වා චීන ව්යාපෘතියක් වන කොළඹ වරාය නගරය අහෝසි කරන බව කීවේය. ඒත් රනිල් අගමැති වී වසරකින් වරාය නගරය යළි හදන්න පටන් ගත්තා පමණක් නොව, රාජපක්ෂලාවත් නොකළ දෙයක් කරමින් රනිල් හම්බන්තොට වරාය චීනයට බදු දුන්නේය. ඉන්දියාවට සිද්ධ වුණේ වඳින්න ගිය දේවාලය ඉහේ කඩාවැටුණා වගේ සිද්ධියකි. 2018 පුංචි ඡන්දය ජයග්රහණය කිරීමෙන් පසු මෝදි මහින්ද සහ නාමල්ට ඉන්දියාවට ආරාධනා කර ලොකු වෙල්කම් එකක් දුන්නේ රාජපක්ෂලා යළි බලයට ආවට ඉන්දියාවට ප්රශ්නයක් නැති බව පෙන්වමිනි. මෛත්රී ජනාධිපති වූවාට පසු මෝදි ලංකාවට ආ පළමු සංචාරයේදී මහින්දට මෝදි හමුවීමට ඇපොයින්මන්ට් එකක් ගන්න ලොකු උත්සාහයක් දරන්න සිදුවිය. ඒ වෙලාවේ මහින්දට සහ බැසිල්ට මෝදි හමුවට ගෝඨාව ගෙන යෑමට අවශ්ය විය. හේතුව ඉන්දියාව මහින්ද එක්ක අමනාප වූයේ කොළඹ වරායට චීන සබ්මැරීන්වලට එන්න දුන්න නිසා බවත්, ඒ මෝඩ වැඩේ කළේ ගෝඨා නිසාත්, ගෝඨා ඉන්දියාවේ හතුරෙක් නොවන බව පෙන්වන්න රාජපක්ෂ පවුලට ඕනෑ විය. ගෝඨාව ගෙන්වා ගැනීමට අවසර ලැබුණේත් ලොකු පෙරැත්ත කිරීමකින් පසුවය. එහෙම තිබියදී 2018 පුංචි ඡන්දය දින්නාට පසු මෝදි එවක නිකම්ම නිකම් මන්ත්රීවරයෙක් වූ මහින්දට ලොකු වෙල්කම් එකක් දුන්නේය. නාමල්ද මහින්ද එක්ක මෝදි හමුවෙන්න ඉන්දියාවට ගියේය. මේකට හේතුව රනිල් හම්බන්තොට වරාය චීනයට බදු දීම නිසා ඉන්දියාව තුළ හටගත් කම්පනයය.
මෝදි මෛත්රී-රනිල් ආණ්ඩු කාලයේ තෙවරක් ලංකාවට ආවේය. ඒ ආපු වාර තුනේදීම මහින්ද මෝදිව හමුවිය. මහින්ද, මෝදිව හමුවූ ඒ අවස්ථා තුනේදීම මහින්ද ඉන්දියාවට ගොස් මෝදි හමුවූ විටදීත් මහින්ද මෝදිට කියන්න ඇත්තේ එකම එක කතාවකි. ඒ කතාව වචන වුණත් මේ විදියට කියන්න පුළුවන.
‘රනිල් කළේ අපි නොකරපු දෙයක්. අපි අපේ දේවල් චීනයට විකිණුවේ නැහැ. රනිල් ඒක කළා. රනිල් චීනය විතරක් නෙවේ ඇමෙරිකාව, බටහිර රටවල් මෙහෙ ගෙනැල්ලා දාගෙන ඉන්දියාවට ලොකු අනතුරක් කරනවා…’
මහින්ද මෝදිට අනිවාර්යයෙන්ම මේ වචන මතුකරන්න ඇත. එතකොට රනිල් අගමැතිව සිටියදී මෝදි හමුවිය. ඊට පෙර 2015ට කලින් විපක්ෂ නායකව සිටියදී රනිල් මෝදිට දුරකතනයෙන් කතාකර ඇත. ඒ වෙලාවල රනිල් මෝදිට මෙන්න මේ කතාව කියන්න ඇත.
‘රාජපක්ෂලා මේ රට චීනයට ඇදගෙන යනවා. රාජපක්ෂලාට ඕනෙ ලංකාව චීන කොලනියක් කරන්න. මේකට ඉඩ දෙන්න එපා….’
මේ, රනිල් 2015ට කලින් මෝදිට දුරකතනයෙන් කිව්වාය කියා හිතන්න පුළුවන් කතාවය.
‘තෙල් ටැංකි බදු දෙන්න ඔක්කොම ලැහැස්තියි. ඒත් රාජපක්ෂලා රටේ ලොකු ඉන්දීය විරෝධයක් හදනවා. මේක පිටිපස්සේ චීනය ඇති….’
මේ, රනිල් 2015 අගමැති වෙලා කිහිප වරක්ම මෝදි හමුවූ විටදීද කිව්වාය කියලා හිතන්න පුළුවන් කතාය.
