ගෝඨාභය රාජපක්ෂ ජනාධිපතිවරයා යටතේ එකවරම රසායනික පොහොර තහනම් කර කාබනික පොහොර භාවිතයට ගත් අත්තනෝමතික තීරණය හේතුවෙන් අප රටට සිදු වූ පාඩුව අතිවිශාල බවත් සමහර පාඩුවීම් ගණනය කර නොමැති බවත් මේ සම්බන්ධයෙන් විගණකාධිපති දෙපාර්තමේන්තුව විධිමත් ලෙස සිදු කරන ලද විගණන වාර්තාවක් 2022 සැප්තැම්බර් 2 වැනි දින පාර්ලිමේන්තුවට ඉදිරිපත් කර වසරකට වැඩි කාලයක් ගත වී ඇතත් වත්මන් ජනාධිපතිවරයා හෝ කෘෂිකර්ම ඇමතිවරයා මේ සම්බන්ධයෙන් විධිමත් පියවරක් මේ වන විටත් ගෙන නොමැති බවත් විපක්ෂ නායකවරයා පැවසීය.Sri Lanka Latest News
මෙම වංචාව මෙන්ම රජයේ බොහෝ දූෂණ සහ අක්රමිකතා සම්බන්ධයෙන් කිසිදු පියවරක් ගෙන නොමැති බැවින් ජනතාව සිටින්නේ කනස්සල්ලෙන් බවත් විපක්ෂ නායක සජිත් ප්රේමදාස මහතා පැවසීය.
විපක්ෂ නායකවරයා මේ බව කියා සිටියේ අද (11) පාර්ලිමේන්තුවේ දී ස්ථාවර නියෝග 27 (2) යටතේ ප්රශ්න කරමිනි.
එසේම අසූචි පොහොර වංචාව මෙන්ම අධික මිලකට නැනෝ පොහොර ගෙන්වීම නිසා ද රටට විශාල මුදලක් වැය කිරීමට සිදුවූ බවත් ඒ සම්බන්ධ විගණන වාර්තාවක් සකසනවා කිව්වත් එය තවමත් සිදුව නැති බවත් විපක්ෂ නායකවරයා මෙහි දී පැවසීය.
විගණන වාර්තාවෙන් පවා ඔප්පු වී ඇති මෙම චෝදනා කෝප් කමිටුව හමුවට ගෙන ඒම පමා කිරීමෙන් පෙනී යන්නේ ආණ්ඩුව මේ සඳහා වගකිවයුතු පුද්ගලයන් ආරක්ෂා කරමින් සිටින බවත් තවදුරටත් ඔවුන් ආරක්ෂා නොකර ජනතාවට යුක්තිය ඉටු කරන ලෙසත් විපක්ෂ නායක සජිත් ප්රේමදාස මහතා මෙහි දී පැවසිය.
එසේම රජය විසින් පොහොර සහනාධාරයක් ලබා දුන්නත් කෘෂි උපකරණවලට යන්ත්රවලට, තේ, කුරුදු, එළවළු සහ පළතරු යනාදී සෑම භෝගයකටම යොදන පොහොර සදහා වැට් බදු ගැසීම සහ වැට් බදු වැඩි කර ඇති බවත් මෙය ජනතාව අපායට ගෙන යන වැට් බද්දක් බවත් විපක්ෂ නායකවරයා තවදුරටත් පැවසීය.
