පසුගිය දිනවල මුළුමහත් ලෝකය පුරාම විවිධ අපූරු පුවත් මවන එක්තරා විශේෂිත පුද්ගලයකු විය. ඔහු මවන ලද පුවත් මහත් ආන්දෝලනයකින් ලෝකය පුරා ප්රචලිත වන්නට වූයේය. ලෝකයේ නොයෙකුත් රටවල ජනතාව මිලියන ගණනින් ඔහුගේ පුවත් ගැන කතා වන්නට වූයේය. මෙලෙස මුළුමහත් ලෝකයක්ම කණපිට හැරවීමට සමත් වූ සුවිශේෂ මිනිසා කවරෙක්ද? ඔහු වෙනත් කවරෙකුත් නොවේ. ඇමෙරිකාවේ නව ජනාධිපති ධුරයට තේරීපත්වූ ඩොනල්ඩ් ට්රම්ප් මෙම අපූරු මිනිසා විය. පසුගිය 2025 ජනවාරි 20 දා ඔහු ඇමෙරිකාවේ නව ජනාධිපතිවරයා ලෙස පත්වූ අතර, මින් පෙරද ඔහු ජනාධිපති ධුරයේ 2017 ජනවාරි සිට 2021 ජනවාරි දක්වා කටයුතු කළේය. පසුගියදා ඔහු නැවත වතාවක් ජනාධිපති ධුරයට පත්වූ පසු ඔහු වැඩ භාරගත් විටම ජනාධිපති නියෝගයන් 200ක පමණ ප්රමාණයකට අස්සන් තැබීය. මෙම නියෝගයන් බහුතරයක්ම මහත් ආන්දෝලනයකට පත්වන්නට වූයේය. Sri Lanka Latest News
ඇමෙරිකාව යනු ලෝකයේ ප්රධානතම බලවතා වන අතර, ඇමෙරිකාවේ ජනාධිපතිවරයා යනු ලෝකයේ බලවත්ම පුද්ගලයා ලෙසට ලොව බොහෝ බහුතර ජනතාවක් පිළිගනු ලබති. එවැනි වටපිටාවක් තිබියදී පසුගියදා දෙවැනි වතාවටත් ඇමෙරිකාවේ ජනාධිපති ධුරයට පත්වූ ඩොනල්ඩ් ට්රම්ප් වෙත හිමිවී ඇත්තේද අසීමිත බලයකි. ඒ නිසාම ඔහු විධායක ජනාධිපති බලතල භාවිත කරමින් ඉහත ජනාධිපති නියෝගයන් පැනවූයේය. එහෙත් එම නියෝගයන් පනවා ගතවූයේ දින කිහිපයක් පමණි. එම නියෝගයන්ගේ හොඳ නරක බොහෝ දෙස් විදෙස් පාර්ශ්ව විසින් කතාකරන්නට ගත්තේය. එසේම බොහෝ විවේචනයන් ඉදිරිපත් වන්නටද විය. මේ නිසා ඩොනල්ඩ් ට්රම්ප් ජනාධිපතිවරයා බලයට පත්වී හරියටම මාසයක කාලයක් ගතවන්නට මත්තෙන්ම ඇමෙරිකානු සමාජය තුළ සහ ලෝක පාර්ශ්වයන් තුළ විශාල අර්බුදයක් හටගත්තේය. එසේම මෙම කෙටි කාලය තුළදී ජනාධිපති ඩොනල්ඩ් ට්රම්ප්ගේ නියෝගයන්ට එරෙහිව සමහර සමාජ පාර්ශ්ව නීතිමය මගටද බැස්සේය. එතැනින්ද කෙළවරක් නොවී එම නියෝගයන්ට එරෙහිව ඇමෙරිකාවේ මහාධිකරණ සහ ශ්රේෂ්ඨාධිකරණවල නඩුහබද ගොනු කළේය. එහිදී එම අධිකරණවල විනිසුරුවරුන් ගණනාවක් විසින් ඉහත ජනාධිපති නියෝගවලට එරෙහිව වාරණ නියෝගයන්ද පනවනු ලැබුවේය. ඒ ආකාරයට මේ වනවිට මහාධිකරණ විනිසුරුවන් හත් දෙනකු පමණ ට්රම්ප් නියෝගයන්ට එරෙහිව වාරණ නියෝගයන් පැනවූයේය. එහෙයින් ඇමෙරිකානු ජනාධිපතිවරයාට ඔහුගේ සමහර ප්රබල නියෝගයන් හකුලා ගැනීමට සිදුව ඇත. මෙවැනි වටපිටාවක් ඉතා කෙටි කාලයක් තුළදී උද්ගතවූ හෙයින් මේ වනවිට ජනාධිපතිවරයාට තිබුණු සුවිශාල ජනප්රියත්වය සහ ගෞරවයද යම් ආකාරයකින් ගිලිහී ගොස් ඇත. එවැනි තත්ත්වයක් නිර්ණය කිරීමට හැකිව ඇත්තේ පසුගියදා ඇමෙරිකාව තුළ සිදුකරන ලද ජනතා මත විමසුම් කිහිපයක ප්රතිඵලවලට අදාළවය.
ඇමෙරිකාවේ ප්රකට ජනමත විචාරණ සමීක්ෂණ ආයතන, ප්රකට ජනමාධ්ය ආයතන මෙන්ම ප්රධාන පෙළේ ඇමෙරිකානු විශ්වවිද්යාල කිහිපයකින්ද මෙම සමීක්ෂණ සිදුකර ඇත. මේ අනුව පසුගිය සතියක පමණ කාලය තුළ එවැනි සමීක්ෂණ 05ක් පමණ සිදුකර ප්රතිඵල එළිදක්වා තිබුණු ආකාරය දක්නට හැකිවිය. මෙම ප්රතිඵල සාරාංශයන් කිහිපයක් පසුගියදා දෙස් විදෙස් මාධ්ය මගින් ප්රකාශයට පත්කර තිබිණි. මෙහි යම් විශ්ලේෂණයක් සොයා බලමු.