වැඩි කල් නැත. රනිල් ජනාධිපති වුණේ 2022 ජූලි මාසයේය. 2021 ජූලි මාසයේ කොළඹ වරාය නගර පනත පාර්ලිමේන්තු ආ වෙලාවේ රනිල් කිව්වේ වරාය නගර පනතින් ප්රභාකරන්ට ඊළම දුන්නා වගේ වරාය නගරය චීනයට දෙන්න යනවා කියාය.
මේ විදියට රනිල් රාජපක්ෂලාට එරෙහිවත්, රාජපක්ෂලා රනිල්ට එරෙහිවත් ගතු කිය කියා ඉඳලා එක පාරටම රාජපක්ෂලා රනිල්ව ජනාධිපති කොට රනිල් අරගලය මර්දනය කොට රාජපක්ෂලා ආරක්ෂා කළ විට මෝදිට තරු පෙනීම පුදුමයක් නොවේ. ඒ මදිවාට යුවාන් වැන්ග් චීන ඔත්තු බලන නැව ඉන්දියාවේ විරෝධය මැද ලංකාවට ආවේත් රනිල් ජනාධිපති වූ විගසය.
‘දැන් මෝදි කාවද විශ්වාස කරන්නේ? රනිල්වද? රාජපක්ෂලාවද?
බලන් ගියාම රනිල් සහ රාජපක්ෂලා යන දෙගොල්ලොම මෝදිවත්, ඉන්දියාවත් අන්දවලාය. රනිල් බලය ගන්න ඉන්දියාව පාවිච්චි කළා සේ රාජපක්ෂලා බලය ගන්නත් ඉන්දියාව පාවිච්චි කොට ඇත. අනික රනිල් සහ රාජපක්ෂලා අතර ඩීල් එක කලක සිට තියෙන එකක් බව මෝදිට නොතේරෙන්න මෝදි මෝඩ නැත. ඉතින් රනිල්ට ඉන්දියාවට එන්න කියන්න මෝදි අවුරුද්දක් කල් ගත්තේ මේ යෝධයා එන්නේ මොකාටද කියලා හිතාගන්න බැරිව විය යුතුය.
‘මේ යෝධයාට මිනිහාගේ පරම හතුරා රාජපක්ෂලාගෙන් ජනාධිපතිකම ගන්න ඩීල් දමන්න පුළුවන් නම්, මිනිහා අපේ හතුරෝ එක්ක මොන මොන ඩීල් දමයිද…?’
ඉන්දියාවටත් මෝදිටත් තියෙන්න ඇත්තේ ඒ ප්රශ්නයය. එහෙම ප්රශ්නයක් නැහැ කියලා ඉන්දියාවට පෙන්වන්න රනිල්ට අවුරුද්දක්ම ගතවෙන්න ඇත.
‘ඒත් ඉන්දියාව රනිල්ව විශ්වාස කරයිද…?’
ඉන්දියාවට රනිල් ගැන ඇත්තේ ප්රශ්න දෙකකි. එකක් නම් ඉන්දියාවේ හයියෙන් අගමැති වී 2017 චීනයට හම්බන්තොට වරාය බදු දීම සහ ඉන්දියාව හරහා නොගොස් කෙළින්ම ඇමෙරිකාව එක්ක ගනුදෙනු කරන්න යෑමය. රනිල්ට කලින් ජනාධිපති වූ ගෝඨාභය ජනාධිපති වී ඉන්දියාවේ විශ්වාසය අකුරටම දිනාගත්තේය. ඔහු චීනයට පල නොකියා පලා බෙදුවේය. වෙනකක් තබා චීනය ගෝඨාභයට එරටට එන ලෙස කළ නිල ආරාධනාව ගෝඨා තඹ සතයකට ගණන් ගත්තේ නැත. ඒ වගේම ඉන්දියාවේ තවත් හතුරෙක් වන පාකිස්තාන අගමැති ඉම්රාන් ඛාන් ලංකාවට ආ විට පාර්ලිමේන්තුව අමතන්න කැමැත්තෙන් සිටියත් ගෝඨා ඒකත් බකල් කළේය. රනිල් ජනාධිපති වී චීන ඔත්තු නැවට එන්න දීමෙනුත් පාකිස්තාන අගමැති කියන විදියට පාකිස්තානයට අයි.එම්.එෆ්. ලෝන් එක ගන්න උපදෙස් දී තමන් ගෝඨා නොවන බව ඉන්දියාවට පෙන්වා දී ඇත. හැබැයි ඉන්දියාව අයි.එම්.එෆ්. ණය ගන්න ලංකාවට උදව් කළේ නැතිනම් රනිල් ඉවර වෙලා ගොඩක් කල්ය.
රනිල් ඊළඟ අයි.එම්.එෆ්. ණය වාරිකය ගන්න, ණය ප්රතිව්යුහගත කරගන්න චීනය අවශ්යය. රනිල්ට ණය ප්රතිව්යුහගත කරගන්න ඉන්දියාවත් අවශ්යය. හැබැයි රාජක්ෂලා අන්දලා ජනාධිපතිකම ගත්තා වගේ චීනයයි ඉන්දියාවයි අන්දන එක නම් රනිල්ට ලේසි නැත.
