ලබන බ්රහස්පතින්දා පාර්ලිමේන්තුවට ඉදිරිපත් කිරීමට නියමිතව තිබූ මහබැංකු පනත් කෙටුම්පත සම්බන්ධයෙන් තවත් අධ්යයනය කොට සංශෝධන ඉදිරිපත් කිරීම සදහා යම් කාලසීමාවක් ලබා දෙන ලෙසට ඉල්ලමින් පොදු විපක්ෂය වෙනුවෙන් විපක්ෂ නායක සජිත් ප්රේමදාස මහතා අද පෙරවරුවේ ජනාධිපති රනිල් වික්රමසිංහ මහතා වෙත දුරකතන ඇමතුමක් ලබා දී ඇති බව වාර්තා වේ.
මෙම දුරකතන සාකච්ඡාවේදී විපක්ෂනායකවරයා පොදු විපක්ෂයේ මතය ජනාධිපතිවරයාට දැනුම් දෙමින් කරනු ලැබූ ඉල්ලීමට එකගතාව පළකරමින් බ්රහස්පතින්දා දින එම පනත් කෙටුම්පත පාර්ලිමේන්තුවට ඉදිරිපත් නොකරන බව ජනාධිපතිවරයා විපක්ෂනායකවරයා වෙත දැනුම් දී ඇති බව දැනගන්නට ඇත.
මෙම පනත් කෙටුම්පත ඉදිරිපත් කළ අවස්ථාවේදී විපක්ෂයේ පාර්ශ්ව කිහිපයක්ම එය අභියෝගයට ලක්කරමින් ශ්රේෂ්ඨාධිකරණය හමුවේ මූලික අයිතිවාසිකම් පෙස්සම් ගොනු කළ අතර ශ්රේෂ්ඨාධිකරණයද එහි වගන්ති 39කට සංශෝධන 82ක් යෝජනා කොට ඇති බව වාර්තා විය.
එමෙන්ම මේ සම්බන්ධයෙන් සමගි ජන බලවේගයද පසුගිය සතියේ රැස්ව සාකච්ඡා කර තිබූ අතර මෙම පනතේ ඇති භයානක තත්ත්වය මත එහිදී ඔවුන්ද ඊට සංශෝධන ඉදිරිපත් කිරීමට තීරණය කර තිබිණ.
මීට අමතරව ඊයේ දිනයේදී පාර්ලිමේන්තුවේ රැස්වූ පොදු විපක්ෂයේ විධායක කමිටුවද මේ සම්බන්ධයෙන් දීර්ඝව සාකච්ඡා කොට තිබුණු අතර ඊට සංශෝධන ඉදිරිපත් කිරීමට ඔවුන්ද තීරණය කොට තිබිණ.
ඒ අනුව අද පෙරවරුවේ විපක්ෂනායක සජිත් ප්රේමදාස මහතා ජනාධිපතිවරයාට දුරකතන ඇමතුමක් ලබා දී මෙම පනත් කෙටුම්පත සම්බන්ධයෙන් සමාජය තුළ බරපතළ සාකච්ඡාවක් මතුව ඇති බවත්, අධිකරණයද මෙහි ව්යවස්ථාවට අනුකූල නොවන වගන්ති රැසක් ඇති බව ප්රකාශ කොට ඇති බවත් පෙන්වා දී එය අධ්යයනය කොට සංශෝධන ඉදිරිපත් කිරීමට විපක්ෂයට යම් කාලයක් ලබා දෙන ලෙසට ඉල්ලීමක් කොට ඇත.
පොදු විපක්ෂයම සිටින්නේ මෙම ස්ථාවරයේ බවද විපක්ෂනායකවරයා මෙහිදී ජනාධිපතිවරයා වෙත දැනුම් දී ඇති බව වාර්තා වේ.
ඒ අනුව ඊට එකගතාව පළ කොට ඇති ජනාධිපතිවරයා පනත අධ්යයනය කොට සංශෝධන ඉදිරිපත් කිරීමට විපක්ෂයට අවශ්ය කාලය ලබා දීමට තීරණය කොට ඇත.
