රුපියල් මිලියන 3.9ක වියදමක් දරා සිදුකළ වනසත්ත්ව සංගණනයේ ප්රතිඵල මෙතෙක් අමාත්යාංශයට ලැබී නොමැති බව වැවිලි හා ප්රජා යටිතල පහසුකම් අමාත්යාංශයේ ලේකම් ගුණදාස සමරසිංහ මහතා රජයේ මුදල් පිළිබඳ කාරක සභාවේදී (COPF) හෙළිදරව් කළේය.Sri Lanka Latest News
පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ ප්රධානත්වයෙන් රැස්වූ එම කාරක සභාව හමුවේ කරුණු දක්වමින් ලේකම්වරයා පෙන්වා දුන්නේ, කෘෂි බෝගවලට වන සතුන්ගෙන් සිදුවන හානිය තවමත් කිසිදු අඩුවක් නොමැතිව සිදුවන බවයි.
රට පුරා රිළවුන්, වඳුරන්, මොනරුන් සහ දඬුලේනුන් වැනි භෝගවලට හානි කරන සතුන්ගේ ගහනය සහ ව්යාප්තිය හඳුනා ගැනීමේ අරමුණින් මෙම සංගණනය දියත් කෙරිණි. දත්තවල නිරවද්යතාවය සහතික කිරීම සඳහා ඇතැම් ප්රදේශවල නැවත සංගණන කටයුතු සිදුකිරීමට ද මීට පෙර පියවර ගෙන තිබුණි.
“සංගණනය සඳහා විශාල මහජන මුදලක් වැය කළ ද, ඒ හරහා අපේක්ෂිත දත්ත මෙතෙක් ලැබී නැහැ. එමගින් වගා හානි අවම කිරීමට හෝ සතුන් පාලනය කිරීමට නිශ්චිත විසඳුමක් ලබා ගැනීමට තවමත් හැකියාවක් ලැබී නැහැ.”
මෙම තත්ත්වය හමුවේ ගොවි ජනතාව දිගින් දිගටම පීඩාවට පත්ව සිටින බවත්, පවතින ගැටලුවට තිරසාර විසඳුමක් ලබා දීමේ වගකීම අදාළ අංශ විසින් පැහැර හැර ඇති බවත් කමිටුව විසින් නිරීක්ෂණය කරන ලදී.