‘ඇමෙරිකානු ජනාධිපති ඩොනල්ඩ් ට්රම්ප්ගේ පරිපාලනයේ අපේක්ෂාවන් ගැන ඇමෙරිකානුවන්ගෙන් බහුතරයක් කනස්සල්ලට පත්ව සිටියි’ යන සිරස්තලය යටතේ එක් මාධ්ය විශ්ලේෂණ ලිපියක් පළකෙරී තිබිණි.
‘ඩොනල්ඩ් ට්රම්ප් පරිපාලනය ආරම්භ වී සති තුනක පමණ කෙටි කාලයක් තුළදීම බහුතර ඇමෙරිකානුවන් සහ ඩිමොක්රටික් හා ස්වාධීන මන්ත්රීවරුන් ඇතුළුව පාර්ශ්ව ගණනාවක 54%ක පමණ පිරිසක් නව පරිපාලනයේ අපේක්ෂාවන් ගැන බලවත් කනස්සල්ලට පත්ව සිටිති. නව රජයේ නව ප්රතිපත්ති කිහිපයකටම අදාළව මෙම කලකිරීම උද්ගතව ඇත. තවද රුසියානු-යුක්රේන යුද්ධය සහ ඊශ්රායල-පලස්තීන ගැටුම සම්බන්ධයෙන්ද ඇමෙරිකානු ප්රතිපත්ති ප්රසිද්ධියේම විවේචනය කරනු ලබන කනස්සල්ලට පත්ව සිටින ඇමෙරිකානුවන්ගේ සංඛ්යාවද ඉතා වැඩිවී තිබේ. මේරිලන්ඩ් විශ්වවිද්යාලයේ තීරණාත්මක ගැටලු පිළිබඳ නවතම මත විමසුමේ ප්රධාන සොයාගැනීම් කිහිපයක් මේවාය. ජනාධිපති ට්රම්ප්ගේ නව පරිපාලනය පිළිබඳ ඔවුන්ගේ (ජනතාවගේ) සමස්ත දැක්ම විස්තර කරන ලෙස විමසූ විට ප්රතිචාර දැක්වූවන්ගෙන් 54%ක්ම ප්රකාශ කර සිටියේ, ඔවුන්ගෙන් ‘ඉතා කනස්සල්ලට පත්ව සිටින’ (40%ක්) හෝ ‘තරමක් කනස්සල්ට පත්ව සිටින’ (14%ක්) බැව් ප්රකාශ කිරීමයි. එසේම (23%ක්) ‘තරමක් බලාපොරොත්තුසහගත’ වන අතර, (37%ක්) ‘ඉතා බලාපොරොත්තුසහගත’ ලෙසටද තම මතය ප්රකාශ කර සිටියේය. මේ අතර ‘ඉතා අඩු බලාපොරොත්තුසහගතව’ (14%ක්)ද, ‘කනස්සල්ලට පත් නොවන හෝ බලාපොරොත්තු රහිතව’ (9%ක්)ද, නිර්ණය කිරීමට සමීක්ෂණයට හැකිවිය.’
එම සමීක්ෂණ වාර්තාව තවදුරටත් මෙසේ කියා සිටියි.
‘ඇමෙරිකානු ආකල්පද පක්ෂග්රාහී රේඛා ඔස්සේ බෙදී තිබීම පුදුමයක්ද නොවේ. ඇමෙරිකාවේ විරුද්ධ පක්ෂය වන ඩිමොක්රටික් පක්ෂයෙන් 90%ක්ද කනස්සල්ලට පත්ව සිටින අතර, පාලක රිපබ්ලිකන් පක්ෂයෙන් 17%ක් පමණක් එයම දැනෙන බව වාර්තා කරයි. ස්වාධීන අපේක්ෂකයන්ගෙන් බහුතරයක් එනම්, 54%ක්ද තමන් කනස්සල්ලට පත්ව සිටින බව පවසති. ස්වාධීන අපේක්ෂකයන් යනු යම් ප්රධාන පක්ෂයකට පක්ෂග්රාහී නොවන පිරිසයි. මේ අතර රාජ්ය පාලක රිපබ්ලිකන් පක්ෂයෙන් 77%ක්ම තමන් බලාපොරොත්තුසහගත බව පවසන අතර, ඩිමොක්රටික් පක්ෂයෙන් 6%ක් සහ ස්වාධීන පක්ෂයෙන් 35%ක් පමණක් තමන් බලාපොරොත්තුසහගත බව පවසති. බොහෝ ජනතාව ප්රධාන වශයෙන් ආර්ථිකයට අදාළව තම මතය ප්රකාශ කර සිටියේය. එසේම ඉන් පසුව ‘සංක්රමණ සහ පිටුවහල් කිරීම’, ‘උපන් පුරවැසිභාවය’, ‘පළමු සංශෝධන අයිතිවාසිකම්’, ‘විදේශ ආධාර බෙදාදීම’, ‘ජාත්යන්තර යුද ගැටුම් සඳහා ඇමෙරිකාව මැදිහත් වීම, ‘ෆෙඩරල් ආයතන සහ දෙපාර්තමේන්තු ක්රියාවලිය’ යන මාතෘකා ප්රධාන තැනක් ගත්තේය.
ප්රියන්ත හෙට්ටිගේ
