පහුගිය සතියෙ අපි ලංකාවේ හාල් මුදලාලිලාගෙ වාහන ගැන උජාරුවට කතා කළා. සමහරු අපිට බැන්නා, සමහරු අපිට හොඳ කිව්වා. හැබැයි ඔබ පරිස්සමට කියවගන්න ඕනෙ දේ තමයි අපි ලිපියෙ කියන්නෙ සාධාරණයි නම්, හොරයක් බොරුවක් නැත්නම් කිසි ප්රශ්නයක් නැහැ. අසාධාරණයි නම්, හොරයක් බොරුවක් නම් ප්රශ්නයක් තියෙනවා. හැබැයි හොරයක් බොරුවක් තියෙනවා නම් සෝෂල් මීඩියා ඇතුළෙ චෝදනා කර කර ඉඳලා වැඩක් නැහැ. නරකයි නම්, වැරදියි නම් සමාජ මාධ්ය ඇතුළෙ ඒ මිනිස්සුන්ට අපහාස කරලා වැඩක් නැහැ. දඬුවම් කරන්න ඕනෙ, වැරදිකරුවන් නම් ඔවුන්ව අත්අඩංගුවට ගන්න ඕනෙ, යළි මෙවැනි දේ නොවෙන්නට වගබලා ගන්නත් ඕනෙ. එහෙම නැතුව මේ වගේ දේවල් රට ඇතුළෙ වෙනකම් ඉඳලා, ඒවා වුණාට පස්සෙ කිසි වගේ වගක් නැතුව, කිසිම චෝදනාවක් නැතුව, කිසි ප්රශ්නයක් නැතුව, කිසිම දඬුවමකුත් නැතුව සමාජ මාධ්ය ඇතුළෙ මිනිස්සුන්ව පතුරු ගහගහ ඉඳලා වැඩක් නැහැSri Lanka Latest News
ඩඩ්ලි රෝල්ස් රොයිස් එකක් ගෙනාවා. ඩඩ්ලි රෝල්ස් රොයිස් එකක් ගේන්න කලින්ම රත්න හෙලිකොප්ටරයක් ගෙනාවා. දැන් ඩඩ්ලි හෙලිකොප්ටරයක් ගේන්න ගිහිල්ලා, රත්න රෝල්ස් රොයිස් තුනක් ගෙනාවා. පළමුවැනි වතාවට රෝල්ස් රොයිස් එස්.යූ.වී. එකක් ලංකාවට ගෙනාවා. ඒ වගේම ඩඩ්ලි හෙලිකොප්ටරයක් ගේන්න ලෑස්ති වෙනකොට රත්න ලෑස්ති වෙනවා ප්රයිවට් ජෙට් එකක් ගේන්න.
වැඩේ යනවා, හොඳට යනවා, කිසි ප්රශ්නයක් නැහැ. දෙන්නම ගේම් එක ලස්සනට ප්ලේ කරනවා. කාටවත් වරදක් කියන්න බැරි විදියට මේගොල්ලො මේක ව්යාපාරයක් විදියට කරගෙන යනවා. පොළොන්නරුව ස්වයංපෝෂිත කළේ සහලින්, ඒ පරාක්රමබාහු රජ්ජුරුවො. පරාක්රම සමුද්රය පාමුල ඩඩ්ලි හෝටලයක් හැදුවා. ඩඩ්ලිගෙ හෝටලයට අභියෝග කළා, හැබැයි අභියෝගය පැරදුණා, ඩඩ්ලි දිනුවා. වැටෙන් එහාට කවුරුවත් ආවෙ නැහැ.
රත්න, ඩඩ්ලි තරම් ප්රසිද්ධ නැහැ, රත්නට ඩඩ්ලිට තරම් ලොකු බලයකුත් නැහැ. හැබැයි ඩඩ්ලිට වඩා ඉස්සරහින් රත්න ඉන්නවා. රත්න ඩඩ්ලිව පහු කරනවා, ඩඩ්ලි රත්නව පහු කරනවා. මේ දෙන්නා ඉන්නෙ රේස් එකක. මේ රේස් එකෙන් කවුරු දිනුවත් මිනිස්සු පරාදයි කියලා මං දැක්කා සමාජ මාධ්ය ඇතුළෙ කියලා තියෙනවා.
ඔව්, හාල් මාෆියාවක්. මාෆියාවක් නම් ඇයි මාෆියා කල්ලිවලට නිදහසේ ඉන්න දෙන්නෙ? වහාම දඬුවම් කරන්න ඕනෙ. ඒ නිසා අපි හොයමු මේගොල්ලො අයථා විදියට සල්ලි හොයනවද කියලා. කොහොම වෙතත් ආණ්ඩුව බලයට ආවෙ ඩඩ්ලිලාට, රත්නලාට එරෙහිව අවි ආයුධ අමෝරාගෙන, දුටු තැන ගහනවා කියලා කටමැත දොඩවමින්. එක සතියෙන් දෙකෙන් රත්නලාව, ඩඩ්ලිලාව අල්ලලා පොළොවෙ ගහන්න ආපු ආණ්ඩුව අල්ලලා පොළොවෙ ගහන්න රත්නලාට, ඩඩ්ලිලාට පුළුවන් වුණා.
