සැප්තැම්බර් 21 වැනිදා පැවැත්වීමට නියමිත ජනාධිපතිවරණයෙන් ජය ගන්නේ සමගි ජන බලවේගයේ නායක සජිත් ප්රේමදාස මහතා බව පාර්ලිමේන්තු මන්ත්රී ඩලස් අලහප්පෙරුම මහතා පවසනවා. 2019 ජනාධිපතිවරණ ප්රතිඵලය සහ පසුගිය මැතිවරණවලදී එක් එක් පක්ෂ ලබාගත් ඡන්ද ප්රතිශත අනුසාරයෙන්, ඔහු තාර්කිකව පෙන්වා දෙන්නේ නියත වශයෙන්ම 2024 ජනාධිපතිවරණය සජිත් ප්රේමදාස මහතා ජය ගන්නා බවයි. හිරු ටීවී රූපවාහිනී නාලිකාව සමග සම්මුඛ සාකච්ඡාවකට එක්වෙමින් ඩලස් අලහප්පෙරුම මහතා ඉදිරිපත් කළ එම අදහස් දැක්වීම Hiru News යූටියුබ් නාලිකාවෙන් උපුටා ගෙන අප මෙලෙස ඔබ වෙත ඉදිරිපත් කරමු. (Sri Lanka Latest News)
මාධ්යවේදියා
2019 ජනාධිපතිවරණයේදී ගෝඨාභය රාජපක්ෂ ඡන්ද 69,24,255ක් ලබාගත්තා. ප්රතිශතය 52.25%ක්. සජිත් ප්රේමදාස ඡන්ද 55,68,239ක් ලබාගත්තා. එහි ප්රතිශතය 41.99%ක්. අනුර දිසානායක ඡන්ද 4,18,553ක් ලබාගත්තා. ප්රතිශතය 3.16%ක්. ඉන් මාස කිහිපයකට පසුව පැවැත්වූ මහ මැතිවරණයේදී පොහොට්ටුව ඡන්ද 68,53,693ක් ලබාගත්තා. එය ප්රතිශතයක් වශයෙන් ගත්තාම 59.09%ක්. ඒ මහ මැතිවරණයේදී සජබය ලබාගත් ඡන්ද සංඛ්යාවේ විශාල අඩුවීමක් පෙන්වනවා. ඔවුන් ලබාගත්තේ ඡන්ද 27,71,984ක්. එය ප්රතිශතයක් ලෙස ගත්තාම 23.9%ක්. දළ වශයෙන් භාගයකට ආසන්න ප්රමාණයකින් සජබයේ ඡන්ද අඩුවෙලා තියෙනවා. ජවිපෙ ලබාගත් ඡන්ද ප්රමාණය 4,45,958ක්. 3.84%ක් ඔවුන්ගේ ප්රතිශතය. එතැන් පටන් මේ දක්වා ජාතික තලයේ මැතිවරණයක් පවත්වලා නැහැ. ඒ අනුව, ඉදිරි ජනාධිපතිවරණයේ ප්රතිඵලය ගැන ඔබේ අර්ථකථනය මොකක්ද?
ඩලස් අලහප්පෙරුම
මේක වචන හරඹයක් නෙවෙයි. ගණිතමය විග්රහයක් විදියට මම කියන්නම්. ජනාධිපතිවරණයට බැඳිලා එන මහ මැතිවරණයකදී ජනාධිපතිවරණයේ ජයග්රාහකයාට තමයි සියලු දේවල් තීන්දු වෙන්නේ. ඉතිහාසයේ හැමදාම සිදුවුණේ එහෙමයි. 2020 විතරක් නෙවෙයි. හැම ජනාධිපතිවරණයක් පස්සේ එය ලුහුබැඳගෙන එන මහ මැතිවරණයේදී ජනාධිපතිවරණය ජයග්රාහකයා විසින් ජය හිමිකරගන්නවා. ලංකාවේ මැතිවරණ සංස්කෘතියේ තියෙන වැරැද්දත් ඒකයි. ජනාධිපතිවරණය දිනලා මහ මැතිවරණය තියනවා. මහ මැතිවරණය දිනලා පළාත් සභා තියනවා. පළාත් සභාව දිනලා පළාත් පාලන ඡන්දය තියනවා. ලංකාවේ මේ වෙනකොට ලියාපදිංචි ඡන්ද සංඛ්යාව ලක්ෂ 171යි. ජනාධිපතිවරණයකදී උපරිමයෙන් ලංකාවේ ඡන්ද පාවිචිචි වෙලා තියෙන්නෙ 82%යි. අපි උපකල්පනය කළොත් 82%ක් ඡන්ද පාවිච්චි වුණා කියලා. ඒ කියන්නේ දළ වශයෙන් ඡන්ද ලක්ෂ 140ක්. මේ ලක්ෂ 140න් 50%ක් අරගෙන ජනාධිපති වෙන්න නම් ඡන්ද ලක්ෂ 70ක් ඕනේ. අද වෙද්දී ප්රධාන ජනාධිපති අපේක්ෂකයෝ තුන්දෙනෙක් ඉන්නවා. රනිල් වික්රමසිංහ, සජිත් ප්රේමදාස සහ අනුර කුමාර දිසානායක. ඔවුන් තුන්දෙනාගෙන් කවුරු හරි කෙනෙක් ජනාධිපති වෙන්න නම් ඡන්ද ලක්ෂ 70ක් ලබාගන්න ඕනේ.
