ශ්රී ලාංකේය සිනමාවේ නිළි රැජින නම් විරුදාවලිය ලත් ප්රවීණ රංගන ශිල්පිනී මාලනී ෆොන්සේකා මහත්මියගේ වියෝවෙන් මේ වනවිට මුළු රටම කම්පාවට පත්වෙනවා. අපි දන්නවා එතුමිය කාලයක් රෝගාතුරව පසුවූ බව. ඒ කාලය පුරාම ෆොන්සේකා මහත්මියගේ වගකීම පැවරිලා තිබුණේ විශේෂඥ වෛද්ය සංජය හෙයියන්තුඩුව මහත්මයාට. එතුමා ශ්රී ලංකාවේ වකුගඩු රෝග නිවාරණ ඒකකයට අදාළව කටයුතු කරන විශේෂඥ වෛද්යවරයෙක්. එතුමා, රටට ජාතික වස්තුවක් වුණු මාලනී ෆොන්සේකා මහත්මියගේ ප්රතිකාර කටයුතු භාරව සිටි විශේෂඥ වෛද්යවරයා වීමත් බොහොම සුවිශේෂ දෙයක්. ඉතින් අපි දැන් කතාකරන්න සූදානම් වෙන්නේ වකුගඩු රෝග විශේෂඥ සංජය හෙයියන්තුඩුව මහත්මා සමග. Sri Lanka Latest News
මාලනී ෆොන්සේකා මහත්මියගේ රෝගී තත්ත්වය සම්බන්ධයෙන් වගකීම දරමින් කටයුතු කිරීම ඔබතුමාට ලොකු අභියෝගයක් වෙන්න ඇති?
ඇත්තටම මාලනී ෆොන්සේකා මහත්මිය මට මුණගැහෙන්නේ මීට වසර 10කට විතර කලින්. සමස්ත ලංකා වකුගඩු රෝගීන්ගේ සංගමයේ විවිධ සමාජ සත්කාර කර්තව්යයන් ඉටුකිරීමට එතුමියගේ ආගමනයත් සමග. ඒත් සමග සමාජ සත්කාර කටයුතුවලින් එතුමිය විශාල සේවාවක් අපේ රටේ වකුගඩු රෝගීන්ට සලස්වන්න අපේ සංගමය වෙත අතිමහත් දායකත්වයක් ලබාදුන්නා. ඒ සේවාවන්ට අමතරව මා වෛද්යවරයෙක් හැටියට එතුමියගේ සෞඛ්යමය කටයුතුවලදී විවිධ අවස්ථාවලදී එතුමියට සහාය, උපදේශනය ලබාදුන්නා.
විශේෂයෙන්ම එතුමිය සමහර අවස්ථාවලදී ඉතා දැඩි ලෙස රෝගාතුර වුණා. නමුත් ඒ සියලු අවස්ථාවලදී මම දැක්ක ඉතා හොඳ ගුණාංගයක් තමයි රෝගියකු සතුව තිබිය යුතු, ඒ සියලු අභියෝගයන්ට කිසිම පැකිලීමක්, බියක්, සැකක් නැතුව මුහුණ දෙමින් ඒවා ජයගැනීමට ස්ථිර අධිෂ්ඨානයෙන් යුතුව එතුමිය ක්රියා කළ ආකාරය. ඒක හැම රෝගියකුටම පරමාදර්ශයක් සපයන බව මම විශ්වාස කරනවා. මම හිතන්නේ එතුමිය තමන්ගේ වෘත්තිය, විවිධ දක්ෂතාවන් අපේ රටට ගෙනහැර දැක්වූවා. ඒ ගැන අපි අමුතුවෙන් කතාකරන්න අවශ්ය නෑ. නමුත් මම වෛද්යවරයකු හැටියට එතුමිය ඒ පළකළ නිර්භීතභාවය සහ නොසැලෙන අධිෂ්ඨානයෙන් යුතුව රෝගයට මුහුණ දීමේ හැකියාව ඉතා විශිෂ්ට ගුණාංගයක් හැටියට දකිනවා. ඇය, වකුගඩු රෝගීන්ගේ සංගමයේ ප්රධාන අනුශාසිකාවක් පසුගිය වසර 10 පුරාම. ඇය ඒ රෝගීන්ට කරන ලද සියලු සේවාවන්ට ඉතා ගෞරවනීය ස්තුතිය සහ පුණ්යානුමෝදනාව එතුමියට සිදුකරන ගමන්ම, එතුමියට ඉක්මන් භවයකදීම නිර්වාණ සම්පත්තිය උදාවේවා කියලා ප්රාර්ථනා කරනවා.
