‘අපේ ඉන්දියානු කාලගුණ විද්යා දෙපාර්තමේන්තුව විසින් පසුගිය අවස්ථා හතරකදී ‘දිට්වා’ සුළි කුණාටුව ගැන ශ්රී ලංකාවේ කාලගුණ බලධාරීන් දැනුවත් කළා. මුලින්ම පසුගිය නොවැම්බර් 13 වැනි දින ‘මූලික පීඩන අවපාතයක්’ ඇති බවට පුරෝකථනය කර තිබූ අතර, ඉන් පසුව නොවැම්බර් 20 වැනි දින ‘චක්ර උත්පාදනය වීමේ හැකියාව’ පිළිබඳ අනතුරු ඇඟවීමක් ශ්රී ලංකාවට නිකුත් කර තිබුණා. එයට පසුව නොවැම්බර් 23 වැනි දින සිට ඉන්දියානු කාලගුණ විද්යා දෙපාර්තමේන්තුව විසින් පද්ධතියේ පැය තුනකට සහ පැය හයකට වරක් ‘කාලගුණ යාවත්කාලීන කිරීම’ නිකුත් කරනු ලැබුවා. සිවුවැනි අවස්ථාව ලෙස නොවැම්බර් 26 වැනි දින ‘සුළි කුණාටුවේ වර්ධනය’ සිදුවන බැව් පෙන්නුම් කරනු ලැබුවා. මෙම සියලු වැදගත් තොරතුරු අප ශ්රී ලංකාව සමග අවධාරණයෙන් යුතුව බෙදාගත්තා. එනම් මේ ආකාරයට විනාශකාරී මහා සුළි කුණාටුවක් ශ්රී ලංකාවට ඇතිවිය හැකි බැව් අප ශ්රී ලංකාවේ බලධාරීන් දැනුවත් කර තිබුණා…’Sri Lanka Latest News
කුමක්ද මෙලෙස ගතසිත කීරිගැසෙන කතාන්දරය? පසුගියදා මුළුමහත් ශ්රී ලංකාවෙන් හරි අඩක් පමණ මහා විනාශයකට පත්කළ ‘දිට්වා’ නමැති සුළි කුණාටු මාරයා ගැන මෙම සුවිශේෂ කතාව කියා සිටින්නේ කවරකු විසින්ද? එසේම මෙම පුවත හරහා අපට එක විටම හැඟී යන්නේ සුළි කුණාටු මාරකය ශ්රී ලංකාව කලින් දැන දැනත් එම ව්යසනයට අවධානයක් යොමු නොකළ බව නොවේද? එනම් මෙරට කාලගුණ බලධාරීන්ගේ අමනෝඥ බුද්ධිය සහ නොසැලකිලිමත්කම ගැන කියැවෙන ශෝකීය කතාවක්ද? ඉහත සුවිශේෂ ප්රකාශය සිදුකර සිටින්නේ කවරකුදැයි සොයා බලමු. මෙයට දින කීපයකට පෙරදී මෙම ආන්දෝලනාත්මක ප්රකාශය සිදුකර තිබුණේ ඉන්දියානු කාලගුණ විද්යා දෙපාර්තමේන්තුවේ ප්රධානියා ලෙස සැලකෙන එහි අධ්යක්ෂ ජනරාල් ආචාර්ය මිරුත්යුන්ජේ මොහපත්රා (Dr. Mrutyunjay Mohapatra – Director General – India Meteorological Department) විසිනි. කාලගුණ විද්යාව පිළිබඳ මහා විද්වතකු වන ඔහු දැනට වසර 06ක් පුරා ඉහත ඉන්දියානු රාජ්ය ආයතනයේ ප්රධානියා ලෙස කටයුතු කරයි. ආචාර්ය මොහපත්රා විසින් මෙම ආන්දෝලනාත්මක ප්රකාශය සිදුකර තිබුණේ ලොව ප්රකට ඉන්දියානු පුවත්පතක් වන ‘ද ඉන්දියන් එක්ස්ප්රස්’ (The Indian Express) පුවත්පත වෙතය. එහි මාධ්යවේදියකු සමග සිදුකර තිබුණු විශේෂ මාධ්ය සාකච්ඡාවකදී මෙම වැදගත් කරුණු අනාවරණ කර තිබිණි. මෙම ප්රකාශය මුළුමහත් ශ්රී ලංකාවටම අතිශය වැදගත් එකක් ලෙස අවිවාදයෙන් පිළිගත හැකිය. ආචාර්ය මොහපත්රා වැඩිදුරටත් මෙසේ කියා සිටී.
