හෙට දිනයේදී අගමැති මහින්ද රාජපක්ෂ මහතා විසින් පාර්ලිමේන්තුවේදී විශේෂ ප්රකාශයක් සිදු කිරීමට නියමිතය.
මේ වනවිට ඊට අදාළ කතාව සූදානම් වෙමින් පවතින බව දැනගන්නට තිබේ.
ඊයේ දිනය වනවිට අගමැතිවරයා සිය ධූරයෙන් ඉවත් වීමට සූදානමින් සිටින බවට මත පළවී තිබුණත් මේ වනවිට එය නැවත වතාවක් වැට උඩ පවතින බවක් දැනගන්නට තිබේ.
ඒ අනුව හෙට දිනයේදී අගමැතිවරයා සිය කතාවේදී බහුතරය පෙන්වන ඕනෑම අයකුට අගමැති ධූරය බාර දී තමන් තනතුරින් ඉවත් වීමට සූදානම් බව ප්රකාශ කිරීමට සැලසුම් කර ඇති බව වාර්තා වේ.
එමෙන්ම 20 වන සංශෝධනය මගින් සියලු බලතල ජනාධිපතිවරයා වෙත පවරා ඇති බැවින් ජනාධිපතිවරයා විසින් ගනු ලබන ඕනෑම තීන්දුවකට හිස නැමීමට තමන් සූදානම් බව ප්රකාශ කිරීමට අගමැතිවරයා සැලසුම් කර ඇති බවද වාර්තා වේ.
කෙසේවෙතත් අගමැතිවරයකු ප්රකාශයට පත් නොකර තමන් ධූරයෙන් ඉවත් වුවහොත් ඒ හරහා රට අරාජික වීමට ඉඩ ඇති බැවින් බහුතරය පෙන්වන අයකුට අගමැති ධූරය බාර දීමට සූදානම් බව ප්රකාශයට පත් කිරීමට අගමැතිවරයා සූදානමින් සිටින බවද දැනගන්නට තිබේ.
