පසුගිය කාලය පුරා සමාගම් 65ක් කිසිදු පරීක්ෂාවකින් තොරව රේගුවෙන් කන්ටේනර් නිදහස් කරගෙන ඇති බව පෙරටුගාමී සමාජවාදී පක්ෂයේ අධ්යාපන ලේකම් පුබුදු ජයගොඩ මහතා පැවැසීය. පසුගිය 06 වැනිදා පැවැති මාධ්ය හමුවකදී ඒ සම්බන්ධයෙන් ජයගොඩ මහතා දැක්වූ අදහස් පහත පළවේ. Sri Lanka Latest News
මෙතැන බරපතළම ප්රශ්නය තමයි, 18 වැනිදා තමයි කමිටුව තීරණයක් ගන්නේ බහාලුම් පරීක්ෂා කිරීමකින් තොරව නිදහස් කරන්න. හැබැයි කලින් දවසේ, 18 වැනිදාත් දෙකක් නිදහස් කරලා. ඉතින් කමිටුව තීරණයක් ගන්නත් කලින් කොහොමද කන්ටේනර් දෙකක් නිදහස් කළේ? මේක ආණ්ඩුවත් හංගනවා, විපක්ෂෙත් මේක ගැන කතාකරන්නේ නෑ. මේ 16 වැනි පිටුවේ 9 වැනි කරුණ විදියට තියෙන එක. මේකෙ කියනවා,
‘භෞතික පරීක්ෂාවකින් තොරව රතු ලේබල් සහිත ඉහළ අවදානමක් ඇති බහාලුම්, ඉහත සඳහන් කළ කමිටුව මගින් නිදහස් කිරීමේ ක්රියාවලියේදී, 2025 ජනවාරි 18 වැනි දින නිදහස් කළ, බහාලුම් 309 ආනයනය කළ ආනයනකරුවන් 65 දෙනකු, ඊට පෙර බහාලුම් නිදහස් කළ වාර 13 තුළද කිසියම් හෝ අවස්ථාවක අන්තර්ගත වී ඇති බව නිරීක්ෂණය වේ.’
ඒ කියන්නේ මෙතැන කම්පැනි 65ක් තියෙනවා. ඒ කම්පැනි 65 බඩු පරීක්ෂා නොකර එළියට දානවා. මේ සැරේ විතරක් නෙවෙයි, කලිනුත් පරීක්ෂා නොකර එළියට දාලා තියෙනවා. ඉතින් වෙන අයගේ නෙමෙයි, මේ කොම්පැනි 65ම තමයි එළියට දාන්නේ.
අපි දන්න තොරතුරු අනුව නම් මේ කොම්පැනි 65 කිව්වට, මේ 65 අයිතිකාරයෝ ඉන්නේ හත් අට දෙනයි. ඒකෙනුත් තුන්දෙනෙක් ඉන්නවා, අපි අනිවාර්යයෙන් මේ සම්බන්ධව නිල විස්තර වාර්තා ඉල්ලනවා තොරතුරු දැනගැනීමේ පනතෙන්, මේකෙ බහාලුම්වලින් 80%ක් විතරම තුන්දෙනෙක්ගේ. ඒ තුන්දෙනා කලිනුත් ලංකාවට විවිධ අහිතකර දේවල් කළා කියලා චෝදනා ලබපු තුන්දෙනෙක්. මේ වාර්තාවෙත් කියනවා, දැන් ඒක අහන්නේ නෑනේ විපක්ෂයවත්. ඒකට ඔක්කොමලා එකතුයි.
ප්රාදේශීය සභා හදද්දී සමගි ජන බලවේගයයි, පොහොට්ටුවයි, එක්සත් ජාතික පක්ෂයයි ඔක්කෝම එකට එකතු වෙලා වැඩ කළේ. ඒ විදිහට මේකෙදිත් එකට එකතු වෙලා වැඩකරනවා කියලා තමයි පේන්නේ. දැන් මැදවච්චිය ප්රාදේශීය සභාවේ සභාපතිකම ගත්තා එන්පීපී එක, උපසභාපතිකම ගත්තා පොහොට්ටුව සොරතොට ප්රාදේශීය සභාවේ. වැලිකන්ද ප්රාදේශීය සභාවේ සමගි ජන බලවේගය එකට එකතු වෙලා ලස්සනට වැඩ කළා. එක්සත් ජාතික පක්ෂයේ දෙන්නා පූර්ණ සහයෝගය දුන්නා ඌව පරණගම ප්රාදේශීය සභාවේ බලය හදද්දී. දොඩංගොඩ ප්රාදේශීය සභාවේ සර්වජන බලය උදව් කළා. ඔහොමනේ. දැන් ඒ ප්රාදේශීය සභාවලදී මේගොල්ලෝ එකතු වෙලා වැඩ කළා. පේන විදිහට කන්ටේනර් සිද්ධියේදීත් එකට එකතු වෙලා වැඩ කරනවා. එකට එකතු වෙලා වැඩ කරන්නේ මෙහෙමයි, කොම්පැනිකාරයෝ ටික නිදහස් කරන්න ඔක්කොමලා එකඟයි.