‘මෙම සුළි කුණාටුවේ චලනය මුලින් ඉතා මන්දගාමීව පැවැතියත් පසුව එය චණ්ඩ ස්වරූපයක් ගන්නා බැව් අප කළ පර්යේෂණවලින් දුටුවා. ඒ නිසයි එම ක්රියාවලිය අවස්ථා හතරදකදී පැහැදිලි කරමින් ශ්රී ලංකාවේ කාලගුණ බලධාරීන් දැනුවත් කළේ. එහෙත් ඒ ගැන වගකිව යුත්තන් නිසි අවධානයක් යොමුකළේ නැතැයි මම විශ්වාස කරනවා. ඓතිහාසිකව ගත්කල ශ්රී ලංකාවට බලපා ඇත්තේ ඉතා සුළු සුළි කුණාටු සංඛ්යාවක් පමණයි. ඒවාද ප්රබලත්වයෙන් අඩු ඒවා. ඉන්දියාවට නම් ප්රබල සුළි කුණාටු ගණනක් බලපෑවා. එහෙත් අප ඒවාට පෙර සූදානම් වූ නිසා හානිය අවම කරගත්තා. කෙසේ වෙතත් ශ්රී ලංකාවට දරුණු සුළි කුණාටු ගැන අත්දැකීමක් නොමැති නිසා ඒවාට මුහුණ දීමටද හැකියාවක් නොමැති වෙන්න පුළුවන්. ඉන්දියානු කාලගුණ විද්යා දෙපාර්තමේන්තුව විසින් ‘කලාපීය විශේෂිත කාලගුණ විද්යා මධ්යස්ථානය’ (Regional Specialized Meteorological Centre) නමින් පර්යේෂණ ආයතනයක් පවත්වාගෙන යනවා. මේ මගින් කලාපයේ සාගර නිරීක්ෂණය සිදුකරන අතර, ප්රධාන වශයෙන්ම සුළි සුළං සඳහා අනතුරු ඇඟවීම් නිකුත් කරනු ලබයි. මෙම පර්යේෂණ ආයතනය ප්රධාන වශයෙන් ශ්රී ලංකාව, බංග්ලාදේශය, මාලදිවයින, තායිලන්තය, පාකිස්තානය, මියැන්මාරය සහ තවත් රටවල් කිහිපයක් සඳහාම තම මෙහෙවර ඉටුකරයි. ‘දිට්වා’ සුළි කුණාටුව තරමක් වෙනස් එකක්. එනම් එය ආරම්භ වූයේ ශ්රී ලංකාවට දකුණෙන් පිහිටි ස්ථානයක වන අතර, එය සුළි කුණාටු ජනනය සඳහා සාමාන්ය ස්ථානයක් නොවේ. එහෙත් අප ඒ ගැන වේලාසනින් ශ්රී ලංකාව දැනුවත් කළා…’
දැන් ඔබ මෙම කතාවේ යම් හැරවුම් ලක්ෂ්යයක් වෙත පැමිණ සිටින්නේය. එනම් පසුගියදා ශ්රී ලංකාවට මහා විනාශයක් සිදුකළ ‘දිට්වා’ සුළි කුණාටුවට අදාළව හෙළිකෙරුණු වැදගත් කරුණු කිහිපයක් ඉන්දියානු ප්රකාශය හරහා අපට අවබෝධ වී ඇත. මෙම මහා ව්යසනය ගැන ඉන්දියානු රාජ්ය කාලගුණ බලධාරීන් මෙරට බලධාරීන් දැනුවත් කර ඇති පසුබිමකදී මෙරට කාලගුණ වගකිව යුත්තෝ අමනෝඥ බුද්ධියක සිටි ආකාරය පැහැදිලිවම දක්නට හැකිය. පියවරෙන් පියවර එම ව්යසනය ගැන දැනුවත් කර තිබියදීත් මෙරට බලධාරීන් මහා නිද්රාවක සිටි ආකාරය අවබෝධ වෙයි. මෙම තත්ත්වය ගැන පසුගියදා දෙස් විදෙස් විවිධ පාර්ශ්ව ගණනාවක්ද චෝදනා කළ අතර, එහිදී මෙරට ජනමාධ්ය ඇමැති නලින්ද ජයතිස්ස එම චෝදනා භාරගත්තේ නැත.
මෙම ආන්දෝලනාත්මක කරුණු අප විසින් සොයා බලමින් ප්රථමවතාවට අපගේ සිංහල පාඨකයන් වෙනුවෙන් මෙම ලිපිය සකස් කළෙමු. සැබැවින්ම මෙය හෙළිදරව්වකි.
වසර 150ක ඉතිහාසයක් තිබෙන ඉන්දීය කාලගුණ විද්යා දෙපාර්තමේන්තුවේ අනතුරු ඇඟවීම්:
● 2025 නොවැ. 13- මූලික පීඩන අවපාතය ඇති බවට පුරෝකථනය කිරීම.
● නොවැ. 20 – ‘චක්ර උත්පාදනය වීමේ හැකියාව’ පිළිබඳ අනතුරු ඇඟවීම.
● නොවැ. 23 – පැය 3 හා 6කට වරක් ‘කාලගුණ යාවත්කාලීන කිරීම්’ ලබාදීම.
● නොවැ. 26 – ‘සුළි කුණාටුවේ වර්ධනය’ පෙන්වා සිටීම.
ප්රියන්ත හෙට්ටිගේ
