බරපතළ ජීවිත මරණ තර්ජනයක් හේතුවෙන් ශ්රී ලාංකික කාන්තා දේශපාලනඥවරියක පසුගියදා හදිසියේම නවසීලන්තයට පලාගිය බව ජාත්යන්තර මාධ්ය ආයතන කිහිපයක්ම වාර්තා කර ඇත. මෙම සුවිශේෂ පුවත මුලින්ම වාර්තා කර තිබුණේ ‘රේඩියෝ නිව්සීලන්ඩ්’ නමැති නවසීලන්තයේ ජාතික ගුවන්විදුලි සහ රූපවාහිනී මධ්යස්ථානය විසිනි. Sri Lanka Latest News
මාධ්ය වාර්තාවල නමක් සඳහන් නොකෙරුණු මෙම ලාංකික දේශපාලනඥවරියට පසුගිය කාලයක් පුරාම විවිධ ජීවිත තර්ජන එල්ල වී ඇත. පසුගිය සමීප කාලයකදී ඇයගේ ශ්රී ලංකාවේ නිවෙස එක්තරා නාඳුනන තුවක්කුකරුවන් පිරිසක් විසින් වටලන බවටද මාධ්ය වාර්තා සඳහන් කර ඇත. එසේම ඇය පසුගිය කාලයේ ලිංගික හිංසනයටද ගොදුරු වී ඇති බවටද කරුණු වාර්තා වෙයි. ඇයට එරෙහිව එල්ලවුණු මෙම තත්ත්වයන් පිළිබඳ පසුගිය කාලයේදී අධිකරණ විනිශ්චය සභාවක් මගින් විභාග කර තිබෙන බවටද කරුණු වාර්තා කර ඇත. මාධ්ය වාර්තා මෙම සිදුවීම ගැන තවදුරටත් මෙසේ කියා සිටියි.
මෙම ජීවිත තර්ජන අර්බුදයට මුහුණදී ඇති ලාංකික කාන්තාව දැනට 32 හැවිරිදි වියේ පසුවන බව පැවසෙයි. පසුගිය කාලයේ එක්තරා ප්රමුඛ මන්ත්රීවරයකුගේ සහචරයන් පිරිසක් මෙම තරුණ දේශපාලනඥවරියට යෝජනා කර ඇත්තේ ඇයට දේශපාලන හා වෘත්තීය ජීවිතය ඉදිරියට ගෙන යෑමට අවශ්ය නම්, යටකී මන්ත්රීවරයා සමග ලිංගිකව එක්විය යුතු බවයි. ඇය මෙම සිදුවීම ගැන සමීප මිතුරකුට පැවැසූ බවත්, ඉන් පසු එම මිතුරා එම සිදුවීම සමාජ මාධ්යවල පළකළ අතර, එයින් විශාල ආන්දෝලනයක් හටගත්තේය. මෙම තත්ත්වය යටතේ යටකී මන්ත්රීවරයා සහ ඔහුගේ සහචරයන් තමන් කෙරෙහි දැඩි වෛරයක් ඇතිකර ගත් බව ඇය විනිශ්ය සභාව ඉදිරියේ ප්රකාශ කර ඇත. ඉහත තර්ජන ඉදිරිපත් කළ දේශපාලනඥයා පසුගිය 2020 ජනාධිපතිවරණයටද ඉදිරිපත්වූ නමුත් ඔහු තේරීපත්වීමට සුදුසුකම් ලැබුවේ නැත.
මෙලෙස ජීවිත තර්ජනයට ලක්වූ කාන්තාවගේ මස්සිනා පසුගිය කාලයේ හදිසියේ යතුරුපැදි අනතුරකින් මියගිය පසු ඔහුගේ අවමංගල්යයේදී ඔහුගේ මිනී පෙට්ටියේ තිබී සටහනක් හමුවූ අතර, එහි සඳහන් වී ඇත්තේ මින් පසුව මරාදමනු ලබන්නේ ඇය බවත්ය. ඉන් පසුව ඇයට තර්ජනාත්මක දුරකතන ඇමතුම් දෙකක් ලැබුණු අතර, වරෙක ඇය මහමග සිටියදී ඇය දෙසට වේගයෙන් යතුරුපැදියක් ධාවනය වූ බවටද ඇය විනිශ්චය සභාවට පැමිණිලි කර තිබිණි. 2018 ප්රාදේශීය මැතිවරණයට පෙර දින ඇයට දේශපාලනයෙන් ඉවත් වන ලෙස ඉල්ලා සිටිමින් එක්තරා පිරිසක් තමන්ගේ නිවෙස අසල වෙඩිතබමින් සිටි බවටද ඇය පැමිණිලි කර ඇත. මෙම තත්ත්වය යටතේ ශ්රී ලංකාවේ දේශපාලනය තුළ කාන්තාවන්ට සිදුවන හිරිහැර වැඩිවෙමින් පවතින බවට ආරංචි මාර්ග යෝජනා කරන බව විනිශ්චය සභාව ප්රකාශ කර ඇත. ජීවිත තර්ජනයට ලක්වූ කාන්තාව විනිශ්චය සභාව ඉදිරියේ මෙසේ ප්රකාශ කර ඇත.
‘මාගේ ජීවිතයට ඇති බිය නිසා මම නැවත ශ්රී ලංකාවේ දේශපාලනයට සම්බන්ධ වීමට තරම් එඩිතර වන්නේ නැහැ. දේශපාලනයට පිවිසීම මාගේ ජීවිතයේ නරකම තීරණයයි. තමන්ව නැතිකරගෙන, තමන්ගේම ඇතුළත එයින් මියගොස් තිබෙනවා වැනි හැඟීමක් මට ඇතිවෙනවා. 2022දී මගේ මවුපියන්ගේ නිවෙසත් හදිසියේම ගිනිගත් අතර, එම ක්රියාවත් මා විශ්වාස කරන්නේ මට විරුද්ධ වූ ඉහත පුද්ගලයන්ගේ ක්රියාවක් විය හැකි බවටයි…’
දැනට නවසීලන්තයේ සරණාගතභාවය හිමිව තිබෙන මෙම 32 හැවිරිදි කාන්තාව මේ වනවිට එරටට සංක්රමණය වී ඇත. ඇය පසුගියදා ප්රකාශ කර ඇත්තේ ඇය නැවත ශ්රී ලංකාවට පැමිණියහොත් ඉහත දේශපාලනඥයා ඔහුගේ දේශපාලන ජීවිතය මා විසින් විනාශ කළේ යැයි සිතමින් තමන්ව මරාදැමීමකට හෝ ලක්කරනු ඇති බවයි. ඒ බිය තමන් තුළ තැන්පත්ව ඇති බව ඇය ප්රකාශ කර ඇත. මෙම කාන්තාවගේ මිතුරියක් මෙම සිදුවීම මෙසේ තම ‘ෆේස්බුක්’ පිටුවේ සඳහන් කර තිබිණී.
‘විරුද්ධ පක්ෂවල විවිධ පුද්ගලයන්ගෙන් සහ ලිංගික සබඳකම් පැවැත්වීමට ඇයට බලකළ මන්ත්රීවරයාගේ තර්ජන හේතුවෙන් ඇයට දේශපාලන ජීවිතයක් ගතකිරීම වළක්වා ඇත…’
ප්රියන්ත හෙට්ටිගේ