වෛද්යතුමා කියපු විදියට මාලනී ෆොන්සේකා මහත්මිය තමන් රෝගයට ප්රතිකාර ගන්නා අතරතුරේදීම එවැනි රෝගීන් දසදහස් ගණනකගේ ජීවිත සුවපත් කරන්න ඇපකැප වෙලා කටයුතු කළා. සමහර විට ගොඩක් අය කරන්නේ රෝගයක් වැලඳුණාම මානසිකව කඩාවැටෙන එක. නමුත් ඔබතුමා කියපු විදියට ෆොන්සේකා මහත්මියගේ චිත්ත ශක්තිය බොහොම ඉහළයි. ඒ නිසාම එතුමිය මේ රෝගයට ඖෂධ ලබාගන්නා අතරෙම වකුගඩු නිවාරණ සංගමය සමග එකතු වෙලා රට පුරා විශාල වැඩකොටසක් දියත් කළා. අපි කැමැතිය ඒ ගැනත් දැනගන්න?
එතුමිය කිසි දිනෙක මානසිකව කඩාවැටුණේ නෑ. ඉතා ශක්තිමත්භාවයෙන් යුතුව රෝගවලට මුහුණ දුන්නා. එතුමිය ඒ රෝගාබාධ තිබියදී සමස්ත ලංකා වකුගඩු රෝගීන්ගේ සංගමයේ විවිධ රෝගී මෙහෙවර, රෝගී සත්කාරයන් සඳහා සහාය ලබාදුන්නා. ඒකට මම උදාහරණ කීපයක් ඉදිරිපත් කරන්නම්. ඔබ දැකලා ඇති සමස්ත ලංකා වකුගඩු රෝගීන්ගේ සංගමය ප්රකාශය වන ‘වකුගඩුව’ කියන පුවත්පත. ඒ පුවත්පත ප්රවර්ධනය කිරීම සඳහා, මහජනතාව අතරට ගෙනයෑම සඳහා එතුමිය විවිධ අවස්ථාවලදී අප සමග දැඩි අව්වේ වේළෙමින් බොහෝ දුක් ගැහැට විඳිමින් විශාල මෙහෙවරක් කළා. මට මතකයි වකුගඩු රෝගීන් සඳහා පවත්වන විවිධ උත්සවවලදී ආගමික වැඩසටහන්වලදී එතුමිය ඒ සඳහා නොපැකිලව, නිරහංකාරව ඉදිරිපත් වෙමින් අපිට දායකත්වය ලබාදුන්නා. ඒ වගේම මට මතකයි අපේ සමස්ත ලංකා වකුගඩු රෝගීන්ගේ සංගමය විසින් එංගලන්තයේ එස්.එල්.කේ. ෆවුන්ඩේෂන් ආයතනය සමග එක්වෙලා ‘දායාද ’ කියලා ප්රසංගයක් සංවිධාන කළා. ඒ ප්රසංගය වෙනුවෙන් එතුමිය එංගලන්තයට ගිහින් ඊට දායකත්වය ලබාදුන්නා, තමන්ගේ රෝගී තත්ත්වය ගැන පවා නොතකමින්. ඉතින් එතුමිය ලබාදුන් ඒ දායකත්වයන්, අපි සමස්ත ලංකා වකුගඩු රෝගීන්ගේ සංගමය විදියට මේ මොහොතේ ඉතා කෘතවේදීත්වයෙන් යුතුව සිහිපත් කරන්න කැමැතියි.
Newsfirst.lk ඇසුරිනි
