අඹේවෙල ප්රදේශයේ රජයේ ඉඩමක් ලබා නොදුන්නා යැයි පවසමින් නුවරඑළිය ප්රාදේශීය ලේකම්වරයාට දුරකථනයෙන් තර්ජනය කළ මධ්යම පළාත් හිටපු ආණ්ඩුකාර නිලූකා ඒකනායකගේ සැමියා නුවරඑළිය මූලස්ථාන පොලිසියට ඊයේ (01 වැනිදා) පෙරවරුවේදී පැමිණ ප්රාදේශීය ලේකම්වරයාගෙන් සමාව ගත්තේය.Sri Lanka Latest News
මධ්යම පළාත් ආණ්ඩුකාරවරිය ලෙස කටයුතු කරන ලද සමයේදී නුවරඑළිය ග්රෙගරි වැව ආශ්රිතව තිබූ රජයේ ඉඩමක්ද ඇය සහ සැමියා විසින් භාවිතා කළ අතර, පසුව එම ඉඩම නුවරඑළිය මහ නගර සභාවේ හිටපු නගරාධිපතිවරයෙකු වූ ව්යාපාරිකයෙකුට විකුණා තිබේ.
එම ඉඩම වෙනුවට, නුවරඑළිය අඹේවෙල ප්රදේශයේ පිහිටා තිබෙන අක්කරයක පමණ ඉඩමක් සංවර්ධන කටයුත්තකට ලබාදෙන ලෙස හිටපු ආණ්ඩුකාරවරියගේ සැමියා නුවරඑළිය ප්රාදේශීය ලේකම් ඩී.ඒ.පී. දනන්සූරියගෙන් ඉල්ලීමක් කර ඇත. එම ඉඩම ලබාදීමට තමාට නීත්යානුකූල අයිතියක් නොමැති බව ප්රාදේශීය ලේකම්වරයා විසින් හිටපු ආණ්ඩුකාරවරියගේ සැමියාට දැනුම් දී තිබේ.
මෙම සිදුවීමෙන් පසුව, අදාළ ඉඩම ලබාදීමට කටයුතු නොකළහොත් ලබන 21 වැනිදායින් පසු වෙනදේ බලාගමු යැයි ප්රාදේශීය ලෙකම්වරයාට ඔහු දුරකථනයෙන් තර්ජනය කර ඇත. ප්රාදේශීය ලේකම්වරයා මෙම තර්ජනය කිරීම සම්බන්ධව නුවරඑළිය මූලස්ථාන පොලිසියට පැමිණිලි කිරීමට කටයුතු කළේය.
මේ අතර, මෙම සිද්ධිය සම්බන්ධයෙන් සමාවන ලෙසත්, සැමියාට සමාව ලබාදෙන ලෙසත් මධ්යම පළාතේ හිටපු ආණ්ඩුකාර නිලූකා ඒකනායක නුවරඑළිය දිස්ත්රික් ලේකම් නන්දන ගලබොඩට සහ නුවරඑළිය ප්රාදේශීය ලේකම්වරයාට දුරකථනයෙන් පවසා තිබේ. ඇයගේ සැමියාද ප්රාදේශීය ලේකම්වරයාට දුරකථනයෙන් පවසා ඇත්තේ සිද්ධිය සම්බන්ධයෙන් තමා සමාව ගැනීමට සූදානම් බවය.
ඒ අනුව, හිටපු ආණ්ඩුකාරවරියගේ සැමියා නුවරඑළිය පොලිසියට පැමිණ ප්රාදේශීය ලේකම්වරයාගෙන් සමාව ගත්තේය. දුරකථන ඇමතුම ලබාගත් අවස්ථාවේ තමා බීමත්ව සිටි බවද ඔහු පොලිසියට පවසා ඇත. නැවත කිසිදු දිනෙක මෙවැනි ආකාරයෙන් තර්ජනය නොකරන බවට පොලිස් පොතේ ලියා, ප්රාදේශීය ලේකම්වරයාගෙන්ද සමාව ගෙන ඔහු පිටව ගියේය.
තර්ජනාත්මක දුරකථන ඇමතුමක් නුවරඑළිය ප්රාදේශීය ලේකම්වරයාට ලබාදීමේ සිද්ධිය සම්බන්ධයෙන් ශ්රී ලංකා ප්රාදේශීය ලේකම්වරුන්ගේ හා සහකාර ප්රාදේශීය ලේකම්වරුන්ගේ සංගමය විසින් පොලිස්පතිවරයාට ඉකුත් සිකුරාදා (30 වැනිදා) ලිපියක්ද යොමුකර තිබිණි.
