ජනාධිපතිවරයාගේ බලතල වැඩි කරමින් සම්මත කරගත් 20 වන සංශෝධනය අහෝසි කිරීමට ජනාධිපති ගෝඨාභය රාජපක්ෂ මහතා එකඟතාව පළ කොට ඇත.
ඒ අනුව එම යෝජනාව හෙට පැවැත්වෙන පක්ෂ නායක රැස්වීමට ඉදිරිපත් කිරීමට නියමිත බව දැනගන්නට ඇත.
ඉදිරියේදී එම යෝජනාව පාර්ලිමේන්තුවට ඉදිරිපත් කොට සම්මත කරගැනීමටද මෙහිදී ජනාධිපතිවරයා එකගතතාව පළ කොට ඇත.
මෙහි ප්රතිපලයක් ලෙස ජනාධිපතිවරයාගේ බලතල අඩු වී පාර්ලිමේන්තුවට සහ අගමැතිවරයාට වැඩි බලතල හිමිවීමට නියමිතය.
2015දී එවක පැවැති යහපාලන රජය 19 වැනි සංශෝධනය ගෙන එමින් ජනාධිපතිවරයාගේ බලතල දැඩි කප්පාදුවකට ලක් කොට පාර්ලිමේන්තුවේ බලය වැඩිකිරීමට පියවර ගත්තද 2019 බලයට පත් වත්මන් ආණ්ඩුව 20 වන සංශෝධනය ගෙන එමින් නැවත වතාවක් ජනාධිපති ධූරය ශක්තිමත් කිරීමට පියවර ගත්තේය.