මේ ආණ්ඩුව වුණත් හැම තිස්සෙම සමාගම්කරුවන්ව නිදහස් කළානේ. ලොකු ධනපතියෝ, ලොකු ජාවාරම්කාරයෝ ටික නිදහස් කළා. හැම තිස්සෙම සිහිපත් කරේ දේශපාලනඥයා. දේශපාලනඥයා හොරා කිව්වා. දැන් විපක්ෂෙත් එහෙමයි. විපක්ෂයෙත් කියන්නේ ඇමැති හොරා කියලා. ඇමැති හොරා කියනවා මිසක, හැමදාම පරීක්ෂා නොකර කන්ටේනර් එළියට ගත්ත 65 කවුද, කොම්පැනි 65 කවුද කියන එක ගැන ප්රශ්න කරන්නේ නෑ.
එතකොට මේකේ නිශ්චිතවම කියනවා, ‘බහාලුම් නිදහස් කිරීමේ ක්රියාවලියේදී ඇතැම් ආනයනකරුවන්ගේ බහාලුම් කිහිප වරක් භෞතික පරීක්ෂාවකින් තොරව නිදහස් කිරීම සඳහා තෝරාගැනීම අහඹු සිදුවීමක්ද? එසේ නැතහොත් එම ආනයනකරුවන් වෙනුවෙන් විශේෂ අනුග්රහයක් දැක්වූවාද යන්න තහවුරු කරගැනීම සඳහා ප්රමාණවත් තොරතුරු නොමැති අතර, බහාලුම් නිදහස් කිරීමේ කමිටුව විසින්ද අදාළ බහාලුම් නිදහස් කිරීම සඳහා තෝරාගත් පදනම නිශ්චිතව දක්වා නොමැත.’
මෙතැන තමයි රහස තියෙන්නේ. බහාලුම් ගොඩක් ගොඩ ගැහිලා තියෙද්දී තදබදය අඩුකරන්න කියලා 309ක් නිදහස් කරන්න තීරණය කරනවා. ඒ 309 තෝරාගත්තේ කවර පදනම යටතේද කියලා කමිටුව කියන්නේ නෑ. ඒ 309 ගත්තට පස්සේ, ඒ කොම්පැනි මීට කලිනුත් පරීක්ෂා නොකර නිදහස් කරලා තියෙනවා.‘ රතු ලේබල් සහිත ඉහළ අවදානමක් සහිත බහාලුම් ආනයනය කළ ආනයනකරුවන් සම්බන්ධයෙන් වන පෙර වැරදි පිළිබඳ තොරතුරු විමර්ශනයට ලබාදී නොමැත.’
දැන් මේ කොම්පැනි 65 තියෙනවනේ, කොම්පැනි 65 කිව්වට මම කිව්වේ හත් අට දෙනෙක් ඉන්නේ අයිතිකාරයෝ කියලා. ඒ හත් අට දෙනා මීට කලින් කරලා තියෙන ජාවාරම් ගැන කිසිදු තොරතුරක් කමිටුවට දීලා නෑ. ඒ ගැන හොයලත් නෑ.
මෙතැන බරපතළ ප්රශ්නයක් තියෙනවා. විශාල අක්රමිකතාවක් වෙලා කියන එක පැහැදිලියි. ලොකු ධනපතියෝ කීප දෙනෙක් එකතු වෙලා, එක්කෝ ලංකාවේ ජාතික ආරක්ෂාව අනතුරේ හෙළලා තියෙනවා. නැත්නම් ලංකාවේ මහජන සෞඛ්යය අවදානමේ හෙළන විදිහට, රසායනික අපද්රව්ය වගේ දේවල් ලංකාව ඇතුළට ගෙනල්ලා තියෙනවා. රසායනික අපද්රව්ය වගේ දේවල්. එහෙමත් නැතිනම්, ආනයනය සීමාකරනු ලැබූ භාණ්ඩ හංගලා ගෙනල්ලා බදුවල අතිදැවැන්ත වංචාවක් කරලා තියෙනවා. විශාල බදු වංචාවක් කරලා තියෙනවා. දැන් මේ ප්රශ්නේ තියෙන්නේ, සාමාන්ය ජනතාව සීනි 250ටයි, ලූනු 500ටයි, සබන් කැටේටයි, බයිසිකල් කටුවට ගහන පෙට්රල් ලීටරේටයි, මේ හැම එකටම අධික ලෙස බදු ගෙවද්දී, ධනකුවේරයෝ ටිකක් විශාල බදු වංචාවක් කරලා තියෙනවා කියලා ඉතා පැහැදිලියි.
ඒ විතරක් නෙවෙයි මේකේ වැදගත්ම එක තමයි, මේකේ 17 වැනි පිටුවේ කියනවා මේ කමිටුව,
අර තදබදයත් කෘත්රිමව හදපු එකක්ද කියලා සැකයි කියලා. කමිටුව කියනවා, එක පැත්තකින් තදබදය කෘත්රිමව හදපු එකක්ද කියලා සැකයි. දෙවැනි එක, මේ තදබදය තිබියදීම පවා මේ ජාතියේ අවදානම් වැඩ නොකර, සාමාන්ය පටිපාටියෙන් ගිහිල්ලා තදබදය මගහරවා ගැනීමේ අවස්ථා තිබ්බා කියලා, ඒගොල්ලෝ නිරීක්ෂණය කරනවා කියලා.
Front Line Socialist Party
