ඇල්කඩුව වැවිලි සමාගමට අයත් වතුයායේ සභාපතිවරයා එම සමාගමේ ප්රධාන විධායක නිලධාරියා ලෙස තනතුරු දෙකක් දරමින් සිටින බව කෝප් කමිටුවේදී අනාවරණය විය.Sri Lanka Latest News
එමෙන්ම එම තනතුරු දෙකටම අදාළ වරප්රසාද සියල්ල මෙම පුද්ගලයා ලබාගෙන ඇති බවද මෙහිදී හෙළිදරව් විය.
මීට අමතරව අවස්ථා කිහිපයකදීම චෝදනාවලට වැරැදිකරු වූ පුද්ගලයකු සාමාන්යාධිකාරී තනතුරට පත්කොට ඇති බවද කෝප් කමිටුවේදී අනාවරණ විය.
මෙහිදී මෙම තත්ත්වය සති දෙකක් ඇතුළත නිවැරැදි කරන ලෙස කෝප් කමිටු සභාපති මහාචාර්ය රංජිත් බණ්ඩාර මහතා නිර්දේශ ලබා දීමට පියවර ගෙන තිබිණි.
මේ අතර, ඇල්කඩුව වැවිලි සමාගමට අයත් රත්වත්තේ වතුයායේ රුපියල් 400ක් වටිනා ගම්මිරිස් කිලෝ 02ක් සොරකම් කළ වතුයායේ සේවකයින් දෙදෙනකුට පවරා ඇති නඩුවෙන් වැවිලි සමාගම පරාජය වී ඇති අතර නඩු කටයුත්ත අවසන් වනවිට සමාගමට රුපියල් ලක්ෂ 274ක මුදලක් වැයවී ඇති බවද පොදු ව්යාපාර පිළිබඳ කාරකසභා රැස්වීමේ දී අනාවරණ විය.
2017 වර්ෂයේ දී රත්වත්තේ වතුයායෙන් ගම්මිරිස් කිලෝ 02ක් සොරකම් කිරීම සම්බන්ධයෙන් වතුයායේ ක්ෂේත්ර නිලධාරියකුට හා මුරකුරුවකුට ඇල්කඩුව වැවිලි සමාගම විසින් මාතලේ අධිකරණයේ නඩු අංක 39/32/2017 යටතේ නඩු පවරා තිබිණි.
මෙම නඩුවෙන් ඇල්කඩුව වැවිලි සමාගම පරාජය වී තිබූ අතර එම නිසා එක් සේවකයෙකුට රුපියල් 534,000ක හා අනෙක් සේවකයාට රුපියල් 858,000ක වන්දි මුදලක් ගෙවීමට සමාගමට සිදුවුණේය. ඔවුන්ගේ නීතිඥ ගාස්තු වශයෙන් රුපියල් 1,350,000ක මුදලක් ගෙවා ඇති බවද පොදු ව්යාපාර කමිටු රැස්විමේ දී අනාවරණ විය.
සොරකම් කරනු ලැබූ රුපියල් 400ක් වටිනා ගම්මිරිස් කිලෝ 02 වෙනුවෙන් පවරනු ලැබූ නඩු කටයුතු වසර 6ක් තිස්සේ පවත්වාගෙන ගොස් අවසන් වනවිට ඇල්කඩුව වැවිලි සමාගමට රුපියල් ලක්ෂ 274ක මුදලක් වැයවී ඇති බව මෙම කමිටුවේ දී අනාවරණ විය.
මීට අමතරව ඇල්කඩුව සමාගමේ සාමාන්යාධිකාරිවරයා ලෙස කටයුතු කළ අයකුට චෝදනා රැසක් එල්ල වී තිබූ බවත්, ඒ මහතා විනය පරීක්ෂණවලින් පවා වැරැදිකරුවකු වූ බවත් පෙන්වා දුන් කෝප් කමිටු මන්ත්රීවරු ඒ සම්බන්ධයෙන්ද තොරතුරු ඉදිරිපත් කළහ.
එහීදී කෝප් කමිටු සභාපතිවරයා නිර්දේශ කළේ සති දෙකක් ඇතුළත මේ සම්බන්ධයෙන් වාර්තාවක් ලබාදෙන ලෙසය.
මේ අතර ඇල්කඩුව වතුයායේ තවත් වංචා දූෂණ රැසක්ම ඉදිරියේදී පාර්ලිමේන්තුවේ හෙළිදරව් කිරීමටත්, ඊට අදාළ ලිපිගොනු ජනාධිපතිවරයාට, විපක්ෂ නායකවරයාට සහ ජවිපෙ නායක අනුර කුමාර දිසානායක යන මහත්වරුන් වෙත ලබාදීමටත් එම වතු යායේ සේවකයන් සූදානමින් සිටින බවද දැනගන්නට ඇත.