අද රත්නලයි, ඩඩ්ලිලයි, ආණ්ඩුවයි ඔක්කොම ඉන්නෙ එක මල්ලෙ පොල් වගේ, එක වල්ලෙ ගෙඩි වගේ. කවුරුත් කාටවත් වෙනසක් කරන්නෙ නැහැ, කවුරුත් කාවවත් රිදවන්නෙ නැහැ. හරිම ආදරෙයි, හරිම ළෙන්ගතුයි. අද ඩඩ්ලිලා විපක්ෂය විවේචනය කරන තැනටම ඇවිල්ලා. විපක්ෂය විවේචනය කරන්නෙ එහෙම විවේචනය කරොත් තමයි ඩඩ්ලිලාට කම්ෆර්ටබල් සෝන් එකක නිදාගන්න ලැබෙන්නෙ කියලා තියෙන විශ්වාසය නිසා වෙන්න ඇති.
ඩඩ්ලිලාව උස්සලා පොළොවෙ ගහන්න ආණ්ඩුවට බැරි බව ඩඩ්ලිලා ආණ්ඩුවට ඔප්පු කරලා පෙන්නුවා. හැබැයි දැන් ඩඩ්ලිලා අතින් පයින් වැඩ දානකොට ලංකාවේ හාල් ව්යාපාරිකයෝ සිව්සැට බරණින් සැරසෙනකොට, ලංකාවේ හාල් ව්යාපාරිකයෝ සකල කලා වල්ලභලා වෙනකොට, රාජ රාජ මහාමාත්යාදීන් වගේ සියලු සැප වළඳනකොට, හාල් වවන ගොවියෝ එල්ලිලා මැරෙනවා කියලා සමාජ මාධ්යවල මං දැක්කා ලිපියක් දාලා තියෙනවා.
මිනිස්සු ගොවිතැන් කළාට ඒ මිනිස්සු දැන් ණයකාරයෝ. ඒ මිනිස්සු පරම්පරා ගාණක ණයකාරයෝ. පරම්පරා ගණනකින් ඒ ණය බරින් නිදහස් වෙන්න බැරි විදියට ඒ මිනිස්සුන්ව එල්ලලා තියලා තියෙන්නෙ. ටික ටික පණ යනවා. එකපාර එල්ලිලා මැරුණොත් එකයි, නැත්නම් වෙන්නෙ මොකක්ද? බින්දුව බින්දුව පණ ගිහිල්ලා අන්තිමට මැරිලා යන්න. මේ අවාසනාවන්ත මිනිස්සුන්ගෙ අවාසනාවන්ත කතාව වාසනාවකින් කෙළවර වෙයිද කියලා අපි කවුරුත් දන්නෙ නැහැ.
රජරට බාගෙට බාගයක් වකුගඩු අමාරුවෙන් මැරිලා යනවා. රජරට මිනිස්සුන්ට ලොකු වකුගඩු ඉස්පිරිතාලයක් හදලා හයියෙන් අප්පුඩි ගහපු පාලකයෝ වකුගඩු අමාරුවට බෙහෙත් හොයන්න විවිධ උපක්රම හදපු ආණ්ඩුවට කැරකිලා වැටෙන්න ගැහුවා. වකුගඩු අමාරුව ඉතිරි වුණා, ආණ්ඩුව ගෙදර ගියා. රට පරණ තැනම ඉස්සරහට යනවා.
මේක සෙල්ලමක්. මේ සෙල්ලම ඇතුළෙ ඩඩ්ලිලා, රත්නලා අතේ තමයි තුරුම්පු තියෙන්නෙ. ආණ්ඩුව හිතුවා තුරුම්පු නැතුව වල් වාසිවලින් මේ ගේම ගහන්න පුළුවන් කියලා. හැබැයි ආසි, හේරා, පොරව, බූරු ඔක්කොම අතේ තියාගෙන කුට්ටම අනපු ඩඩ්ලිලාට, රත්නලාට විරුද්ධව හයේ, හතේ, අටේ, නවයේ කොලවලින් සෙල්ලම් කරන්න බැහැ කියලා ආණ්ඩුවට තේරුණා. දැන් ආණ්ඩුව ඩඩ්ලිලාට ඉඩ දීලා තියෙන්නෙ අත වහලා ගහන්න. දැන් සෙල්ලමේ යට අත සෙපෝරු හින්දා කොහොම ගැහුවත් ඩඩ්ලිලා දිනනවා.
හැබැයි ඊළඟ කතාව තමයි කොහොම ගැහුවත් අපි පරාදයි කියලා මිනිස්සු කියනවා මේ වෙලාවේ. අන්න එතැනයි නෝනාවරුනි, මහත්වරුනි, ප්රශ්නෙ තියෙන්නෙ.
ජීවන පහන් තිළිණ
