පෙරපාසල් දරුවන්ගේ චර්යාවන් සහ ක්රියාකාරකම් පිළිබඳ සිදුකෙරෙන විශාලතම අධ්යයනයෙහි කටයුතු මේ වනවිට සාර්ථකව සිදුකෙරෙමින් පවතින බව කොළඹ විශ්වවිද්යාලයේ වෛද්ය පීඨයේ මහාචාර්ය, කොළඹ රිජ්වේ ආර්යා ළමා රෝහලේ ළමා රෝග පිළිබඳ විශේෂඥ වෛද්ය ප්රසාද් චතුරංග මහතා පවසයි. Sri Lanka Latest News
මෙරට බෝ නොවන රෝගවලට හේතුව වැරදි ආහාර හා චර්යාවන් බව දැනටමත් හඳුනාගෙන තිබෙන බවද, ඒ තත්ත්වය පාලනය කිරීම කළ හැකි හොඳම වයස අවුරුදු 03ත් 05ත් අතර වයස් සීමාව බවද විශේෂඥ වෛද්යවරයා කියයි.
මේ වනවිට පෙරපාසල් 60කට වැඩි ගණනක දරුවන් දහසක් පමණ යොදාගෙන ඔවුන්ගේ චර්යාවන් සහ ක්රියාකාරකම් පිළිබඳ විශාලතම අධ්යයනය සිදුකරමින් සිටින බවද මහාචාර්යවරයා කියයි.
මෙම පිරිසෙන් දැනටමත් පෙරපාසල් දරුවන් 400 කගේ පමණ එම අධ්යයනයන් අවසන් කර ඇති බවද ඒ මහතා පවසයි.
මෙම අධ්යයනය යටතේ ළමුන්ගේ සෙල්ලම් කිරීම, රූපවාහිනී සහ තිර භාවිතය, නිදාගන්නා පැය ගණන වැනි චාලක ක්රියාද, පිරිසුදුකම, මවුපියන් රැකබලා ගන්නා ආකාරය, කසළ කළමනාකරණය, ආහාර රටාව මැයෙන් වන කරුණු 08 ක් පිළිබඳ අධ්යයනය කරනු ලබන බවද හෙතෙම කීය.
සෞඛ්ය ප්රවර්ධන වැඩසටහන යටතේ පසුගිය පෙබරවාරි මාසයේදී යුනෙස්කෝ මූල්ය ආධාර යටතේ සහ ඕලෙන්ගො විශ්වවිද්යාලයේ සන්රයිස් පර්යේෂණ අංශයේ සම්පත් දායකත්වය යටතේ ආරම්භ කොට ඇති මෙම අධ්යයන කටයුතු ලබන සැප්තැම්බර් හෝ ඔක්තෝබර් මාසය වන විට අවසන් කිරීමට නියමිතව ඇතැයිද විශේෂඥ වෛද්යවරයා වැඩි දුරටත් කීය.
කොළඹ සෞඛ්ය ප්රවර්ධන කාර්යාංශයේ පැවැති මාධ්ය හමුවකදී විශේෂඥ වෛද්ය ප්රසාද් චතුරංග මහතා මෙම කරුණු අනාවරණ කළේය.
නන්දන ශ්රී දොරකුඹුර
