මෙවර මහ කන්නය සඳහා රසායනික පොහොර ලබාදීම කිසි ලෙසකින් හෝ කළ නොහැකි බවත්, ඊළඟට පැමිණෙන යල කන්නයේදීත් තත්ත්වය එසේම විය හැකි බවත් රසායනික පොහොර ආනයනික සමාගම් විසින් පවසා තිබේ.
යල කන්නට සඳහා පොහොර මේ වනවිට ඇණවුම් කළ යුතු වෙයි. එසේ වුවද පවතින ආර්ථික තත්ත්වය හමුවේ එවැනි කටයුත්තක් කිරීමට ඇති අපහසුව පොහොර ආනයනික සමාගම් විසින් පෙන්වා දී තිබේ.
රසායනික පොහොර ආනයනය අත්හිටුවීමට එකවරම ආණ්ඩුව ගත් පියවර නිසා එම සමාගම්වල කි්රයාකාරිත්වය මුළුමනින්ම බිඳ වැටිණි.
ඒ අනුව රසායනික පොහොර සමාගම්වලට සිදු වූයේ තමුන්ගේ සාමාන්ය කි්රයාපටිපාටියෙන් මුළුමනින්ම බැහැර වීමටය.
සැලකිය යුතු කාලයක් මෙලෙස ගත වීම හේතුවෙන් එක්වරම නැවතත් තමුන්ගේ කි්රයාන්විතය ආරම්භ කිරීමේ අපහසුතාවයට ඔවුන් මේ වනවිට මුහුණ දී සිටිති. ඒ සියල්ලටම වඩා ඔවුන් මුහුණ දී ඇති ගැටළුව වන්නේ බැංකු පහසුකම් ලබාගැනීමට ඇති අපහසුවයි.
මේ වන විට ආණ්ඩුව රසායනික පොහොර ගෙන්වීමට නැවත අවසර දී තිබුනද ඒ සඳහා පොහොර ආනයනික සමාගම් උනන්දුවක් දක්වන බව පෙනෙන්නට නැත.
මේ සම්බන්ධයෙන් ජාතික පොහොර ලේකම් කාර්යාලය පවසන්නේ තහනම ඉවත් කරනු ලැබුවද, කිසිදු පොහොර සමාගමක් රසායනික පොහොර ආනයනය සඳහා තම ආයතනයෙන් ඉල්ලීමක් කර නොමැති බවයි.
ඒ අතරතුර රසායනික පොහොර ආනයනික සමාගම් විසින් තමුන්ගේ සේවක සේවිකාවන් රැකියාවලින් ඉවත් කිරීමටද කටයුතු කරමින් සිටින බව වාර්තා වීම මගින් අවබෝධ වන්නේ ඔවුන්ට නැවතත් පොහොර ආනයනය කර බෙදාහැරීමේ කටයුත්තට කිසිදු උනන්දුවක් නොමැති බවය.
මෙවර මහ කන්නය සම්බන්ධයෙන් මේ වනවිටත් කෘෂි විශේෂඥයන් විවිධාකාර අන්දමින් අයහපත් අනතුරු හැ`ගවීම් කර තිබෙන බව මෙහිදි අමතක කළ නොහේ. වී ගොවියන් සැළකිය යුතු ප්රමාණයක් මෙවර මහ කන්නයේ වී වගා කටයුතු වලින් වැළකී සිටිති.
එසේම බොහෝ කලකට පසුව කාබනික පොහොර පමණක් භාවිතා කරන්නට ආණ්ඩුව ගත් තීරණය නිසා මෙවර අස්වැන්නේද සැළකිය යුතු අඩුවීමක් කෘෂි විශේෂඥයන් බලාපොරොත්තු වෙයි.
එවන් පසුබිමක් මත ඊළඟ යල කන්නයද මෙලෙස අවිනිශ්චිත තත්ත්වයට පත් වුවහොත් කෘෂිකර්මාන්තයේ යෙදී සිටින බොහෝ දෙනෙක් ඉන් ඉවත්ව වෙනත් විකල්ප සෙවීමේ අවදානමක් ඇති බව වගකිව යුතු අංශ විසින් වටහා ගත යුතුව තිබේ.
