පොලිස් නිලධාරීන් තිදෙනෙකු සාමාන්ය පුරවැසියෙකු ඉදිරියේ දණ ගසා සමාව ඉල්ලූ පුවතක් අධිකරණයෙන් වාර්තාවෙයි.Sri Lanka Latest News
මෙලෙස සමාව ගෙන ඇත්තේ වයස අවුරුදු 81ක් වයසැති ගොඩ්වින් පෙරේරා නමැති ජ්යේෂ්ඨ පුරවැසියෙකුගෙනි.
එලෙස පොලිස් නිලධාරීන් තිදෙනා සමාව ගෙන ඇත්තේ විජිත් කේ මලල්ගොඩ, අචල වෙංගප්පුලි සහ අර්ජුන ඔබේසේකර යන විනිසුරු මඩුල්ල ඉදිරියේදී පෙත්සම්කරු සහ වගඋත්තරකාර පොලිස් නිලධාරීන් අතර ඇතිවූ සමතයක් අනුවය.
2017 වසරේදී ගොඩ්වින් පෙරේරා මහතා කොළඹ පෞද්ගලික රෝහලක් වෙත යමින් සිටියදී මාර්ගයක් අසළ අනතුරකට පත්ව සිටි කම්කරුවෙකු සම්බන්ධයෙන් පොලීසියට දැනුම්දීමක් සිදුකර ඔහුව රෝහල්ගතකිරීමට පියවර ගෙන තිබුණි.
අනතුරුව වගඋත්තරකාර පොලිස් නිලධාරීන් විසින් ගොඩ්වින් පෙරේරා මහතාව රැගෙන ගොස් පොලිස් සිරමැදිරියට දමා ඇති බව පැමිණිල්ලේ සඳහන්ව තිබේ.
එහිදී තමන් විසින් නීතිය ක්රියාත්මක කරන්නේ මෙසේදැයි විමසූ බවත් එයට එම නිලධාරීන් අයහපත් ප්රතිචාරයක් දැක්වූ බවත් ඒ මහතා සිය පැමිණිල්ලේ වැඩිදුරටත් සඳහන් කර තිබේ.
ඒ අනුව තමන්ව නීතිවිරෝධීව අත්අඩංගුවට ගැනීමට එරෙහිව අගතියට පත්වූ ගොඩ්වින් පෙරේරා මහතා ශ්රේෂ්ඨාධිකරණයේ මෙලෙස මූලික අයිතිවාසිකම් පෙත්සමක් ගොනු කර ඇති අතර නීතිඥ විජිත් සිං මහතා ඔහුගේ නීතිඥවරයා විය.
කෙසේවෙතත් වගඋත්තරකරුවන් සමග සමාදානයකට යෑමට පෙත්සම්කාර ගොඩ්වින් පෙරේරා මහතා එකඟවීම මත අද එම එකඟත්වය විමසීම සඳහා ශ්රේෂ්ඨාධිකරණයේදී නඩුව කැඳවිණි.
නඩුව කැඳවූ අවස්ථාවේදී පෙත්සම්කාර පෙරේරා මහතා අධිකරණය ඉදිරියේ පෙනී සිටියේය.
එසේම වගඋත්තරකාර නාරාහේන්පිට පොලිසියේ සැරයන්වරයා සහ කොස්තාපල්වරුන් දෙදෙනාගේ නම් අඬගැසු පසු ඔවුන් තිදෙනා ද අධිකණය ඉදිරියේ පෙනී සිට තිබේ
පොලිස් නිලධාරීන් තිදෙනා අද අධිකරණයට පැමිණ ඇත්තේ පොලිස් නිලධාරීන් විශේෂ අවස්ථාවලදී අඳින අංක 01 නිල ඇඳුමින් සැරසී නිල පදක්කම් සහ ආයිත්තම්ද පැළඳ වීම විශේෂත්වයකි.
මෙහිදී වග උත්තරකරුවන් සමග සමාදානවීමට එකඟදැයි අධිකරණය පෙත්සම්කරුගෙන් විමසා ඇති අතර ඔහු ඊට එකඟත්වය පළකර තිබේ.
වගඋත්තරකාර පොලිස් නිලධාරීන් තිදෙනා ඇමතූ විනිසුරු විජිත් කේ මලල්ගොඩ මහතා මින් ඉදිරියට මෙවැනි අකටයුතුකම් සිදු නොකරන ලෙස පොලිස් නිලධාරීන්ට දැඩිව අවවාද කර තිබේ.
රටේ ජ්යේෂ්ඨ පුරවැසියෙකුට නිදහසේ කටයුතු කිරීමට අයිතියක් ඇති බව නොදන්නේදැයි විමසූ විනිසුරුවරයා ජ්යේෂ්ඨ පුරවැසිකුට සලකන්නේ මෙලෙසදැයි ප්රශ්න කළේය.
නඩුව සමතවීමට පෙත්සම්කරු එකඟවීම නිසා මෙලෙස අවසන් කරන බව කී අධිකරණය එසේ නොවිණිනම්
පෙත්සම්කරුගේ වයසද සලකා ලොකු වන්දියක් ගෙවීමට නිලධාරීන්ට සිදුවීමට ඉඩ තිබුණු බව ද සඳහන් කළේය.
නැවත මෙවැනි කටයුතු සිදු නොකරන ලෙස අධිකරණය පොලිස් නිලධාරීන් තිදෙනාට එහිදී අවවාද කර තිබේ.
ඉන් අනතුරුව පොලිස් නිලධාරීන් තිදෙනා වෙන් වශයෙන් පෙත්සම්කාර පෙරේරා මහතා ඉදිරිපිටට ගොස් දණ නමා වැඳ සමාව ලබාගෙන තිබේ.