අපි රනිල් වික්රමසිංහ මැතිතුමාගෙන් පටන්ගමු. එතුමාට මහ මැතිවරණයේදී ලැබුණේ 2,49,000ක්. 2.15%ක ප්රතිශතයක්. මොහොතකට හිතන්න එදා 69 ලක්ෂයක් ඡන්ද ලැබුණු අයගේ මන්ත්රීවරු ටිකක්, රාජ්ය ඇමැතිවරු, ඇමැතිවරු ටිකක් ගිහිල්ලා ඉන්නවනේ. ඒ 69 ලක්ෂයෙන් 40%ක් අපි උපකල්පනය කරමු වික්රමසිංහ මැතිතුමා එක්ක ඉන්නවා කියලා. 69 ලක්ෂයෙන් 40%ක් කියන්නේ උපරිම වශයෙන් ලක්ෂ 30ක් විතර. මේක තමයි රනිල් වික්රමසිංහ මැතිතුමාට ලබාගන්න පුළුවන් උපරිම ගාන.
අනුර කුමාර දිසානායක මැතිතුමා 4,18,000ක් ගත්තා. ඒ, 4,18,000 ඉඳලා ජයග්රහණය කරන්න ඡන්ද ලක්ෂ 70කට යන්න නම් තව ඡන්ද ලක්ෂ 65කට අධික ප්රමාණයක් ඔහු විසින් ලබාගන්න ඕනේ. හැබැයි 2019 ජනාධිපතිවරණයෙන් පස්සේ ඡන්ද සිතියමට එකතු වෙලා තියෙනවා අලුතෙන් ඡන්ද ලක්ෂ 11ක්. ඒ කියන්නේ පළමු වතාවට ඡන්දය දෙන අය. ඒ ලක්ෂ 11 පැත්තකින් තියලයි මම මේ ගණන් හදන්නේ.
මේක සජිත් ප්රේමදාස මැතිතුමාට ආදේශ කරලා බලමු. ඔහුට පහුගිය ජනාධිපතිවරණයේදී ඡන්ද ලක්ෂ 55ක් ලැබුණා. ඒ ලක්ෂ 55 සජිත් ප්රේමදාස මැතිතුමාට ලැබෙන්නේ ගෝඨාභය රාජපක්ෂ මැතිතුමා ජයග්රහණය කරන බවට මුළු රටම පිළිගත්ත වෙලාවක. ඒ වෙලාවේ රනිල් වික්රමසිංහ මැතිතුමාගේ සහාය සජිත් ප්රේමදාසට ලැබුණේ නෑ. ඒක අපි කවුරුත් දැකපු දෙයක්නේ.
මාධ්යවේදියා
නමුත් ඒ ඡන්ද 55 ඇතුළේ රනිල් වික්රමසිංහ මහත්තයාගේ ඡන්ද 2,49,000ත් තිබුණා නේද?
ඩලස් අලහප්පෙරුම
ඔව්. අපි ඒ වෙනුවෙන් 10%ක් වෙන් කරමු. 10%ක් කියන්නේ ඡන්ද පන්ලක්ෂ පනස්දාහක්නේ.
මාධ්යවේදියා
ටීඑන්ඒ එකටත් ඡන්ද පදනමක් තිබුණා ඒ වෙලාවේ. ඔවුන් මහ මැතිවරණයේදී ලබාගෙන තිබුණා ඡන්ද 3,27,000ක්. එතකොට ඒකත් අර ඡන්ද ලක්ෂ 55 ඇතුළේ තිබුණා?
ඩලස් අලහප්පෙරුම
ඔව්. ඒ ඔක්කොම ටික ලක්ෂ 10ක් කියලා හිතලා ඒ 10ම අයින් කරන්නකො. එතකොට ලක්ෂ 45යි. ඒ ලක්ෂ 45 කොහොමත් තියෙනවා. ජයග්රහණය කරන්න නම් ඡන්ද ලක්ෂ 45 සිට 70 දක්වා වැඩිකරගන්න ඕනේ. එතකොට තව ඡන්ද ලක්ෂ 25ක් ගන්න ඕනේ. එක්කෙනෙක් 4 ඉඳලා 70ට යන්න ඕනේ. අනිත් එක්කෙනා 30 ඉඳලා 70ට යන්න ඕනේ. නාමල් රාජපක්ෂ මැතිතුමා එහෙම නම් ලක්ෂ 70ට යන්න ගෝඨාභය රාජපක්ෂ මැතිතුමා ගත්ත ඡන්ද ප්රමාණයටත් වඩා තව ඡන්ද ලක්ෂයක් ගන්න ඕනේ.
මාධ්යවේදියා
සජිත් ප්රේමදාස මහත්තයාට දැනට තියෙන ඡන්ද ලක්ෂ 45, ලක්ෂ 70 දක්වා වැඩිකරගන්න අවශ්ය ඉතිරි ඡන්ද ලක්ෂ 25 ලබාගන්නේ කොහොමද?
ඩලස් අලහප්පෙරුම
69 ලක්ෂය සහ අලුත් ඡන්ද අතරින් තමයි ඒක ගන්න වෙන්නේ.
මාධ්යවේදියා
එතකොට 30%ක පාවෙන ඡන්ද ප්රතිශතය?
ඩලස් අලහප්පෙරුම
ලංකාවේ සෑම මැතිවරණයකදීම අවසන් සති දෙක වෙනතුරු 20%ක විතර අයගේ මතයක් ප්රකාශ වෙන්නේ නෑ.
කොහොම නමුත් මම ඉදිරිපත් කරපු මේ සංඛ්යාලේඛනයට අනුව බොහොම පැහැදිලිව සජිත් ප්රේමදාස මැතිතුමා තමයි ඉදිරියෙන්ම ඉන්නේ. ඔහු තමයි මේ සංඛ්යාවට ළඟින්ම ඉන්න කෙනා. අනිත් හැම කෙනෙක්ම ඉන්නේ අවම වශයෙන් ඡන්ද මිලියන 4කට වඩා දුරින්.
